Nie meer verslaaf aan alkohol nie

Die matige gebruik van alkohol kan ’n ete komplementeer of tot die vrolikheid van ’n viering bydra. Maar vir party mense veroorsaak die gebruik van alkohol ernstige probleme. Kyk na die volgende verhaal van ’n man wat dit reggekry het om die kettings van alkoholmisbruik te verbreek.

DIT is nou nog vir my moeilik om te praat oor die gespanne atmosfeer wat in ons huis geheers het. My pa en ma sou begin drink. Dan het my pa my ma geslaan. Dikwels het hy my met vlieënde vuiste te lyf gegaan. Ek was net vier jaar oud toe hulle besluit het om uitmekaar te gaan. Ek onthou dat ek na my ouma se huis geneem is om daar te bly.

Ek het gevoel asof niemand my wou hê nie. Toe ek sewe was, het ek stilletjies afgesluip na die kelder om tuisgemaakte wyn te drink, wat my minder hartseer laat voel het. Op 12-jarige ouderdom het my ma en my ouma ’n heftige argument oor my gehad. My ma het so woedend geword dat sy my met ’n hooivurk gegooi het. Ek kon darem uit die pad spring! Dit was nie die enigste keer dat my lewe in gevaar was nie. Die letsels op my liggaam was egter nie so diep soos die emosionele letsels wat diep in my binneste verberg was nie.

Teen die tyd dat ek 14 was, was ek heeltyd aan die drink. Uiteindelik, toe ek 17 was, het ek van die huis af weggeloop. Drank het my ’n gevoel van onafhanklikheid gegee, en ek het baie aggressief geraak en het amok gemaak in die plaaslike kroeë. Drank was my enigste genot in die lewe. In slegs een dag sou ek tot vyf liter wyn, ’n paar biere en ook sterk drank drink.

Toe ek getrou het, het my drinkery groot probleme vir my vrou veroorsaak. Gegriefdheid en bitterheid het toegeneem, en ek het haar en die kinders geslaan, wat weer die vernietigende atmosfeer geskep het waarin ek grootgeword het. Amper al die geld wat ek verdien het, het ek aan alkohol uitgegee. Ons het geen meubels gehad nie, en ek en my vrou het op die vloer geslaap. Ek het nie rede gehad om te lewe nie en het geen poging aangewend om ons situasie te verbeter nie.

Op ’n dag het ek met een van Jehovah se Getuies gepraat. Ek het gevra waarom daar soveel lyding is, en die Getuie het vir my God se belofte van ’n wêreld sonder probleme in die Bybel gewys. Dit het my oortuig om die Bybel saam met die Getuies te begin studeer. Namate ek Bybelleringe toegepas het en minder gedrink het, het ons gesinslewe grootliks verbeter. Maar ek het besef dat ek my drankprobleem sou moes oorkom as ek Jehovah God op ’n aanvaarbare manier wou dien. Ná ’n stryd van drie maande het ek heeltemal opgehou om alkohol te drink. Ses maande later het ek my lewe aan God toegewy en dit gesimboliseer deur gedoop te word.

Omdat ek my slawerny aan alkohol oorkom het, kon ek my skuld afbetaal. Ek het later ’n huis sowel as ’n motor gekoop, wat ons gebruik om Christelike vergaderinge by te woon en aan die huis-tot-huis-predikingswerk deel te neem. Uiteindelik het ek selfrespek gekry.

Soms word ek by ’n geselligheid ’n drankie aangebied. Baie mense weet nie watter ontsaglike stryd ek voer nie en dat net een drankie genoeg sal wees om my weer in my ou weë te dompel. Ek het nog ’n begeerte na alkohol. Dit vereis vurige gebed en vasberadenheid om die krag te hê om nee te sê. Wanneer ek dors is, drink ek soveel as wat ek kan van enigiets wat nie alkohol bevat nie. Ek het die afgelope tien jaar nie eers een drankie gedrink nie.

Jehovah kan doen wat die mens nie kan doen nie. Hy het my gehelp om ’n vryheid te geniet wat ek nooit gedink het moontlik is nie! Ek ly nog steeds as gevolg van die emosionele letsels van my kinderjare, en ek het ’n voortdurende stryd teen negatiewe denke. Aan die positiewe kant is ek geseën met ’n goeie verhouding met God, ’n gemeente van ware vriende en ’n wonderlike gesin wat dieselfde geloofsoortuiging as ek het. My vrou en kinders ondersteun my heelhartig in my stryd teen alkohol. My vrou sê: “Voorheen was my lewe ondraaglik. Vandag is ek baie dankbaar teenoor Jehovah dat ek ’n gelukkige gesinslewe saam met my man en twee kinders kan geniet.”—Bygedra.

[Lokteks op bladsy 21]

Teen die tyd dat ek 14 was, was ek heeltyd aan die drink

[Lokteks op bladsy 22]

Jehovah kan doen wat die mens nie kan doen nie

[Venster op bladsy 22]

DIE BYBEL EN ALKOHOL

◼ Die Bybel veroordeel nie die gebruik van alkohol nie. Dit beskryf “wyn wat die hart van die sterflike mens vrolik maak”, as ’n gawe van God aan die mensdom (Psalm 104:14, 15). Die Bybel verwys ook na die wingerdstok as ’n simbool van voorspoed en veiligheid (Miga 4:4). Trouens, die eerste wonderwerk wat Jesus Christus verrig het, was om water in wyn te verander by ’n huweliksfees (Johannes 2:7-9). En toe die apostel Paulus gehoor het van Timoteus se “herhaalde gevalle van siekte”, het hy voorgestel dat Timoteus “’n bietjie wyn” drink.—1 Timoteus 5:23.

◼ Wat die Bybel wel veroordeel, is die oormatige gebruik van alkohol:

“Dronkaards . . . sal nooit die koninkryk van God beërf nie.”—1 Korintiërs 6:9-11, “The Jerusalem Bible”.

“Moenie dronk word van wyn, waarin daar losbandigheid is nie.”—Efesiërs 5:18.

“Wie het weë? Wie het ongerustheid? Wie het twiste? Wie het besorgdheid? Wie het wonde sonder rede? Wie het dofheid van oë? Dié wat lank by die wyn bly, dié wat inkom om gemengde wyn te soek. Moenie na wyn kyk wanneer dit ’n rooi kleur het, wanneer dit in die beker vonkel, wanneer dit glad afgly nie. Op die ou end byt dit soos ’n slang, en dit skei gif af soos ’n adder. Jou oë sal vreemde dinge sien, en jou hart sal verdorwe dinge spreek.”—Spreuke 23:29-33.

Soos in die bygaande artikel getoon is, het party wat probleme met alkohol gehad het, die verstandige besluit geneem om hulle heeltemal daarvan te onthou.—Matteus 5:29.