Is dit ontwerp?
Die saamgestelde oog
◼ “Laag op laag perfek gerangskikte strukture.” Dit is hoe professor Luke Lee van die Universiteit van Kalifornië, VSA, die saamgestelde oog van baie insekte beskryf.
Dink hieraan: Die saamgestelde oog van sekere insekte, soos die heuningby en die naaldekoker, bestaan uit talle visuele eenhede, waarvan elkeen in ’n ander rigting wys. Die beelde wat deur die afsonderlike lense voortgebring word, word gekombineer om ’n wyehoek- mosaïekbeeld te vorm wat besonder geskik is om beweging waar te neem.
Wetenskaplikes ondersoek maniere om die saamgestelde oog van insekte na te boots om hoëspoedbewegingsensors en ultradun, veelrigtingkameras te maak. Hierdie tegnologie kan op verskillende gebiede gebruik word. In die geneeskunde kan dit byvoorbeeld gebruik word om binne-in die maag te sien. Hierdie voorgestelde mediese toestel word beskryf as ’n “piepklein stelsel” wat deur die pasiënt ingesluk kan word. Wanneer dit in die maag is, sal die toestel deur middel van die saamgestelde oog inligting bymekaarmaak en dit dan met behulp van radiogolwe terugsein.
’n Span bio-ingenieurs het reeds ’n kunsmatige saamgestelde oog ontwikkel wat uit meer as 8 500 lense bestaan en op ’n speldekop kan pas. Maar hierdie tegnologie kan nie kers vashou by die saamgestelde oog van die insekwêreld nie. Die naaldekoker het byvoorbeeld ongeveer 30 000 visuele eenhede in elke oog!
Vra jou af: ‘Het hierdie optiese wonderwerk, die veeldelige oog van insekte, per toeval ontstaan? Of is dit ontwerp?’
[Prent op bladsy 26]
’n Deel van ’n heuningby se saamgestelde oog, vergroot
[Foto-erkennings op bladsy 26]
Agtergrond: © Stephen Dalton/Photo Researchers, Inc.; nabyfoto: © Raul Gonzalez Perez/Photo Researchers, Inc.