Jongmense vra . . .

Wanneer kan ek met iemand begin uitgaan?

“Op skool voel jy asof jy net ’n halwe mens is as jy nie met iemand—enigiemand—uitgaan nie!”—Brittany.

“Daar word oral soveel druk op my geplaas om met iemand uit te gaan. En daar is soveel oulike ouens.”—Whitney.

◼ Jy sien ’n seun en meisie by die skool wat hand aan hand in die gang af loop terwyl hulle klasse wissel. Hoe voel jy?

□ Gee nie om nie

□ Effens jaloers

□ Baie jaloers

◼ Jy gaan fliek saam met vriende en besef dat almal daar is met ’n kêrel of ’n meisie—behalwe jy! Hoe voel jy?

□ Gee nie om nie

□ Effens jaloers

□ Baie jaloers

◼ Jou beste vriend(in) het onlangs belangstelling begin toon in iemand van die teenoorgestelde geslag en hulle gaan nou uit. Hoe voel jy?

□ Gee nie om nie

□ Effens jaloers

□ Baie jaloers

AS JY “effens jaloers” of “baie jaloers” gemerk het in antwoord op enige van die vrae hierbo, is jy nie alleen nie. In lande waar dit die gebruik is vir jongmense om verhoudings te hê, sal baie jongmense dieselfde antwoord. “Soms voel jy uitgesluit omdat al jou portuurs kêrels het en jy nie”, sê die 14-jarige Yvette.

Die begeerte om by iemand spesiaals te wees—en om by iemand te wees wat dink dat jy spesiaal is—kan ongelooflik sterk wees. “Die begeerte om ’n meisie te hê, word elke dag sterker, en dit is so moeilik om te hanteer!” sê een tienerseun. Sommige begin reeds op ’n vroeë ouderdom verhoudings aanknoop. ’n Opname wat deur die tydskrif Time gedoen is, het byvoorbeeld getoon dat 25 persent van die 13-jariges alreeds met iemand “uitgaan of in ’n verhouding is”. Dink jy dat hulle gereed was daarvoor? Is jy gereed om met iemand uit te gaan? Om dit te beantwoord, moet ons eers kyk na ’n eenvoudiger vraag.

Wat is “’n verhouding”?

◼ Jy gaan gereeld met ’n sekere persoon van die teenoorgestelde geslag uit.

Het julle ’n verhouding? □ Ja □ Nee

◼ Jy en een spesifieke vriend van die teenoorgestelde geslag SMS of bel mekaar etlike kere per dag.

Het julle ’n verhouding? □ Ja □ Nee

◼ Jy en iemand van die teenoorgestelde geslag het ’n geheime vriendskap. Jou ouers weet nie daarvan nie. Jy het hulle nie vertel nie, want jy weet hulle sal dit nie goedkeur nie.

Het julle ’n verhouding? □ Ja □ Nee

◼ Elke keer as jy by jou vriende kuier, paar jy af met dieselfde persoon van die teenoorgestelde geslag.

Het julle ’n verhouding? □ Ja □ Nee

Dit was waarskynlik vir jou geen probleem om die eerste vraag te beantwoord nie, maar jy het dalk ’n bietjie gehuiwer voordat jy die ander beantwoord het. Presies wat beteken dit om ’n verhouding met iemand te hê? In hierdie bespreking sal ons dit definieer as enige sosiale bedrywigheid waartydens jou romantiese belangstelling toegespits is op een spesifieke persoon en daardie persoon se romantiese belangstelling toegespits is op jou. Hetsy in ’n groep of alleen, hetsy oor die telefoon of van aangesig tot aangesig, hetsy in die openbaar of in die geheim, as jy en ’n vriend van die teenoorgestelde geslag ’n spesiale romantiese verstandhouding het, het julle ’n verhouding.

Maar is jy gereed om so iets aan te pak? Die volgende drie vrae sal jou help om uit te vind.

Wat is jou bedoelings?

Om met iemand uit te gaan, word in baie kulture beskou as ’n aanvaarbare manier waarop twee mense mekaar beter kan leer ken. Maar sulke verhoudings behoort ’n edele doel te hê—om ’n jong man en vrou te help om uit te vind of hulle geskikte huweliksmaats vir mekaar sal wees. Waarom?

Die Bybel gebruik die uitdrukking “bloei van die jeug” om die tydperk te beskryf wanneer seksuele drange en romantiese gevoelens sterk word (1 Korintiërs 7:36). As ’n mens baie assosieer met een spesifieke persoon van die teenoorgestelde geslag terwyl jy nog in “die bloei van die jeug” is, kan dit hierdie begeertes aanwakker en maak dat jy op die harde manier die wysheid leer van Galasiërs 6:7: “Wat ’n mens saai, dit sal hy ook maai.”

