Van ons lesers
’n Kind se geloof (Augustus 2006) Ek sien uit na die tyd wanneer Dustin, en miljoene ander wat gesterf het, met jeugdige krag sal kan hardloop en spring in die nuwe wêreld wat binnekort hier sal wees.
A. A., Sri Lanka
Dustin se geloof en onverskrokke moed het my diep geraak. Sy ondervinding het my gehelp om te evalueer hoe belangrik die waarheid in my lewe is en om my prioriteite in orde te kry. Ek besef nou dat ’n goeie verhouding met Jehovah en Koninkryksbelange voorkeur in my lewe moet geniet.
M.C.V., Brasilië
Dustin se motiverende, positiewe gesindheid teenoor die waarheid het my hart geroer. Sy dade het getoon dat hy Jehovah wou behaag en ander wou dien. Soos Dustin, wil ek ook ‘die wedloop enduit hardloop en die geloof bewaar’!
M. N., Japan
Ek is sewe jaar oud. Dankie vir hierdie ondervinding. Ek is beïndruk deur Dustin se sterk geloof in Jehovah, al het hy ’n ernstige siekte gehad. Sy voorbeeld het my aangemoedig om meer vir God te doen.
T. D., Italië
Fassinerende patrone in plante (September 2006) Hierdie artikel het my ’n hele uur en ’n half geboei! Dit was so leersaam! Ek het ’n paar diagramme geteken sodat ek dit beter kon verstaan. Maar let asseblief daarop dat die breukdeel 13/21 nie die goue verhouding van die sirkel akkuraat weergee nie, maar eerder van die oorblywende verhouding van 222,5 grade.
L. C., Verenigde State
“Ontwaak!” antwoord: ’n Hele paar lesers het tereg uitgewys dat die goue verhouding van ’n omwenteling ongeveer 222,5 grade is. Waarom het ons artikel dan gesê dat die goue hoek 137,5 grade is—dieselfde hoek antikloksgewys gemeet? Die webwerf MathWorld sê: “Die goue hoek is die hoek wat ’n omwenteling [360°] in ’n goue verhouding verdeel (maar wat in die teenoorgestelde rigting gemeet word sodat dit minder as 180° is).” Die Britse wiskundige dr. Ron Knott verduidelik waarom wiskundiges en wetenskaplikes die goue hoek so uitdruk en sê: “Ons is geneig om die kleiner hoek ‘raak te sien’.” Hoewel die goue verhouding dus omtrent 13/21 (meer as die helfte) is, word die goue hoek gewoonlik as 137,5 grade (minder as die helfte) uitgedruk.
“Opgesluit weens hulle geloof” (April 2006) Ek is nie een van Jehovah se Getuies nie, maar ek het nogtans die grootste respek vir die lede van julle geloof. Ek het baie Getuies ontmoet terwyl ek in die konsentrasiekampe Gross-Rosen en Buchenwald was. Hulle gedrag was so voorbeeldig en hulle gods- diensoortuigings so uitsonderlik dat al die ander gevangenes hulle gerespekteer en bewonder het. Selfs die SS is deur hulle beïndruk. Jehovah se Getuies sal altyd by my huis welkom wees.
P. V., Verenigde State