Ons beskou die wêreld
◼ Sestig persent van Brasiliaanse kinders het tandbederf teen die tyd dat hulle drie is. Een rede hiervoor is dat bottelvoeding, wat dikwels versoete drankies in die nag insluit, nie deur noodsaaklike mondhigiëne opgevolg word nie.—FOLHA ONLINE, BRASILIË.
◼ ’n Kwart van alle geboortes in die Verenigde State word nou deur middel van ’n keisersnee gedoen. In die stad New York is die syfer vyf keer hoër as in 1980. Een rede hiervoor is dat dit gerieflik is om die tyd van geboorte te bepaal, maar die risiko daaraan verbonde om hierdie operasie onnodig uit te voer, is “ontsettend groot”.—THE NEW YORK TIMES, VSA.
◼ Oor die afgelope 100 jaar het Mexikostad se gemiddelde temperatuur met amper 4 grade Celsius gestyg, teenoor 0,6 grade wêreldwyd. Deskundiges blameer ontbossing en verstedeliking.—EL UNIVERSAL, MEXIKO.
◼ Meer as die helfte van paartjies wat in die Verenigde State trou, woon alreeds saam. Die kanse dat hierdie paartjies sal skei, is tot twee keer groter as dié van paartjies wat eers trou en dan saamwoon.—PSYCHOLOGY TODAY, VSA.
Die irriterendste werkgewoontes
“Luidrugtige telefoongesprekke, [die gebruik van] luidsprekertelefone en aanhoudende klagtes oor die werklas is boaan die lys van die irriterendste werkgewoontes van ons medewerkers”, berig die Washington Post. Ander gewoontes wat medewerkers kwaad maak, is wanneer “werksmaats klieke vorm, laat by die werk aankom, met hulleself praat, bo-oor kantoorafskortings met werksmaats praat, swak higiëne het en harde eetgeluide maak”. Hierdie slegte gewoontes benadeel ook werkersproduktiwiteit. Die meeste mense wat navorsers se vrae beantwoord het, het egter erken dat hulle nog nooit met dié wat hulle irriteer, daaroor gepraat het nie. “En met goeie rede”, sê die koerant. “Hulle kan net so skuldig wees.”
Meer mense woon in stede
“Binne twee jaar sal die helfte van die wêreldbevolking in stede woon”, sê CBC News. Volgens ’n verslag van die Verenigde Nasies het die Verenigde State die hoogste persentasie stadsbewoners, waar byna 9 uit 10 mense in ’n stad woon. Net 55 jaar gelede was New York en Tokio die enigste twee stede met tienmiljoen of meer inwoners. Vandag het daardie getal toegeneem tot 20 stede met meer as tienmiljoen inwoners, insluitende Djakarta, Mexikostad, Moembaai en São Paulo. Kofi Annan, die sekretaris-generaal van die VN, sê: “Hierdie vinnige groei sal grootskaalse ekonomiese en maatskaplike veranderinge in die meeste lande vereis.”
Gewetensbeswaar
Die Nasionale Komitee vir Menseregte van die Republiek van Korea sê dat gewetensbeswaar teen militêre diens ’n onvervreembare reg is. Die komitee het aanbeveel dat daar vir dié reg voorsiening gemaak moet word deur ’n alternatiewe burgerlike diens te skep. Die aanbeveling, sê The Korea Times, “is in stryd” met ’n onlangse beslissing deur die Konstitusionele Hof om die krygsreg te handhaaf, wat geen voorsiening maak vir gewetensbeswaar nie. Die Hooggeregshof het gesê dat die wetgewer, en nie die howe nie, hierdie reg in die wet moet vaslê. Jaarliks word tussen 500 en 700 jong mans wat Jehovah se Getuies is, in die Republiek van Korea tronk toe gestuur omdat hulle weier om militêre diens te doen. Oor die jare heen is sowat 10 000 Getuies om dieselfde rede opgesluit.