Jongmense vra . . . 

Is hierdie persoon reg vir my?

Neem ’n oomblik om die volgende vrae te beantwoord:

Watter eienskappe beskou jy tans as noodsaaklik in ’n potensiële huweliksmaat? Merk die vier eienskappe wat jy dink die belangrikste is, met ’n ✔ op die lysie hieronder.

․․․․․ aantreklik

․․․․․ geestelikgesind

․․․․․ vriendelik

․․․․․ betroubaar

․․․․․ gewild

․․․․․ sedelik onberispelik

․․․․․ snaaks

․․․․․ doelgerig

Was jy ooit verlief op iemand toe jy jonger was? Merk die eienskap wat jy op daardie stadium die aantreklikste in die persoon gevind het, met ’n X op die lysie hierbo.

DAAR is niks met enige van die bogenoemde eienskappe verkeerd nie. Elkeen is aantreklik op sy eie manier. Maar sal jy nie saamstem dat ’n mens, wanneer jy smoorverlief is, geneig is om te konsentreer op die meer oppervlakkige eienskappe, soos dié in die linkerkantste kolom nie?

Maar wanneer jy meer volwasse word, begin jy jou onderskeidingsvermoë gebruik en kyk na belangriker eienskappe, soos dié in die regterkantste kolom. Jy begin byvoorbeeld besef dat die oulikste meisie in die buurt dalk nie betroubaar is nie of dat die gewildste seun in die klas dalk nie goeie sedes het nie. As jy “verby die bloei van die jeug” is—die tyd van jou lewe wanneer seksuele begeertes sterk begin word—kyk jy heel waarskynlik verder as die oppervlakkige eienskappe om die vraag te beantwoord: Is hierdie persoon reg vir my?—1 Korintiërs 7:36.

Is sommer enigeen die regte een?

Met verloop van tyd sal meer as net ’n paar lede van die teenoorgestelde geslag dalk jou oog vang. Maar nie sommer enigeen is die regte een nie. Jy wil immers ’n lewensmaat hê, iemand wat die beste in jou na vore sal bring en vir wie jy dieselfde sal doen (Matteus 19:4-6). Wie sal daardie persoon wees? Voordat jy hierdie vraag kan beantwoord, moet jy ‘in die spieël kyk’ en ’n eerlike selfondersoek doen.—Jakobus 1:23-25.

Beantwoord die volgende vrae om meer oor jouself uit te vind:

Wat is my sterk punte?

․․․․․

Wat is my swak punte?

․․․․․

Watter emosionele en geestelike behoeftes het ek?

․․․․․

Om jouself te leer ken, is beslis nie maklik nie, maar vrae soos hierdie kan jou help om ’n begin daarmee te maak.a Hoe beter jy jouself verstaan, hoe beter toegerus sal jy wees om iemand te vind wat jou sterk punte eerder as jou swak punte na vore sal bring. Maar sê nou jy dink jy het reeds iemand gevind wat reg is vir jou?

Sal hierdie verhouding werk?

Om daardie vraag te beantwoord, moet jy objektief na jou vriend kyk. Maar wees versigtig! Jy sal dalk geneig wees om net te sien wat jy wil sien. Gee jouself dus genoeg tyd. Probeer om te onderskei watter soort persoon jou vriend werklik is.

Baie mense wat met mekaar uitgaan, kyk nie dieper as die oppervlak nie. Hulle is eerder gou om te wys op die dinge wat hulle in gemeen het: ‘Ons hou van dieselfde musiek.’ ‘Ons hou daarvan om dieselfde dinge te doen.’ ‘Ons stem oor alles saam!’ Maar soos vroeër genoem is, sal jy verder as oppervlakkige eienskappe kyk as jy werklik verby die bloei van die jeug is. Jy moet “die geheime persoon van die hart” onderskei.—1 Petrus 3:4; Efesiërs 3:16.

Byvoorbeeld, eerder as om te konsentreer op hoe dikwels julle oor dinge saamstem, sal dit dalk insiggewender wees om te kyk wat gebeur wanneer julle nie saamstem nie. Met ander woorde, hoe hanteer hierdie persoon konflik—deur daarop aan te dring om sy of haar sin te kry en miskien toe te gee aan “vlae van toorn” of “smadende taal”? (Galasiërs 5:19, 20; Kolossense 3:8). Of lê hierdie persoon redelikheid aan die dag—’n gewilligheid om ter wille van vrede toe te gee wanneer dit nie ’n saak van reg of verkeerd is nie?—Jakobus 3:17.

Nog ’n faktor om in ag te neem: Is die persoon manipulerend, dominerend of jaloers? Dring hy of sy daarop aan om alles te weet wat jy doen? “Besitlikheid en jaloesie is gevaartekens”, sê ’n jong vrou genaamd Nicole. “Ek weet van paartjies wat baklei omdat die een dit nie kan verdra dat die ander nie voortdurend ‘gerapporteer het’ waar hy of sy is nie—ek dink dis ’n slegte teken.”

