“Toon dat julle dankbaar is”

◼ Die Bybel spoor aanbidders van God herhaaldelik aan om dank te betuig. “Dit is goed”, sê Psalm 92:1, “om Jehovah te dank.” Die apostel Paulus het eweneens gemaan: “Toon dat julle dankbaar is.”—Kolossense 3:15.

Daar is goeie redes om dankbaar te wees. Professor Robert Emmons, van die Universiteit van Kalifornië in Davis, sê: “Navorsing oor dankbaarheid begin daarop dui dat gevoelens van dankbaarheid van onskatbare waarde is om mense te help om daaglikse probleme, veral stres, die hoof te bied en om ’n positiewe gevoel van eiewaarde te ontwikkel.”

Die tydskrif Time noem ander voordele: “Mense wat hulleself as dankbaar beskryf . . . is gewoonlik lewenslustiger en meer optimisties, hulle ervaar minder stres en ondervind minder episodes van kliniese depressie as die bevolking in sy geheel.”

Maar ongelukkig het die Bybel voorspel dat baie mense “in die laaste dae . . . liefhebbers van hulleself” en “ondankbaar” sou wees (2 Timoteus 3:1-5). Hoe kan ware Christene voorkom dat hulle deur hierdie gees besmet word? Die Outeur van die Bybel sê: “Ek, Jehovah, is jou God, die Een wat jou leer om jouself te bevoordeel, die Een wat jou laat loop op die weg wat jy moet bewandel” (Jesaja 48:17). As ons op God se wette ag slaan, word ons baie van die verdriet gespaar wat oor diegene kom wat hulle aan selfsugtige strewes oorgee. Daarbenewens het ons die versekering dat Jehovah ons pogings sien en ons dienooreenkomstig sal beloon (Hebreërs 6:10). Sulke voordele beweeg ons om ‘Jehovah te dank’.—Psalm 107:8.