Jongmense vra

Waarom vertrou my ouers my nie?

“Ek wens my ouers wil my ’n bietjie meer vryheid gee. Dis nie dat ek die wêreld wil gaan verken nie. Ek wil byvoorbeeld net vir my tannie gaan kuier sonder dat my ma bekommerd is dat ek daaraan dink om die huis te verlaat.”—Sarah, 18.a

“Ek vra my ouers altyd waarom hulle my nie vertrou wanneer ek saam met ’n groep vriende wil uitgaan nie. Hulle sê dikwels vir my: ‘Ons vertrou jou. Ons vertrou net nie jou vriende nie.’ Ek haat dit wanneer hulle dit sê!”—Christine, 18.

VERTROUE is baie soos geld. Dit is moeilik om dit te verdien, maklik om dit te verloor, en ongeag hoeveel jy kry, dit voel nooit of dit genoeg is nie. “Wanneer ek ook al wil uitgaan”, sê die 16-jarige Iliana, “bestook my ouers my met vrae oor waarheen ek gaan, saam met wie ek gaan, wat ek gaan doen en wanneer ek sal terug wees. Ek weet hulle is my ouers, maar dit irriteer my wanneer hulle my so ondervra!”

Voel jy soms dat jou ouers jou meer kan vertrou? Indien wel, wat kan jy daaromtrent doen? Kom ons kyk eers waarom vertroue so ’n sensitiewe onderwerp tussen baie ouers en jongmense is.

Groeipyne

Die Bybel erken dat “’n man sy vader en sy moeder [sal] verlaat” (Genesis 2:24). Dieselfde kan natuurlik van ’n vrou gesê word. Of jy nou ’n seun of ’n meisie is, ’n belangrike doel van adolessensie is om jou vir volwassenheid voor te berei—die tyd wanneer jy toegerus sal wees om die huis te verlaat en moontlik jou eie gesin te hê.

Maar die oorgang tot volwassenheid is nie soos ’n deur waardeur jy eenvoudig loop wanneer jy ’n sekere ouderdom bereik nie. Dit is meer soos ’n trap wat jy deur jou adolessensiejare klim—trappie vir trappie. Jy en jou ouers het dalk teenstrydige menings oor presies hoe ver jy op daardie trap gevorder het. “Ek is 20 jaar oud, en dit is nog steeds ’n geskilpunt”, sê Maria, wat voel dat sy nie vertrou word wanneer dit by haar keuse van vriende kom nie. “My ouers dink dat ek nie sterk genoeg sal wees om van ’n slegte situasie af weg te stap nie. Ek het al vir hulle probeer sê dat ek wel al van slegte situasies af weggestap het, maar dis nie goed genoeg vir hulle nie!”

Soos Maria se opmerkings toon, kan die kwessie van vertroue heelwat spanning tussen jongmense en ouers veroorsaak. Is dit die geval in julle gesin? Indien wel, wat kan jy doen sodat jou ouers jou meer sal vertrou? En as jy weens onverstandige optrede hulle vertroue verloor het, wat kan jy doen om die skade te herstel?

Bewys dat jy betroubaar is

Die apostel Paulus het aan eerste-eeuse Christene geskryf: “Stel julleself voortdurend op die proef” (2 Korintiërs 13:5). Hy het nou wel nie hoofsaaklik met adolessente gepraat nie. Maar die beginsel is nogtans van toepassing. Die mate waarin jy vertrou word, kom dikwels ooreen met die mate waarin jy bewys dat jy betroubaar is. Dit beteken nie dat jy volmaak moet wees nie. Almal maak immers foute (Prediker 7:20). Maar gee jou algemene gedragspatroon jou ouers rede om jou nie te vertrou nie?

Paulus het byvoorbeeld geskryf: “Ons [wil] ons in alles eerlik . . . gedra” (Hebreërs 13:18). Vra jou af: ‘Is ek eerlik teenoor my ouers oor waarheen ek gaan en wat ek doen? Watter soort rekord het ek in hierdie verband opgebou?’ Kyk na die opmerkings van ’n paar jongmense wat hulleself in hierdie opsig ernstig moes ondersoek.

Lori: “Ek het in die geheim e-pos gestuur aan ’n seun van wie ek gehou het. My ouers het daarvan uitgevind en vir my gesê om daarmee op te hou. Ek het belowe dat ek sou, maar ek het nie. Dit het ’n jaar lank voortgeduur. Ek het vir die seun e-pos gestuur, dan het my ouers uitgevind, ek het verskoning gevra en belowe om op te hou, maar dan het ek dit net weer gedoen. Dit het die punt bereik waar my ouers my met niks kon vertrou nie!”

Waarom dink jy het Lori se ouers haar nie vertrou nie, en hoe kon Lori meer verantwoordelik opgetree het nadat haar ouers die eerste keer met haar oor die probleem gepraat het? Skryf jou antwoord hieronder neer.

․․․․․

Beverly: “My ouers het my nie vertrou wanneer dit by seuns gekom het nie, maar nou verstaan ek waarom. Ek het met ’n paar ouens geflankeer wat twee jaar ouer as ek was. Ek het ook ure lank oor die telefoon met hulle gepraat, en by gesellighede het ek omtrent net met hulle gesels. My ouers het my telefoon vir ’n maand lank weggeneem, en hulle het my nie toegelaat om na plekke te gaan waar daardie seuns sou wees nie.”

