Massering vir babas?
DEUR ONTWAAK!-MEDEWERKER IN SPANJE
ANITA, ’n jong ma van Nigerië, bad haar baba en masseer haar dan sagkens. Ma sowel as baba geniet dit terdeë. “Dit is ’n tradisionele gebruik onder ma’s in Nigerië om hulle babas so te versorg”, verduidelik Anita. “My ma het my en my broers gemasseer. Massering is ’n uitstekende manier om ’n baba se spiere ferm te maak en hom ontspanne te laat voel. Terwyl ek my baba masseer, sing en praat ek met haar, en sy maak keelgeluidjies en glimlag vir my. Dit is ’n wonderlike ondervinding!”
Babamassering is algemeen in baie lande, en dit raak ook gewild in sekere Westerse lande. Volgens die Spaanse Vereniging vir Babamassering is massering ’n delikate, tere en aangename tegniek wat ’n ouer in staat stel om fisies en emosioneel met die baba te kommunikeer. Dit behels dat die baba se voete en bene sowel as sy rug, bors, maag, arms en gesig sagkens maar ferm gevryf word.
Hoe word ’n baba deur massering bevoordeel? In die eerste plek ervaar hy ’n gevoel van liefde en teerheid. ’n Pasgebore baba het nie net voedsel nodig nie, maar ook ouerliefde. Aangesien die tassin vroeg reeds ontwikkel, kommunikeer ligte massering deur die moeder of vader hierdie liefde op ’n tasbare manier. Baie inligting—fisies en emosioneel—kan aan ’n baba oorgedra word. Massering kan dus reeds van geboorte af help om ’n band van liefde tussen ouers en hulle baba te smee.
Buiten dat dit liefde uitdruk, kan massering ’n baba ook leer om te ontspan, wat hom kan help om langer en vaster te slaap en minder gespanne te wees. Massering kan ook help om spiere ferm te maak sowel as om die bloedsomloop-, vertering- en asemhalingstelsel te reguleer. Party mense beweer dat die baba se immuunstelsel ook bevoordeel word. En aangesien die baba se tassin, sig en gehoor gestimuleer word, kan massering ook die geheue en die leervermoë verbeter.
Party hospitale het ook al die waarde van babamassering ondersoek. In een studie is byvoorbeeld bevind dat vroeggebore babas wat gemasseer is, tot sewe dae vroeër uit die hospitaal ontslaan kon word in vergelyking met dié wat nie gemasseer is nie, en hulle het ook 47 persent meer gewig aangesit as laasgenoemdes.
Blykbaar is volwassenes nie die enigstes wat deur ’n goeie massering bevoordeel word nie! Vir babas is massering natuurlik meer as om net gevryf te word. Dit is liefde wat uitgedruk word deur warm hande en teer vingers, tesame met ’n groot glimlag.