Hoe beskou ander jou kêrel of meisie? Jy kan met mense praat wat hierdie persoon al ’n ruk ken, soos volwasse persone in sy of haar gemeente. Hulle sal vir jou kan sê of hierdie persoon “gunstig vermeld” word.—Handelinge 16:1, 2.b

Moet jy die verhouding beëindig?

Sê nou jy besef dat die persoon met wie jy uitgaan nie ’n geskikte huweliksmaat sal wees nie? In daardie geval sal dit heel moontlik verstandig wees om die verhouding te beëindig. Die Bybel sê: “Skerpsinnig is die een wat die rampspoed gesien en hom verberg het.”—Spreuke 22:3.c

Mettertyd sal jy dalk ’n nuwe verhouding begin. Indien wel, sal jy ongetwyfeld ’n selfs meer gebalanseerde uitkyk hê—een wat jy deur ondervinding verkry het. Dan sal jou antwoord op die vraag “Is hierdie persoon reg vir my?” dalk ja wees!

[Voetnote]

Nog artikels uit die reeks “Jongmense vra . . . ” kan gevind word op die webwerf www.watchtower.org/ype

IETS OM OOR TE DINK

◼ Watter positiewe eienskappe sal jy as ’n huweliksmaat hê?

◼ Wat is van die eienskappe waarna jy in ’n huweliksmaat soek?

◼ Op watter maniere kan jy meer uitvind omtrent die geaardheid, gedrag en reputasie van iemand met wie jy uitgaan?

[Venster op bladsy 19]

Sal hy ’n goeie man wees?

BASIESE EIENSKAPPE

❑ Hoe oefen hy sy gesag uit?—Matteus 20:25, 26.

❑ Wat is sy doelwitte?—1 Timoteus 4:15.

❑ Streef hy tans daardie doelwitte na?—1 Korintiërs 9:26, 27.

❑ Wie is sy vriende?—Spreuke 13:20.

❑ Wat is sy gesindheid teenoor geld?—Hebreërs 13:5, 6.

❑ Van watter soort vermaak hou hy?—Psalm 97:10.

❑ Wat sê sy kleredrag omtrent hom?—2 Korintiërs 6:3.

❑ Hoe toon hy sy liefde vir Jehovah?—1 Johannes 5:3.

NOG POSITIEWE EIENSKAPPE

❑ Is hy hardwerkend?—Spreuke 6:9-11.

❑ Is hy finansieel verantwoordelik?—Lukas 14:28.

❑ Het hy ’n goeie reputasie?—Handelinge 16:1, 2.

❑ Eer hy sy ouers?—Eksodus 20:12.

❑ Is hy bedagsaam teenoor ander?—Filippense 2:4.

GEVAARTEKENS

❑ Word hy gou kwaad?—Spreuke 22:24.

❑ Probeer hy jou by seksuele wangedrag betrek?—Galasiërs 5:19.

❑ Maak hy hom skuldig aan fisiese of verbale mishandeling?—Efesiërs 4:31.

❑ Moet hy alkohol gebruik wanneer hy ontspan?—Spreuke 20:1.

❑ Is hy jaloers en selfsugtig?—1 Korintiërs 13:4, 5.

[Venster op bladsy 20]

Sal sy ’n goeie vrou wees?

BASIESE EIENSKAPPE

❑ Hoe toon sy onderdanigheid in die gesin en die gemeente?—Efesiërs 5:21, 22.

❑ Wat sê haar kleredrag omtrent haar?—1 Petrus 3:3, 4.

❑ Wie is haar vriende?—Spreuke 13:20.

❑ Wat is haar gesindheid teenoor geld?—1 Johannes 2:15-17.

❑ Wat is haar doelwitte?—1 Timoteus 4:15.

❑ Streef sy tans daardie doelwitte na?—1 Korintiërs 9:26, 27.

❑ Van watter soort vermaak hou sy?—Psalm 97:10.

❑ Hoe toon sy haar liefde vir Jehovah?—1 Johannes 5:3.

NOG POSITIEWE EIENSKAPPE

❑ Is sy hardwerkend?—Spreuke 31:17, 19, 21, 22, 27.

❑ Is sy finansieel verantwoordelik?—Spreuke 31:16, 18.

❑ Het sy ’n goeie reputasie?—Rut 4:11.

❑ Eer sy haar ouers?—Eksodus 20:12.

❑ Is sy bedagsaam teenoor ander?—Spreuke 31:20.

GEVAARTEKENS

❑ Is sy twisgierig?—Spreuke 21:19.

❑ Probeer sy jou by seksuele wangedrag betrek?—Galasiërs 5:19.

❑ Maak sy haar skuldig aan fisiese of verbale mishandeling?—Efesiërs 4:31.

❑ Moet sy alkohol gebruik wanneer sy ontspan?—Spreuke 20:1.

❑ Is sy jaloers en selfsugtig?—1 Korintiërs 13:4, 5.