Is misdaad buite beheer?

◼ ’N waansinnige leerder, tot die tande toe gewapen, vermoor medeleerders en onderwysers by sy skool.

◼ ’N dogtertjie word ontvoer, en haar ouers is rasend van kommer.

◼ ’N tiener erken dat hy iemand net vir die opwinding doodgemaak het en die lyk vir sy vriende gewys het, wat dit weke lank geheim gehou het.

◼ ’N seksjagter gebruik die internet om wenke met ander pedofiele uit te ruil oor hoe om kinders te verlok.

DIT is net ’n paar van die skokkende misdade wat deesdae in die nuus is. Voel jy veilig in jou buurt, veral snags? Is jy of jou gesin al deur misdaad geraak? Wêreldwyd—selfs in lande wat eens as betreklik veilig beskou is—erken miljoene mense dat hulle geteister word deur ’n vrees vir misdaad en geweld. Kyk na die volgende berigte uit verskeie lande.

JAPAN: Asia Times berig: “Japan was eens onder die veiligste lande ter wêreld . . . Maar nou lyk dit asof die gevoel van persoonlike veiligheid wat voorheen hoog op prys gestel is, iets van die verlede is, en nasionale veiligheid is vervang deur groot angstigheid oor misdaad en wêreldwye terrorisme.”

LATYNS-AMERIKA: Volgens ’n nuusberig in 2006 voorspel prominente persone in Brasilië ’n stedelike guerrillaoorlog in São Paulo. Weens weke van sporadiese geweld het die land se president gevra dat die leër onmiddellik in die stad se strate ontplooi moet word. In Sentraal-Amerika en Mexiko is “die owerheid van die gebied op hulle hoede weens die teenwoordigheid van ten minste 50 000 jong bendelede”, sê ’n berig in die koerant Tiempos del Mundo. “In 2005 alleen”, voeg die koerant by, “is omtrent 15 000 mense in El Salvador, Honduras en Guatemala deur jeugbendes vermoor.”

KANADA: “Misdaadkenners wys op ’n kommerwekkende toename in bendes”, het USA Today in 2006 gesê. “Die polisie . . . het 73 straatbendes in Toronto geïdentifiseer.” Volgens dieselfde bron het die polisiehoof van Toronto erken dat daar nie ’n eenvoudige oplossing is vir die groeiende bendekultuur in stede nie.

SUID-AFRIKA: Patrick Burton, ’n misdaadnavorser, sê in die Financial Mail: “Vrees vir misdaad raak elke aspek van jong Suid-Afrikaners se lewens.” Dit sluit “gewelddadige misdade soos gewapende roof, kapings en bankroof” in, sê die koerant.

FRANKRYK: Baie inwoners van behuisingskomplekse is elke dag vreesbevange wanneer “hulle vernielde trapkuile gebruik, by parkeerterreine ingaan wat gevaarsones geword het en van openbare vervoer gebruik maak wat ná donker gevaarlik is”.—Guardian Weekly.

VERENIGDE STATE: Georganiseerde bendes dra by tot die vlaag van misdaad. Volgens ’n berig in The New York Times het ’n polisieopname in een spesifieke staat aan die lig gebring dat byna 17 000 jongmense, seuns en meisies, aan een van sowat 700 bendes behoort. Dit is ’n toename van omtrent 10 000 lede binne net vier jaar.

BRITTANJE: The Times van Londen het aangaande ’n UNICEF-verslag oor die toestand van kinders en misdaad gesê: “’n Toenemende aantal Britse jongmense word doodgeskiet. . . . Slagoffers van gewapende misdaad en dié wat dit pleeg, word al hoe jonger.” Die tronkbevolking in Engeland en Wallis het tot byna 80 000 gestyg.

KENIA: ’n Ma en dogter wat nie vinnig genoeg uit hulle motor geklim het nie, is langs ’n besige hoofweg deur kapers geskiet, sê ’n nuusberig. Kenia se hoofstad, Nairobi, het berug geword weens allerhande soorte misdaad, insluitende motorkapings, straatroof en gewelddadige huisbraak.

Raak misdaad buite beheer? Wat is die onderliggende oorsaak van misdaad? En is daar rede om te hoop dat mense eendag in ware vrede en veiligheid sal kan lewe? Die volgende artikels sal hierdie vrae bespreek.