Van ons lesers
Wat hou die toekoms in vir die Christelike godsdiens? (Februarie 2007) Baie van wat julle sê, strook met God se Woord, en ek stem daarmee saam. Daar is egter twee dinge in julle tydskrif wat my ongemaklik laat voel. Die een is die manier waarop julle die Christelike kerke afkraak, en die ander is dat ek die indruk kry dat julle julle bo die ander godsdienste verhef. Dit sou wonderlik gewees het as ons almal saamgestem het en dieselfde geloof gehad het, maar dit is nie die geval nie. Ek ag geen kerk of godsdiens beter as ’n ander nie.
S. S., Verenigde State
“Ontwaak!” antwoord: Jehovah se Getuies is nie gekant teen mense van ander godsdienste as individue nie, en ons dink ook nie dat ons beter is as ander nie. Ons erken hierdie feit: “Almal het gesondig en skiet te kort aan die heerlikheid van God” (Romeine 3:23). Om hierdie rede span ons onsself in, gebruik ons ons middele en bestee ons baie tyd daaraan om mense tuis te besoek om Bybelwaarhede, insluitende die wonderlike hoop wat die Bybel bevat, aan hulle mee te deel. Maar net soos Jesus en sy dissipels gedoen het, spreek Jehovah se Getuies hulle moedig uit om huigelary en godsdiensdwalinge bloot te lê.
Hoe sal jy antwoord? Ek het in die verlede maar selde hierdie deel met my twee kinders deurgegaan. Nou beskou ek dit as ’n kragtige hulpmiddel wat ek kan gebruik om Bybelwaarheid in die harte van my kinders in te skerp. Bowendien geniet ek dit self ook omdat dit my geloof versterk.
I. H., Tsjeggiese Republiek
Ek is baie dankbaar vir hierdie fassinerende deel van die tydskrif, wat vir my onderwerpe vir persoonlik studie gee. Alles is so weldeurdag, selfs tot in die kleinste besonderheid! Dit bring my selfs nader aan my wyse Vader, Jehovah.
A. S., Rusland
‘Jehovah, laat my asseblief toe om u te dien’ (Julie 2007) My geloof in Jehovah is versterk toe ek die lewensverhaal van Danielle Hall gelees het. As jong kind was sy nie bang om vir almal in haar skool te vertel dat sy een van Jehovah se Getuies is nie. Ek is seker dat baie Getuiekinders op skool dit ook sal doen.
A. R., Madagaskar
Ek is nege jaar oud. Ek en my ma het nou net Danielle se verhaal gelees. Dit het my laat besef dat ek gelukkig is omdat my ouers in die waarheid is en dit nie vir my moeilik is om Jehovah te dien nie. Ek het baie gehou van die punt dat “Jehovah altyd na aan ons is, ongeag waar ons woon”. Dit was ook vir my aanmoedigend dat Danielle ná skool op haar bed gaan sit het en met Jehovah oor haar dag gepraat het, asof hy haar pa is. Ek wil hieruit leer!
A. D., Italië
“Jongmense vra . . . Waarom word ek altyd uitgesluit?” (Julie 2007) Hierdie artikel was wonderlik, want ek het gevoel asof dit net vir my geskryf is. Ek het ook die vrae in die artikel geniet en dat daar spasies is waarin ’n mens die antwoorde kan neerskryf. Dankie. Dit het my baie gehelp.
C. A., Kanada