Dalk het van jou portuurs verhoudings al is hulle glad nie van plan om te trou nie. Hulle beskou hulle vriend van die teenoorgestelde geslag miskien bloot as ’n trofee of ’n bykomstigheid met wie hulle in die openbaar gesien wil word om hulle selfbeeld ’n hupstootjie te gee. Om so met iemand se gevoelens te speel, is gemeen, en dit is nie verbasend dat sulke verhoudings dikwels van korte duur is nie. “Baie jongmense wat uitgaan, verbreek ’n week of twee later weer die verhouding”, sê ’n jong meisie met die naam Heather. “Hulle begin verhoudings as iets tydeliks beskou—wat hulle in sekere sin eerder vir ’n egskeiding as vir die huwelik voorberei.”

Om net vir die pret af te paar of met iemand uit te gaan net om te kan sê dat jy ’n kêrel of ’n meisie het, kan maklik tot gekwetste gevoelens lei. Neem byvoorbeeld Eric, wat op 18-jarige ouderdom heel onskuldig met ’n meisie ’n verhouding gehad het wat volgens hom net ’n hegte vriendskap was. Toe besef hy dat die vriendskap vir haar meer beteken. “Sjoe! Ek was baie verbaas om te sien hoe vinnig sy ernstig geword het”, sê Eric. “Ek het regtig gedink ons is net vriende!”

Dit is natuurlik nie verkeerd om in groepsituasies waar daar gepaste toesig is, met persone van die teenoorgestelde geslag te assosieer nie. Maar dit is beter om te wag totdat jy verby die bloei van die jeug is en jy in ’n posisie is om ernstig aan trou te dink voordat jy met iemand begin uitgaan. Dit is wat ’n jong meisie met die naam Chelsea besef het. “’n Deel van my wil sê dat verhoudings net vir die pret moet wees”, erken sy, “maar dit is glad nie pret wanneer een persoon dit ernstig opneem en die ander nie.”

Hoe oud sê jy is jy?

◼ Op watter ouderdom dink jy is dit gepas vir ’n jongmens om ’n verhouding te hê? ․․․․․

◼ Vra nou een of albei van jou ouers dieselfde vraag, en vul hulle antwoord in. ․․․․․

Die eerste syfer wat jy neergeskryf het, is waarskynlik laer as die tweede. Of dalk nie! Jy is dalk een van die talle jongmense wat verhoudings wyslik uitstel totdat hulle oud genoeg is om hulleself beter te ken. Dit is wat ’n jong Christen met die naam Sondra besluit het om te doen, selfs al is sy volgens die wet oud genoeg om te trou. Sondra sê: “As ’n mens met iemand uitgaan, wil jy hê dat hy jou moet leer ken. Maar hoe kan jy verwag dat iemand anders jou moet leer ken, as jy jouself nie ken nie?”

Danielle, 17, voel dieselfde. Sy sê: “As ek dink aan wat ek twee jaar gelede in ’n potensiële maat sou gesoek het, verskil dit hemelsbreed van waarna ek nou sal soek. Om die waarheid te sê, vertrou ek myself nie eens op hierdie stadium om so ’n besluit te neem nie. Eers wanneer ek voel dat my persoonlikheid ’n paar jaar lank stabiel was, sal ek daaraan dink om ’n verhouding aan te knoop.”

Is jy gereed om te trou?

Aangesien ’n verhouding ’n trapklip is wat na die huwelik lei, sal dit verstandig wees om jou af te vra of jy die verantwoordelikheid van die getroude lewe—of selfs van vader- of moederskap—kan dra. Hoe weet ’n mens of jy gereed is daarvoor? Kyk na die volgende.

◼ Verhoudings Hoe behandel jy jou ouers en jou broers en susters? Verloor jy dikwels jou selfbeheersing met hulle, en gebruik jy dalk kwetsende of sarkastiese woorde om ’n punt te maak? Wat sal hulle oor jou sê in hierdie verband? Hoe jy teenoor gesinslede optree, is ’n aanduiding van hoe jy ’n huweliksmaat sal behandel.—Efesiërs 4:31, 32.

◼ Finansies Hoe goed werk jy met geld? Is jy altyd in die skuld? Kan jy ’n werk behou? Indien nie, waarom nie? Is dit as gevolg van die werk? Of die werkgewer? Of is dit omdat jy die een of ander ongewenste eienskap het? As jy nie jou eie finansies verantwoordelik kan behartig nie, hoe sal jy dit vir ’n gesin kan doen?—1 Timoteus 5:8.

