Die Bybel se beskouing

Is dit prakties om vredeliewend te wees?

IN SY bekendste toespraak het Jesus Christus gesê: “Gelukkig is die vredeliewendes.” Hy het ook gesê: “Gelukkig is die saggeaardes, want hulle sal die aarde beërf” (Matteus 5:5, 9). Om vredeliewend te wees, behels meer as om vrede te geniet of kalm te voel. ’n Vredeliewende mens neem die inisiatief om welwillend te wees en bevorder vrede daadwerklik.

Is Jesus se woorde hierbo prakties in ons dag? Party dink dat jy intimiderend, aggressief en selfs gewelddadig moet wees as jy in hierdie moderne wêreld sukses wil behaal. Sal dit verstandiger wees om aggressiewe mense in gelyke munt terug te betaal? Of is dit prakties om vredeliewend te wees? Kom ons ondersoek drie redes waarom ons moet ag gee op Jesus se woorde: “Gelukkig is die vredeliewendes.”

◼ KALMTE VAN HART “’n Kalm hart is die lewe van die vlees”, sê Spreuke 14:30. Baie mediese verslae toon dat woede en vyandigheid beroertes en hartaanvalle kan veroorsaak. ’n Mediese tydskrif het onlangs van mense met hartsiektes gepraat en woedeuitbarstings met gif vergelyk. Die tydskrif het ook gesê dat “jy baie siek kan word as jy baie kwaad word”. Maar dié wat vrede nastreef, kan “’n kalm hart” verkry en voordele daaruit put.

Een voorbeeld hiervan is Jim, ’n 61-jarige wat tans ’n Bybelonderrigter in ’n Viëtnamese gemeenskap is. Hy verduidelik: “Nadat ek ses jaar lank militêre diens gedoen het en drie keer in Viëtnam gaan veg het, het ek baie goed geweet wat geweld, woede en frustrasie is. My verlede het my gekwel en slaapprobleme veroorsaak. Kort voor lank het spanning sowel as maag- en senuweeprobleme my gesondheid aangetas.” Wat het verligting gebring? Hy sê: “’n Studie van die Bybel saam met Jehovah se Getuies het my lewe gered. Toe ek geleer het dat dit God se voorneme is om ’n vreedsame nuwe wêreld te skep en hoe ek my met ‘die nuwe persoonlikheid’ kan beklee, het ek ’n kalm hart gekry. Gevolglik het my gesondheid baie verbeter” (Efesiërs 4:22-24; Jesaja 65:17; Miga 4:1-4). Baie ander het uit persoonlike ondervinding tot die gevolgtrekking gekom dat jou emosionele, fisiese en geestelike gesondheid kan verbeter as jy ’n vredeliewende gees aankweek.—Spreuke 15:13.

◼ GELUKKIGER VERHOUDINGS Ons verhoudings met ander sal verbeter wanneer ons ’n vredeliewende gees openbaar. Die Bybel sê dat “toorn en gramskap en geskreeu en smadende taal . . . weggeneem [moet] word, saam met alle slegtheid” (Efesiërs 4:31). Mense wat aggressief optree, stoot ander dikwels weg en vind dan dat hulle alleen is, sonder betroubare vriende. Spreuke 15:18 sê: “’n Woedende man verwek twis, maar die een wat nie gou toornig word nie, bring ’n rusie tot bedaring.”

Andy, ’n 42-jarige Christen- ouer man in die stad New York, het in ’n aggressiewe milieu grootgeword. Hy verduidelik: “Ek is op agtjarige ouderdom in die kryt gesit en geleer om te boks. Ek het nie aan my opponente as mense gedink nie. Pleks daarvan het ek geredeneer ‘slaan of word geslaan’. Kort voor lank was ek deel van ’n bende. Ons het baie keer by straatbakleiery en vuisgevegte betrokke geraak. Vuurwapens is al teen my kop gehou, en ek is met messe gedreig. Baie van my vriendskappe was vol probleme en op vrees gegrond.”

Wat het Andy beweeg om vrede na te streef? Hy sê: “Ek het eendag ’n vergadering by ’n Koninkryksaal van Jehovah se Getuies bygewoon, en ek kon onmiddellik die liefdevolle gees onder die mense daar aanvoel. Sedertdien het my omgang met hierdie vredeliewende mense my gehelp om ’n kalm hart te verkry, en dit het my vorige denkwyse uiteindelik laat verdwyn. Ek het baie blywende vriendskappe gesmee.”

◼ HOOP VIR DIE TOEKOMS Die belangrikste rede om vredeliewend te wees, is eenvoudig: Dit toon eer en respek vir die geopenbaarde wil van ons Skepper. God se eie Woord, die Bybel, spoor ons aan: “Soek vrede en streef dit na” (Psalm 34:14). As ons erken dat Jehovah God bestaan en dan van sy lewegewende leringe leer en dit gehoorsaam, baan dit die weg tot ’n persoonlike vriendskap met hom. Met daardie sterk verhouding verkry ons “die vrede van God”. Dit is ’n allesoortreffende vrede, ongeag die uitdagings wat die lewe kan bring.—Filippense 4:6, 7.

Deur vredeliewend te wees, wys ons ook vir Jehovah watter soort mens ons wil wees. Ons kan nou aan God bewys dat ons in sy beloofde vreedsame nuwe wêreld sal inpas. Wanneer hy die goddeloses verwyder en, soos Jesus gesê het, dit vir die saggeaardes moontlik maak om “die aarde [te] beërf”, kan ons daar wees om dit te sien. Wat ’n voorreg sal dit tog wees!—Psalm 37:10, 11; Spreuke 2:20-22.

Ja, dit is maklik om die praktiese waarde van Jesus se woorde, “gelukkig is die vredeliewendes”, te sien. Ons kan ’n kalm hart, betekenisvolle verhoudings en ’n vaste hoop vir die toekoms hê. Ons kan hierdie seëninge verkry wanneer ons ons bes doen om “vreedsaam teenoor alle mense” te wees.—Romeine 12:18.

[Prente op bladsy 28]

‘My gesondheid het baie verbeter.’—Jim

[Prente op bladsy 29]

“Ek het baie blywende vriendskappe gesmee.”—Andy