Moedig maar vreedsaam
1 Baie mense vir wie ons getuig, spreek opregte oortuigings uit wat in stryd is met Bybelwaarheid. Hoewel ons met vrymoedigheid moet getuig, wil ons ook “vreedsaam teenoor alle mense” wees en nie onnodig aanstoot gee nie (Rom. 12:18; Hand. 4:29). Hoe kan ons moedig maar vreedsaam wees terwyl ons die Koninkryksboodskap bekend maak?
2 Vind ’n gemeenskaplike grondslag: ’n Vreedsame persoon vermy argumente. As ons die oortuigings waaroor ’n huisbewoner sterk voel, onnodig betwis, sal dit hom nie in ’n ontvanklike gemoedstemming plaas nie. As hy ’n verkeerde verklaring maak, kan ’n mens taktvol ’n gedagte inbring waaroor julle dalk saamstem. Deur te beklemtoon wat julle in gemeen het, sal jy dalk enige negatiewe gevoelens uit die weg kan ruim en tot sy hart kan spreek.
3 Is ons ontrou aan die waarheid of water ons dit af as ons ’n huisbewoner se verkeerde beskouing laat verbygaan? Nee. Ons toewysing as Christenbedienaars is om die goeie nuus van God se Koninkryk te verkondig, nie om elke wanopvatting wat ons teëkom, te weerlê nie (Matt. 24:14). In plaas daarvan om te oorreageer wanneer iemand ’n verkeerde verklaring maak, kan ons dit as ’n geleentheid beskou om insig in die persoon se denke te verkry.—Spr. 16:23.
4 Behandel mense met waardigheid: Daar is tye wanneer ons moedig moet wees wanneer ons verkeerde leerstellings weerlê. Maar as vreedsame mense bespot ons ander nie, en ons gebruik ook nie neerhalende woorde om diegene te beskryf wat onjuisthede glo en aan ander leer nie. ’n Meerderwaardige houding vervreem mense, maar ’n nederige en goedhartige benadering maak liefhebbers van waarheid ontvanklik. As ons respek toon vir ons toehoorders en vir hulle oortuigings, behou hulle hulle waardigheid, wat dit vir hulle makliker maak om ons boodskap te aanvaar.
5 Die apostel Paulus het die oortuigings van dié vir wie hy getuig het, in ag geneem en het die goeie nuus op ’n manier probeer oordra wat tot hulle harte sou spreek (Hand. 17:22-31). Hy het gewillig “alles vir alle soorte mense” geword sodat hy “op elke moontlike manier sommige [kon] red” (1 Kor. 9:22). Ons kan dieselfde doen deur vreedsaam te wees terwyl ons die goeie nuus moedig verkondig.