Ons beskou die wêreld
◼ Die jaar 2006 “sal heel moontlik die sesde warmste jaar wees wat al opgeteken is”. Die tien warmste jare het almal binne die afgelope 12 jaar voorgekom.—WÊRELD- METEOROLOGIESE ORGANISASIE.
◼ Beijing se Buro vir Openbare Veiligheid het ’n beleid van “een hond” per huishouding afgekondig in ’n poging om hondsdolheid te bekamp. In 2004 het sowat 2 660 mense in China aan hondsdolheid gesterf.—XINHUA ONLINE, CHINA.
◼ Hotelgaste wat aan deurknoppe, lampe, telefone en TV-afstandbeheerders in hotelkamers raak, het ’n “50%-kans om met ’n verkouevirus besmet te word”.—MACLEAN’S, KANADA.
Hoeveel insekte in die Amasone?
Entomoloë—dierkundiges wat insekte bestudeer—het tot dusver sowat 60 000 insekspesies in die Amasonereënwoud geïdentifiseer. Volgens Folha Online word die aantal spesies wat nog geïdentifiseer moet word, op 180 000 geskat. Tans is daar 20 entomoloë wat in die gebied werk. Onlangse statistiek toon dat hierdie spesialiste gemiddeld 2,7 spesies per jaar identifiseer en beskryf. Teen hierdie tempo sal dit 90 geslagte van entomoloë neem wat elk 35 jaar lank werk, of altesaam sowat 3 300 jaar, om die identifiseringsproses te voltooi!
’n Tekort aan energie
“Ongeveer 1,6 miljard mense—omtrent ’n kwart van die mensdom—het nie elektrisiteit nie, en 2,4 miljard maak staat op houtskool, mis of hout as die hoofenergiebronne vir kook- of verwarmingsdoeleindes”, sê Our Planet, ’n tydskrif wat deur die Verenigde Nasies se Omgewingsprogram uitgegee word. “Die rook wat hierdie tradisionele brandstowwe afgee, eis elke jaar die lewens van omtrent twee en ’n half miljoen vroue en kinders.”
Aanlyn-lyding
Gemeenskapswebwerwe stel mense in staat om verhoudings met ’n aantal vreemdelinge aan te knoop deur middel van die Internet en om, volgens berig, gewilder te voel. Hierdie webwerwe is ook “’n paradys vir leuenaars”, rassiste, bemoeisieke mense en dié wat bevooroordeeld is, sê Folha Online. Party webwerfgebruikers vervals hulle profiel. Ander knou mense af wat oorgewig of kort is, wat kroes hare het, ensovoorts, en dit veroorsaak vir hulle groot emosionele pyn. Volgens die Brasiliaanse sielkundige Ivelise Fortim vind dit plaas omdat “wat op [webwerwe] gebeur, vir die slagoffers belangriker is as wat in die daaglikse lewe gebeur”.
Eertydse sterrekundige rekenmasjien
In 1901 het sponsduikers ’n verroeste artefak uit ’n eertydse Romeinse skeepswrak gehaal naby die Griekse eiland Antikythira. Die voorwerp is onlangs geïdentifiseer as ’n verbasend gesofistikeerde sterrekundige rekenmasjien wat uit die tweede eeu v.G.J. dateer. Wetenskaplikes wat onlangs die “Antikythira-meganisme” met behulp van hoëresolusie-X-straal-tomografie bestudeer het, het gevind dat dit uit ten minste 30 bronsratte bestaan, wat oorspronklik in ’n houtkissie gehou is. Die toestel kon die posisie van die son en maan akkuraat uitwerk en kon maan- en sonsverduisterings voorspel. Volgens die tydskrif Nature is die meganisme “tegnies meer kompleks as enige bekende uitvindsel van die daaropvolgende duisend jaar”.
[Foto-erkenning op bladsy 21]
AP Photo/Thanassis Stavrakis