Hoe beskou jy onthoudingsbeloftes?

IN ONLANGSE jare het beloftes van maagdelikheid of onthouding, soos: “Geen seks voordat ek trou nie”, gewild geword onder jongmense. Hierdie beloftes weerspieël prysenswaardige doelwitte en is in ooreenstemming met Bybelgebooie (1 Korintiërs 6:18; Efesiërs 5:5). Die waarde van hierdie beloftes is egter te betwyfel. Volgens een opname het sowat 60 persent van tieners hulle belofte binne ’n jaar verbreek.

Daarbenewens is daar kommer oor presies hoe sommige jongmense “onthouding” en “maagdelikheid” definieer. Charlene C. Giannetti en Margaret Sagarese het in hulle boek Boy Crazy! geskryf: “Deskundiges het al die toename van orale seks, en selfs anale seks, verbind aan kinders wat ‘tegnies gesproke’ maagde wil bly. Vir hulle is enigiets wat nie geslagsomgang is nie, nie seks nie.”

Blykbaar is hierdie beskouing baie algemeen. Nadat een skrywer onderhoude met meer as ’n duisend tieners gevoer het, het hy gesê: “Dit het gelyk asof daar dalk een of twee uit ’n honderd was wat orale seks as seks beskou.” Hy het bygevoeg: “Jy moet besef dat jou tiener—en selfs jou jonger kinders—waarskynlik so daaraan dink.”

Diegene wat Bybelstandaarde aankleef, besef dat orale seks en anale seks—soos hulle name duidelik maak—seks is. Die Bybelgebod om jou ‘van hoerery te onthou’ (“heeltemal vry van geslagsonsedelikheid te wees”, Today’s English Version) sluit alle vorme van ongeoorloofde geslagsomgang in.—1 Tessalonisense 4:3.