Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g92 8/22 bl. 17-19
  • Wat is daarmee verkeerd om met mekaar te gesels?

Video nie beskikbaar nie.

Jammer, die video kon nie laai nie.

  • Wat is daarmee verkeerd om met mekaar te gesels?
  • Ontwaak!—1992
  • Onderhofies
  • Soortgelyke materiaal
  • Gesels of uitgaan?
  • Die gevaar van afsprake wanneer jy te jonk is
  • Hou wag oor jouself met denkvermoë
  • Wanneer kan ek met iemand begin uitgaan?
    Ontwaak!—2007
  • Kan ek al met iemand begin uitgaan?
    Vrae wat jongmense vra—Antwoorde wat werk, Deel 2
  • Sê nou my ouers dink ek is te jonk om afsprake te maak?
    Ontwaak!—2001
  • Tienerafsprake—Wat is fout daarmee?
    Ontwaak!—2001
Sien nog
Ontwaak!—1992
g92 8/22 bl. 17-19

Jongmense vra . . .

Wat is daarmee verkeerd om met mekaar te gesels?

‘ONS gaan nie uit nie, ons gesels net.’ Dit is hoe 17-jarige Denny sy verhouding met Tina beskryf.a Hulle het by ’n byeenkoms van Jehovah se Getuies ontmoet, en sedertdien gesels hulle gereeld lank met mekaar oor die telefoon. Denny erken dat hulle te jonk is om mekaar ernstig die hof te maak. Maar hy sien niks daarmee verkeerd as hulle net met mekaar gesels nie.

Baie jongmense wat nie deur hulle ouers toegelaat word om formeel afsprake te maak nie, word toegelaat om vriendskappe met die ander geslag aan te kweek deur gereelde gesprekke en telefoonoproepe. Onskuldige pret? Miskien. Maar party ouers is verontrus. “Dit lyk of hier ’n taamlike probleem is met besonder jong tieners wat met ander jong tieners verhoudings het”, skryf een besorgde ouer. “Hulle gaan nie uit nie, maar hulle beskou mekaar wel as kêrel en meisie.”

Ander jongmense kweek seun-meisie-verhoudings aan deur vir mekaar te skryf. Hierdie briewe is dalk niks meer as onskuldige blyke van vriendskap nie. Hulle word egter dikwels al hoe romantieser. Dit kan tot ’n romantiese verhouding lei wanneer ’n jongmens vir iemand begin skryf wat ’n slegte voorbeeld as Christen stel. Daar word dalk beweer dat die briefwisseling begin het as ’n opregte poging om so ’n persoon aan te moedig.

Gesels of uitgaan?

Die Bybel veroordeel dit nie as ’n mens met lede van die ander geslag gesels of vir hulle skryf nie. Christene is veronderstel om ‘die hele broederskap lief te hê’, en dit sluit portuurs van albei geslagte in (1 Petrus 2:17, NW). Die Bybel beveel jong mans voorts om “die jonger vroue soos susters, in alle eerbaarheid” te behandel (1 Timotheüs 5:2, NAV). Wanneer hierdie beginsel toegepas word, kan ’n jong man en vrou ’n skoon, opbouende verhouding geniet—ja, ’n vriendskap!

Maar jong Christene geniet gewoonlik sulke vriendskappe in groepsituasies. Wanneer twee jongmense mekaar dus vir buitengewone aandag uitsonder, begin die verhouding na ’n romanse, ’n hofmakery, lyk. Is dit noodwendig dieselfde as om afsprake te maak? Die meeste jongmense sou dit waarskynlik ontken. Maar tieners is nie altyd seker presies wat volwassenes met afsprake bedoel nie.

Toe een groep jongmense gevra is om afsprake te definieer, het meer as die helfte gesê dat dit beteken ‘om met iemand van die ander geslag uit te gaan’. Party het dit omskrywe as ‘om iemand beter te leer ken’. ’n Informele opname onder ’n groep jong Christene het soortgelyke resultate opgelewer. Een 13-jarige seun het gesê: “’n Afspraak is wanneer jy saam met ’n meisie gaan fliek, laat uitbly en dan saam met haar huis toe loop.”

’n Woordeboek definieer die woord “afspraak” as “’n reëling om iemand iewers te ontmoet”. In dié sin beteken dit egter dikwels ’n sosiale reëling tussen twee mense van die teenoorgestelde geslag. Kan dit nie gereelde gesprekke met iemand insluit nie? En wat van sulke gesprekke, of sosiale reëlings, oor die telefoon? ’n Jong man genaamd Ivan sê: “Dit is ’n soort afspraak, veral as jy ’n voorafbepaalde dag en tyd het om hierdie persoon te bel en die gesprek om persoonlike sake draai.”

Die boek The Family Handbook of Adolescence sê: “Kontak tussen seuns en meisies . . . word dikwels deur briewe en oor die telefoon bewerkstellig. Hierdie soorte kommunikasie word [deur jongmense] waardeer omdat dit intimiteit op ’n afstand moontlik maak.” Maar soos met enige vorm van afsprake kan ’n ernstige verhouding ontwikkel. Neem die geval van ’n jong man genaamd Jack. Toe hy in ’n jong vrou as ’n moontlike huweliksmaat begin belangstel het, het hy dikwels lank met haar oor die telefoon gesels. “’n Mens kan iemand oor die telefoon leer ken”, sê Jack. “Jy kan gedagtes en selfs gevoelens oor die telefoon oordra.” Jack en sy meisie het getrou. Baie paartjies het al die meeste van hulle afsprake deur telefoonoproepe en briewe gehad!

