Die Bybel se beskouing

Is daar net een ware God?

MOLOG, Astoret, Baäl, Dagon, Merodag, Zeus, Hermes en Artemis is party van die gode en godinne wat die Bybel by name noem (Levitikus 18:21; Rigters 2:13; 16:23; Jeremia 50:2; Handelinge 14:12; 19:24). Tog is dit net Jehovah wat in die Skrif as die almagtige God beskryf word. Sy volk het onder Moses se leiding ’n oorwinningslied gesing waarin hulle gevra het: “Wie onder die gode is soos u, o Jehovah?”—Eksodus 15:11.

Dit is duidelik dat die Bybel Jehovah bo alle ander gode stel. Maar watter rol speel hierdie mindere gode? Is hulle, en die tallose ander gode wat deur die eeue heen aanbid is, werklike gode wat ondergeskik is aan die almagtige God, Jehovah?

Produkte van die verbeelding

Die Bybel identifiseer Jehovah as die enigste ware God (Psalm 83:18; Johannes 17:3). Die profeet Jesaja het God se eie woorde opgeteken toe hy gesê het: “Voor my is geen God geformeer nie, en ná my was daar steeds nie een nie. Ek—ek is Jehovah, en buiten my is daar geen redder nie.”—Jesaja 43:10, 11.

Al die ander gode is nie net ondergeskik aan Jehovah nie. In die meeste gevalle bestaan hulle nie eers nie—hulle is bloot produkte van mense se verbeelding. Die Bybel verwys na hierdie gode as “die werk van mensehande . . . wat nie kan sien of hoor of eet of ruik nie” (Deuteronomium 4:28). Die Bybel leer duidelik dat Jehovah die enigste ware God is.

Dit is geen wonder dat die Skrif ernstig waarsku teen die aanbidding van enige ander god buiten Jehovah nie. In die eerste van die Tien Gebooie wat aan Moses gegee is, is die eertydse nasie Israel byvoorbeeld aangesê om geen ander god te aanbid nie (Eksodus 20:3). Waarom?

Eerstens, om ’n god te vereer wat nie eers bestaan nie, is ’n growwe belediging vir die Skepper. Volgens die Bybel het die aanbidders van hierdie valse gode ‘die waarheid van God vir die leuen verruil en eer bewys en heilige diens verrig aan die skepping pleks van aan die Een wat geskep het’ (Romeine 1:25). Hierdie denkbeeldige gode word dikwels deur afgode voorgestel wat gemaak word van stowwe wat in die natuur aangetref word, soos metaal en hout. Baie gode word met sekere aspekte van die natuur, soos donderweer, die oseane en die wind, geassosieer. ’n Mens toon dus beslis growwe minagting vir die almagtige God as jy sulke valse gode vereer.

Vir die Skepper is valse gode en hulle afgode iets verfoeiliks. Maar God spreek sy misnoeë hoofsaaklik uit teenoor diegene wat hierdie valse gode maak. Sy sienswyse word kragtig uitgedruk in die volgende woorde: “Die afgode van die nasies is silwer en goud, die werk van mensehande. ’n Mond het hulle, maar hulle kan glad nie praat nie; oë het hulle, maar hulle kan niks sien nie; ore het hulle, maar hulle kan na niks luister nie. Ook is daar geen gees in hulle mond nie. Dié wat hulle maak, sal net soos hulle word, elkeen wat op hulle vertrou.”—Psalm 135:15-18.

Daar is nog ’n rede vir die Bybel se ernstige waarskuwing teen die aanbidding van enigiemand of enigiets buiten Jehovah God. Sulke aanbidding sal ’n ontsaglike vermorsing van tyd en energie wees. Die profeet Jesaja het tereg gesê: “Wie het ’n god gevorm of ’n gegote beeld gemaak? Dit het hoegenaamd geen voordeel gebring nie” (Jesaja 44:10). Die Bybel sê ook dat “al die gode van die volke . . . waardelose gode [is]” (Psalm 96:5). Valse gode is in werklikheid niks nie, en deur niks te aanbid, word niks bereik nie.

Jesus, die engele en die Duiwel

Die Skrif verwys wel by tye na werklike persone as gode. Maar ’n noukeurige ondersoek toon duidelik dat die term “god” in dié gevalle nie bedoel is om hierdie individue as gode te identifiseer nie. In die oorspronklike tale waarin die Bybel geskryf is, is die term “god” egter ook gebruik om ’n magtige persoon of individu te beskryf wat goddelik is of ten nouste geassosieer is met die almagtige God.

Sommige Bybelverse sinspeel byvoorbeeld daarop dat Jesus Christus ’n god is (Jesaja 9:6, 7; Johannes 1:1, 18). Beteken dit dat Jesus aanbid moet word? Jesus self het gesê: “Jehovah jou God moet jy aanbid, en aan hom alleen moet jy heilige diens verrig” (Lukas 4:8). Dit is duidelik dat hoewel Jesus baie magtig en ’n goddelike wese is, die Bybel hom nie as ’n voorwerp van aanbidding uitbeeld nie.

Daar word ook na die engele verwys as “goddelike wesens” (Psalm 8:5; Hebreërs 2:7). Nietemin word mense nêrens in die Skrif aangemoedig om engele te vereer nie. Trouens, by ’n sekere geleentheid was die bejaarde apostel Johannes met soveel ontsag vervul weens die teenwoordigheid van ’n engel, dat hy neergeval het om die engel te aanbid. Die engel het egter vir hom gesê: “Pas op! Moet dit nie doen nie! . . . Aanbid God.”—Openbaring 19:10.

Die apostel Paulus het die Duiwel as “die god van hierdie stelsel van dinge” beskryf (2 Korintiërs 4:4). As “die heerser van hierdie wêreld” het die Duiwel die aanbidding van tallose valse gode bevorder (Johannes 12:31). Gevolglik is alle aanbidding wat tot mensgemaakte gode gerig word, in werklikheid Satanaanbidding. Maar Satan is nie ’n god wat ons aanbidding waardig is nie. Hy is ’n selfaangestelde heerser, ’n indringer. Mettertyd sal hy, tesame met alle vorme van valse aanbidding, uit die weg geruim word. Wanneer dit gebeur, sal die hele mensdom—ja, die hele skepping—Jehovah vir altyd as die enigste ware en lewende God erken.—Jeremia 10:10.

HET JY AL GEWONDER?

◼ Wat leer die Bybel aangaande afgodediens?—Psalm 135:15-18.

◼ Moet Jesus en die engele as gode aanbid word?—Lukas 4:8.

◼ Wie is die enigste ware God?—Johannes 17:3.

[Prente op bladsy 28, 29]

Beelde van links na regs: Maria, Italië; Maja-mieliegod, Mexiko en Sentraal-Amerika; Astoret, Kanaän; ’n fetisj-afgod, Sierra Leone; ’n Boeddha, Japan; Chicomecóatl, Asteeks, Mexiko; Horus-valk, Egipte; Zeus, Griekeland

[Erkenning]

Mieliegod, Horus-valk en Zeus: Photograph taken by courtesy of the British Museum