Waarom dink jy het Beverly se ouers haar ’n tyd lank nie vertrou nie, en wat kon sy gedoen het om die skade te herstel?

․․․․․

Annette: “Toe ek in junior hoërskool was, het ek en ’n vriendin ná ’n geselligheid elkeen ’n bier huis toe gevat—al het ons geweet dat ons ouers dit nie sou goedkeur nie—en het besluit om dit later net vir die pret te drink. My vriendin se ma het op haar bierblikkie afgekom. Toe kom dit uit dat ek ook een het. Die ergste van alles was die teleurstelling op my ma se gesig!”

As Annette jou jonger sussie was, watter raad sou jy haar gee om jou ma se vertroue te herwin?

․․․․․

Herwin vertroue

Sê nou jou optrede, soos dié van die jongmense wat hierbo aangehaal word, het bygedra tot jou ouers se gebrek aan vertroue? Al is dit die geval, wees verseker dat jy dinge kan regstel. Maar hoe?

Jou ouers sal jou heel waarskynlik meer vertrou namate jy ’n rekord van verantwoordelike gedrag opbou. Om toe te lig: Sê nou ’n man skuld ’n bank geld. As hy gereeld terugbetalings doen, sal hy die bank se vertroue wen, en die bank sal hom dalk in die toekoms selfs meer krediet gee. Dit is dieselfde by die huis. As jy betroubaar is—selfs in klein dingetjies—sal jou ouers jou in die toekoms waarskynlik meer vertrou.

Dit is ’n les wat Annette later geleer het. “Wanneer jy jonger is”, sê sy, “besef jy nie ten volle hoe belangrik dit is om vertrou te word nie. Ek dink dat ek nou verantwoordeliker is, en ek voel dat ek op ’n manier moet optree wat my sal help om my ouers se vertroue te behou.” Die les? Pleks van te kla dat jou ouers jou nie genoeg vertrou nie, moet jy jou daarop toelê om ’n rekord van betroubare gedrag op te bou.

Is jy byvoorbeeld betroubaar op die gebiede wat hieronder gemeld word? Merk die blokkie langs die punte waaraan jy moet werk.

□ Om by my inkomtyd te bly

□ Om stiptelik te wees

□ Om takies af te handel

□ Om my kamer skoon te hou

□ Om te let op my telefoongebruik

□ Om my beloftes na te kom

□ Om finansieel verantwoordelik te wees

□ Om soggens sonder aansporing op te staan

□ Om die waarheid te praat

□ Om foute te erken en om verskoning te vra

□Ander ․․․․․

Neem jou voor om te bewys dat jy betroubaar is op die gebiede wat jy gemerk het. Slaan ag op die vermaning wat in die Bybel gevind word: “[Lê] die ou persoonlikheid [af], wat met julle vroeëre lewenswandel ooreenkom” (Efesiërs 4:22). “Laat julle Ja, Ja beteken” (Jakobus 5:12). “[Praat] die waarheid . . . , elkeen van julle met sy naaste” (Efesiërs 4:25). “Wees in alles aan julle ouers gehoorsaam” (Kolossense 3:20). Mettertyd sal jou vooruitgang vir ander duidelik wees, ook vir jou ouers.—1 Timoteus 4:15.

Maar sê nou jy voel dat jou ouers jou nie die vertroue gee wat jy verdien nie, al probeer jy jou bes? Waarom praat jy nie met hulle daaroor nie? Pleks van te kla dat hulle meer vertroue in jou moet stel, kan jy hulle eerbiedig vra wat hulle dink jy moet doen om hulle vertroue te wen. Verduidelik presies wat jou doelwitte in hierdie opsig is.

Moenie van jou ouers verwag om onmiddellik toegewings te maak nie. Hulle sal ongetwyfeld wil seker maak dat jy jou beloftes nakom. Gebruik hierdie geleentheid om te bewys dat jy betroubaar is. Mettertyd sal jou ouers jou heel waarskynlik meer vertrou. Dit was die geval met Beverly, wat vroeër aangehaal is. “Dit is baie moeiliker om vertroue te wen as om dit te verloor”, sê sy, en voeg by: “Ek wen nou my ouers se vertroue, en dit voel goed!”

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnoot]

IETS OM OOR TE DINK

◼ Waarom huiwer jou ouers dalk om groter vertroue in jou te stel, selfs wanneer jy hard werk om te bewys dat jy betroubaar is?

◼ Waarom is kommunikasie met jou ouers noodsaaklik om groter vertroue te wen?

[Lokteks op bladsy 29]

Lê jou daarop toe om ’n rekord van betroubare gedrag op te bou

[Diagram/Prent op bladsy 28]

Die oorgang tot volwassenheid is soos ’n trap wat jy deur jou adolessensiejare klim—trappie vir trappie

[Diagram]

(Sien publikasie vir oorspronklike teksuitleg)

VOLWASSENHEID

ADOLESSENSIE

KINDERJARE