Die vraag is dus nie of ’n mens sê dat ’n paartjie net gesels, vir mekaar kuier of uitgaan nie, maar watter soort verhouding hulle aankweek. En wanneer ’n seun en meisie mekaar uitsonder, kan dit baie na ’n ontluikende romanse lyk. En baie keer lyk dit nie net so nie. Tienerskryfster Jane Rinzler verduidelik in haar boek Teens Speak Out: “As mense van mekaar hou . . . sal hulle mekaar begin opsoek. Dit sal waarskynlik begin deurdat hulle mekaar, miskien een keer, miskien ’n paar keer, bel.”

Die gevaar van afsprake wanneer jy te jonk is

Dit is nou wel nie verkeerd dat twee mense ’n romantiese verhouding aanknoop as hulle oud genoeg is om te trou nie. Maar min tienerpaartjies dink aan trou. Volgens die boek Adolescent Development deur Barbara en Philip Newman gaan tieners met mekaar uit bloot as ’n “vorm van ontspanning”, om ‘status te verwerf’ onder ander jongmense en om te “leer van die ander geslag”.

Maar wat Christene betref, is die huwelik heilig, eerbaar (Hebreërs 13:4). Hofmakery in enige vorm is dus ’n ernstige saak—nie ’n speletjie nie. En wanneer ’n mens te jonk is om te trou, kan ’n hegte verhouding met ’n lid van die ander geslag alte maklik op verbittering en verdriet uitloop. Die Bybel stel dit so: “Kan iemand vuur in sy skoot dra sonder dat sy klere verbrand?”—Spreuke 6:27.

Toe Maria 13 jaar oud was, het sy met telefoonafsprake begin eksperimenteer. Aanvanklik was dit pret. Maar aangesien sy nie oud genoeg was om te trou nie, het hierdie soort afsprake haar net teleurgestel en gefrustreer. “’n Uitgestelde hoop maak die hart siek”, sê Spreuke 13:12. Sy moes ook spanning verduur omdat sy haar afsprake vir haar ouers weggesteek het. “Elke keer as die telefoon gelui het, was ek bang dat iemand anders—veral my ma—dit sou antwoord. Ek het verleë gevoel wanneer sy gevra het: ‘Wie praat?’ en die telefoon dan neergesit het omdat daar geen antwoord was nie.”

Daar is selfs risiko’s verbonde aan briefskrywery. Charlene het byvoorbeeld sterk gevoelens vir ’n ongelowige ontwikkel. Sy erken: “Ek het aan hom begin skryf, en ons het meer as blote vriende geword. Hy is ’n alkoholis, maar ek doen my bes om hom te help. Dink julle daar is enige hoop dat hy minder sal drink?” Charlene se pogings om vir ’n alkoholis raadgewer te speel is egter onverstandig en sal waarskynlik nie slaag nie. Sy kan maklik in ’n rampspoedige huwelik beland.b—2 Korinthiërs 6:14.

Hou wag oor jouself met denkvermoë

Goeie raad word in Spreuke 2:10, 11 gegee: “Wanneer wysheid in jou hart inkom en kennis vir jou siel aangenaam word, sal denkvermoë oor jou wag hou, onderskeidingsvermoë sal jou bewaak” (NW). Jongmense laat dikwels toe dat hulle emosies hulle besluite rig. Maar deur denkvermoë en onderskeidingsvermoë te gebruik, kan jy baie doen om ‘verdriet uit jou hart te weer, en die kwale van jou liggaam weg te hou’.—Prediker 11:10.

Onderskeidingsvermoë help jou om te besef dat jy in “die bloei van die jeug” is, ’n tyd wanneer seksuele gevoelens en romantiese emosies sterk is (1 Korinthiërs 7:36, NW). Noue omgang met ’n lid van die ander geslag—of dit persoonlik, oor die telefoon of selfs per brief is—is geneig om die vuur van hartstog aan te blaas. Waarom wil jy dan iemand vir buitengewone aandag uitsonder? Jy wil weliswaar leer hoe om teenoor die ander geslag op te tree. Maar ’n mens kan dit gewoonlik doen deur die omgang van die ander geslag in groepsituasies te geniet. Selfs dan moet ’n mens jou nie tot ’n klein vriendekring beperk nie. “Word verruim” in jou omgang (2 Korinthiërs 6:13). Sodoende sal jy die kanse verminder dat jy by ’n romantiese verhouding betrokke sal raak.

Beteken dit dat jy nooit met ’n lid van die ander geslag oor die telefoon kan praat of vir hom of haar ’n brief kan skryf nie? Nee. Die gevaar ontstaan wanneer jy ’n emosionele gehegtheid aan een mens vorm. Maar pasop dat jy nie iemand seermaak of self seerkry nie. En as romantiese gevoelens ten spyte van die beste bedoelings begin ontwikkel, sal jy dalk die vriendskap moet beëindig.

Dit sal dalk ook help om die saak met ’n vertroude volwassene, soos een van jou ouers, te bespreek (Spreuke 23:26). Aanvanklik sal jy dalk aarsel of verleë voel om oor jou gevoelens te praat. Maar jou ouers sal jou gevoelens dalk beter verstaan as wat jy dink.

Dit sal dalk jare duur voordat jy gereed is om ’n romantiese belangstelling in ’n lid van die ander geslag te ontwikkel. Intussen kan jy, deur versigtig te wees en ’n onselfsugtige belangstelling in ander te toon, gebalanseerde verhoudings met die ander geslag geniet.

[Voetnote]

a Sien hoofstuk 30 van Vrae wat jongmense vra—Antwoorde wat werk, uitgegee deur die Watchtower Bible and Tract Society of New York, Inc.

b Party name is verander.

[Prente op bladsy 18]

Kan ’n telefoonoproep as ’n afspraak beskou word?

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel