Van ons lesers

Help jongmense om die uitdaging die hoof te bied (Maart 2007) As ’n 18-jarige kon ek my vereenselwig met baie van die punte wat genoem is oor die gebruik van selfone en die Internet. Ek het met vreemdelinge op sosiale netwerke op die Internet in aanraking gekom. Ek het kort voor lank in die strik getrap wat daardie slegte vriende gehelp het om te stel. My geestelikheid het amper onmiddellik begin agteruitgaan. Ek het selfs ingestem om baie van hulle persoonlik te ontmoet. Ongelukkig het dit tot onsedelikheid gelei. Ek bid dat hierdie artikel ander sal help om die pyn en hartseer te vermy waarmee ek moet saamleef. Die slapelose nagte en beelde wat by my spook, maak elke dag ’n uitdaging, maar ek neem nou ferm standpunt in teen Satan.

B. R., Verenigde State

Waarom word ek flou? (April 2007) Dit was aanmoedigend om uit te vind dat ek nie die enigste een is wat flou word nie. Hierdie artikel het my laat voel asof Jehovah direk met my praat en vir my sê: “Ek sien wat met jou gebeur, en hier is dus vir jou ’n bietjie aanmoediging.”

I. R., Madagaskar

Iets blywenders as kuns (April 2007) Woorde kan nie beskryf hoe dankbaar ek vir hierdie artikel is nie. Ek het twee suksesvolle fotografiese ateljees ses jaar lank bestuur. Ek was lief vir my werk en die feit dat dit my toegelaat het om skeppend te wees. Ek het egter besef dat my diens aan Jehovah al hoe meer op die agtergrond geskuif word namate ek sukses en bekendheid in my werk verwerf. Ek was so diep betrokke by my kuns, dat daar min tyd oor was vir enigiets anders. Ek het geweet dat iets moes verander. Ek het dus bedank en meer betrokke geraak by my aanbidding. Die vervulling en vreugde wat ek gevoel het wanneer ek pragtige portrette geskep het, kan eenvoudig nie vergelyk word met die vreugde wat ek uit die Christelike bediening put nie.

A. P., Verenigde State

Jongmense vra . . . Is hierdie persoon reg vir my? (Mei 2007) Ek het onlangs besef dat ek gevoelens ontwikkel vir iemand wat ek gedink het goed by my sou pas. Maar nadat ek die artikel gelees het, het ek ontdek dat die dinge omtrent hom waarvan ek gehou het, nie die eienskappe was wat werklik belangrik is nie. Die artikel het my help besef dat geestelike eienskappe en die manier waarop ’n potensiële huweliksmaat ander behandel, die belangrikste is. Ek dank Jehovah vir artikels soos hierdie een, wat beskerming en leiding aan ons jonges voorsien.

E. P., Verenigde State

Ontmoet die mense van Oos-Timor (Mei 2007) Ek het hierdie artikel met groot belangstelling gelees. Ek het vir die eerste keer van hierdie land gehoor toe ek op die nuus gesien het dat oproere daar plaasvind. Sedertdien was ek besorg oor hoe dit met die mense van Oos-Timor gaan en hoe die predikingswerk van Jehovah se Getuies daar geraak word. Die gees van hierdie mense het my verbaas omdat hulle nie weens wrede omstandighede moed opgee nie, maar geesdriftig met die lewe voortgaan. Ek sal die onblusbare gees van die mense van Oos-Timor en die groot glimlagte van Jacob en sy gesin beslis onthou.

J. M., Japan