◼ Geestelikheid As jy een van Jehovah se Getuies is, watter geestelike eienskappe het jy? Neem jy die inisiatief om God se Woord te lees, om in die bediening uit te gaan en om aan Christelike vergaderinge deel te neem? As jy nie jou eie geestelikheid in stand hou nie, hoe sal jy ’n huweliksmaat kan aanmoedig om dit te doen?—2 Korintiërs 13:5.

Dit is maar net ’n paar van die dinge wat jy in ag moet neem as jy dit oorweeg om ’n verhouding aan te knoop en te trou. Intussen kan jy in gepaste groepsituasies met persone van die teenoorgestelde geslag assosieer. As jy later besluit om met iemand uit te gaan, sal jy ’n beter idee hê van wie jy is en wat jy in ’n lewenslange huweliksmaat nodig het.

Nog artikels uit die reeks “Jongmense vra . . . ” kan gevind word op die webwerf www.watchtower.org/ype

IETS OM OOR TE DINK

◼ In watter gepaste situasies kan jy met persone van die teenoorgestelde geslag assosieer?

◼ Aan watter eienskap moet jy die hardste werk om ’n goeie huweliksmaat te wees?

[Venster/Prente op bladsy 28]

Wat party van jou portuurs sê

“Ek voel soms jaloers op paartjies wat uitgaan—selfs op getroude paartjies. Maar ’n mens gaan nie met iemand uit net vir die pret nie. As jy dit doen, is jy besig om met iemand se hart te speel. Ek dink dat die doel van ’n verhouding is om uit te vind of iemand werklik die persoon is met wie jy wil trou.”—Blaine, 17.

“Ek dink nie dat ’n mens met seuns moet uitgaan net om te ‘oefen’ vir wanneer jy iemand ontmoet van wie jy werklik hou nie. Dit sal net seergemaakte gevoelens veroorsaak.”—Chelsea, 17.

“Ek dink regtig dat ’n mens oud genoeg moet wees om te trou voordat jy begin uitgaan. Anders sal dit wees asof jy na ’n onderhoud gaan vir ’n voltydse werk terwyl jy nog op skool is en glad nie van plan is om die werk te aanvaar nie.”—Sondra, 21.

[Venster op bladsy 30]

’N WOORDJIE AAN OUERS

Julle kinders gaan beslis vroeër of later onder druk geplaas word om ’n kêrel of meisie te hê. “Ek hoef nie eens iets te doen nie!” sê Phillip. “Meisies vra my om uit te gaan, en dan dink ek: ‘O, wat gaan ek nou doen?’ Dit is moeilik om nee te sê, want party van hulle is baie mooi!”

Die beste ding wat julle as ouers kan doen, is om met julle tiener oor verhoudings te gesels. Gebruik gerus hierdie artikel as die grondslag vir ’n bespreking. Vind uit hoe jou seun of dogter voel oor die uitdagings waarvoor hy of sy by die skool en selfs in die Christengemeente te staan kom. Soms kan sulke gesprekke tydens informele geleenthede plaasvind, soos “wanneer jy in jou huis sit en wanneer jy op die pad loop” (Deuteronomium 6:6, 7). Wat die geleentheid ook al is, onthou om “gou [te] wees om te hoor, stadig om te praat”.—Jakobus 1:19.

As julle seun of dogter vir julle sê dat hy of sy in iemand van die teenoorgestelde geslag belangstel, moenie oorreageer nie. “Toe my pa uitvind dat ek ’n kêrel het, was hy verskriklik ontsteld!” sê een tienermeisie. “Hy het my probeer bangpraat deur my vrae te vra soos of ek reg is om te trou—en wanneer ’n mens jonk is, kan dit jou laat voel dat jy met die verhouding wil aangaan sodat jy jou ouers verkeerd kan bewys!”

As julle tiener weet dat die onderwerp taboe is, kan iets tragies gebeur: Hy of sy kan die verhouding in die geheim voortsit. “Wanneer ouers oorreageer”, sê een meisie, “maak dit net dat kinders die verhouding nog meer wil wegsteek. Hulle beëindig dit nie. Hulle doen net meer dinge agter hulle ouers se rug.”

Julle sal baie beter resultate verkry deur openlik daaroor te gesels. ’n Jong vrou van 20 sê: “My ouers het nog altyd baie openlik met my gesels oor verhoudings. Dit is vir hulle belangrik om te weet in wie ek belangstel, en ek dink dis goed! My pa sal met die persoon gesels. As daar iets is waaroor my ouers besorg is, sê hulle vir my. Gewoonlik besluit ek nog voordat ons begin uitgaan, dat ek nie belangstel nie.”

[Prent op bladsy 29]

Assosiasie met persone van die teenoorgestelde geslag in gepaste groepsituasies kan heilsaam en voordelig wees