’n Majestueuse monoliet

DEUR ONTWAAK!-MEDEWERKER IN KANADA

VISSERMANNE en seevaarders gebruik dit al eeue lank as ’n betroubare landmerk. Digters, skrywers en kunstenaars het dit verewig. Een bron beskryf hierdie monoliet as “raaiselagtig en fassinerend”. Aan die oostelike punt van die Gaspé-skiereiland in die Golf van St. Lawrence staan die majestueuse Percé-rots in die vonkelende blou water van die Atlantiese Oseaan. Die rots is sowat 430 meter lank, ongeveer 90 meter breed en byna 90 meter hoog.

Vroeër het waaghalsige plaaslike inwoners teen die rotswand opgeklim om eiers uit voëlneste te haal. Maar in 1985 het die Quebecregering Percé-rots en die nabygeleë Bonaventure-eiland tot voëlreservate verklaar om die rots sowel as die voëls wat daar toevlug soek, te beskerm. Bonaventure-eiland voorsien ’n veilige houplek vir die tweede grootste broeikolonie van seeganse ter wêreld.

Sommige beweer dat Percé-rots lank gelede deel van die vasteland was en dat daar moontlik tot vier boogvormige openinge in die rots was. Maar vandag is daar net een—wat meer as 30 meter wyd is—aan die seekant van die rots. By laagwater is daar ’n sandbank wat van die rots tot by die vasteland strek. Gedurende ’n tydperk van om en by vier uur kan die dapperes tot reg aan die voet van die rots loop en dan ongeveer 15 minute lank met ’n bietjie moeite deur die water langs die rots loop om die boog te bereik.

Vir dié avontuurlustige besoekers is daar egter ’n waarskuwing. Een toeris wat oor die yslike rotse geklouter het om by die opening uit te kom, sê: “Elke paar minute hoor jy ’n skrikwekkende ‘woesj’-geluid wanneer rotse soos klein bomme in die water val. Party rotse val op mekaar, en dit klap soos ’n geweerskoot.”

Soos baie besoekers kan getuig, is Percé-rots se skoonheid asemrowend. Maar dit is slegs ’n voorbeeld van die talle pragtige natuurtonele wat ’n mens op ons fassinerende aarde kan sien. Hoe uiteenlopend en talryk is dit tog! Dalk het dit jou ook al beweeg om ‘stil te staan en ag te gee op die wonderlike werke van God’.—Job 37:14.

[Foto-erkenning op bladsy 23]

© Mike Grandmaison Photography ▸