Ons beskou die wêreld
◼ “Die feit dat televisieprogramme dag en nag ononderbroke uitgesaai word, baie gesinne nie meer saam eet nie en selfs die feit dat [stootwaentjies] ontwerp word om vorentoe te kyk”, belemmer kommunikasie tussen kinders en ouers. Een gevolg hiervan is dat kinders wat skool begin, “woedeuitbarstings kry” wanneer hulle hulle nie kan uitdruk nie.—THE INDEPENDENT, BRITTANJE.
◼ In Spanje word 23 persent van kinders buite die huwelik gebore. In Frankryk is dit 43 persent; Denemarke 45 persent; en in Swede 55 persent.—INSTITUTO DE POLÍTICA FAMILIAR, SPANJE.
◼ ’n Derde van alle Britte slaap minder as vyf uur elke aand, wat hulle vatbaar maak vir “swak konsentrasie, vergeetagtigheid [en] gemoedswisselinge”. ’n Slaaptekort kan ook die “risiko van vetsug, suikersiekte, depressie, egskeidings en ernstige motorongelukke” verhoog.—THE INDEPENDENT, BRITTANJE.
Geweld “net om die tyd te verdryf”
“Daar is al hoe meer gevalle van minderjariges wat mense aanrand en verneder en die voorvalle met hulle selfone op video opneem”, sê die Spaanse koerant El País. Party slagoffers herstel nooit ná hierdie verskriklike aanrandings nie. Waarom pleeg jongmense hierdie misdade? “Hulle doen dit nie om te steel of weens rassisme of omdat hulle aan ’n bende behoort nie. Hulle doen dit—en dít is die nuwe sy van hierdie misdade wat dit so ontstellend maak—net om die tyd te verdryf”, verduidelik die tydskrif XL. “Soms is hulle dronk en soms nie”, sê Vicente Garrido, ’n sielkundige wat in kriminologie spesialiseer. “Maar die een ding wat hulle in gemeen het, is ’n gebrek aan berou.”
Min belangstelling in tropiese siektes
Die meeste tropiese siektes word deur mediese navorsers afgeskeep. Waarom? “Die droewige situasie is dat . . . die farmaseutiese bedryf nie [nuwe behandelings] probeer ontwikkel nie”, sê Michael Ferguson, ’n molekulêre bioloog van die Universiteit van Dundee, Skotland. Daar is geen finansiële aansporing vir farmaseutiese maatskappye om dit te doen nie, aangesien dit glad nie ’n verhaalbare belegging is nie. Hierdie maatskappye sal eerder medisyne met ’n hoë winsgrens vervaardig vir toestande soos Alzheimer se siekte, vetsug en impotensie. Intussen, sê die tydskrif New Scientist, “sterf daar elke jaar [ongeveer] eenmiljoen mense regoor die wêreld weens malaria, terwyl dit nog net so moeilik as ooit is om veilige en doeltreffende behandelings te vind”.
Jong “verbruikers”
Volgens die La Sapienza-universiteit in Rome, Italië, kan driejariges reeds tussen verskillende handelsname onderskei, en teen agtjarige ouderdom word hulle “verbruikers”. TV-advertensies speel ’n groot rol in hulle lewe en maak van hulle klein “diktators”, wat daarop aandring dat hulle ouers sekere produkte koop, sê La Repubblica. “Die gevaar is”, sê die koerant, dat kinders “op die ou end in ’n wêreld lewe en glo wat nie werklik is nie, waarin hulle alles moet hê wat aangebied (en gekoop) word.”
“Swanger” mannekyn
Werklike pasiënte is nog altyd gebruik in die opleiding van kraamsorgpersoneel. Maar nou, sê ’n berig deur Associated Press, word ’n “robot-geboortenabootser”, genaamd Noelle, “al hoe gewilder”. Die “swanger” mannekyn het nie net ’n realistiese pols en ’n serviks wat kan verwyd nie, maar sy kan ook geprogrammeer word om ’n aantal komplikasies na te boots en om ’n redelik vinnige of ’n uitgerekte bevalling te hê. Die “baba” waaraan Noelle geboorte gee, kan ’n gesonde pienk kleur of ’n dodelike blou kleur hê, wat op ’n suurstoftekort dui. Waarom word ’n mannekyn vir opleiding gebruik? “Dis beter om ’n fout op ’n robot te maak wat $20 000 [R140 000] kos, as op ’n werklike pasiënt”, verduidelik die berig.