“Toon dat julle dankbaar is”
1 Toe Jesus tien melaatses genees het, het net een van hulle teruggekom om dankie te sê. Jesus het gevra: “Al tien is gereinig, nie waar nie? Waar is die ander nege dan?” (Luk. 17:11-19). Hoe belangrik is dit tog dat ons waardering uitspreek en toon dat ons dankbaar is vir elke goeie gawe en volmaakte geskenk wat ons vrygewige en liefdevolle hemelse Vader, Jehovah God, ons gee!—Kol. 3:15; Jak. 1:17.
2 Wat is party van die dinge waarvoor ons dankbaar kan wees? Ons waardeer die losprys, God se grootste gawe aan die mensdom (Joh. 3:16). Ons is ook dankbaar dat Jehovah ons na hom getrek het (Joh. 6:44). Ons Christelike eenheid is nog ’n rede om dankbaar te wees (Ps. 133:1-3). Jy kan sekerlik aan baie ander gawes van Jehovah dink. Nooit wil ons soos die ondankbare Israeliete word wat Jehovah se werke ten behoewe van hulle vergeet het nie!—Ps. 106:12, 13.
3 Toon dankbaarheid: Hoewel al tien melaatses dalk waardeer het wat Jesus vir hulle gedoen het, het slegs een getoon dat hy dankbaar is (Luk. 17:15). Ons toon ook ons waardering deur ywerig aan die bediening deel te neem. As ons waarlik dankbaar is vir alles wat ons liefdevolle hemelse Vader gedoen het, sal ons harte beweeg word om sy liefde en vrygewigheid te weerspieël deur ander van hom te vertel (Luk. 6:45). Terwyl ons ander vertel van Jehovah se “wonderlike werke en [sy] gedagtes teenoor ons”, sal ons liefde en waardering vir Jehovah toeneem.—Ps. 40:5.
4 Wek waardering by ander: Ons moet daarop ingestel wees om ons kinders en Bybelstudente te help om waardering aan te kweek. Ouers het baie geleenthede om dit te doen, soos wanneer hulle Jehovah se skepping saam met hulle kinders geniet (Rom. 1:20). Wanneer ons ’n Bybelstudie hou, kan ons ons student vra: “Wat vertel dit ons omtrent die soort persoon wat Jehovah is?” Namate die student se waardering toeneem, sal sy liefde vir God en sy vasbeslotenheid om hom te behaag ook toeneem.
5 Gedurende hierdie laaste dae is baie mense ondankbaar (2 Tim. 3:1, 2). Hoe bly moet dit Jehovah tog maak om te sien hoe sy toegewyde knegte dankbaarheid toon deur ywerig aan die bediening deel te neem!—Jak. 1:22-25.