Jongmense vra

Hoe kan ek oor ’n mislukte verhouding kom?

“Ons het ses maande lank uitgegaan en was al vyf jaar lank vriende. Toe hy die verhouding wou beëindig, kon hy my nie eens in die oë kyk nie. Hy het eenvoudig opgehou om met my te praat. Ek het hulpeloos gevoel. Die teleurstelling was oorweldigend. Ek het my bly afvra: ‘Wat het ek verkeerd gedoen?’” —Rachel.a

’N MISLUKTE verhouding kan jou vreugdevolle uitkyk verpletter en dit vervang met wanhoop en trane. Kyk na die geval van Jeff en Susan, wat twee jaar lank uitgegaan het. Gedurende daardie tydperk het hulle emosionele band al hoe hegter geword. Deur die dag het Jeff vir Susan liefdesboodskappe op haar selfoon gestuur. Van tyd tot tyd het hy vir haar geskenke gegee om te wys dat hy aan haar dink. “Jeff het hard probeer om na my te luister en my te verstaan”, sê Susan. “Hy het my spesiaal laat voel.”

Kort voor lank het Jeff en Susan gepraat van trou en bespreek waar hulle as man en vrou sou woon. Jeff het selfs gevra watter grootte ring Susan dra. Toe, uit die bloute, beëindig hy die verhouding! Susan was verpletter. Sy het aangegaan met haar daaglikse lewe, maar sy was lamgeslaan van skok. “Uiteindelik was ek verstandelik en fisies uitgeput”, sê sy.b

Waarom dit seermaak

As jy al in Susan se situasie was, wonder jy dalk: ‘Sal ek ooit hieroor kom?’ (Psalm 38:6). Dis te verstane dat jy ontsteld is. Die einde van julle verhouding is dalk een van die mees traumatiese ondervindinge wat jy al ooit moes deurmaak. Trouens, sommige het al gesê dat ’n mislukte verhouding soos ’n ministerfte is. Jy sal dalk vind dat jy selfs deur hierdie en dalk ander tipiese stadiums gaan van mense wat treur:

Ontkenning. ‘Dit kan nie die einde wees nie. Hy gaan oor ’n dag of twee van plan verander.’

Woede. ‘Hoe kon hy dit aan my doen? Ek kan hom nie verdra nie!’

Depressie. ‘Niemand kan my liefhê nie. Niemand sal my ooit liefhê nie.’

Aanvaarding. ‘Ek sal weer regkom. Dit het my seergemaak, maar ek voel al hoe beter.’

Die goeie nuus is: Jy kan die stadium van aanvaarding bereik. Hoe lank dit sal neem om daar te kom, hang af van ’n aantal faktore, onder andere hoe lank julle uitgegaan het en hoe ver julle verhouding gevorder het. Maar hoe kan jy in die tussentyd die hartseer verwerk?

Gaan aan met jou lewe

Jy het dalk al die gesegde gehoor: Die tyd heel alle wonde. Kort nadat die verhouding geëindig het, klink hierdie woorde dalk leeg. Dis omdat tyd net ’n deel van die oplossing is. Ter toeligting: ’n Sny in jou vel sal na verloop van tyd genees, maar dit is nou seer. Jy moet die bloeding stop en die pyn verlig. Jy moet ook keer dat dit sweer. Dieselfde geld vir emosionele wonde. Dit is nóú seer. Maar daar is stappe wat jy kan doen om die pyn te verlig en te voorkom dat bitterheid soos ’n sweer binne jou word. Die tyd sal jou help om te genees, maar wat kan jy doen? Probeer die volgende.

◼ Laat jouself toe om te treur. Daar is niks verkeerd daarmee om te huil nie. Die Bybel sê immers daar is “’n tyd om te huil” en selfs “’n tyd om te weeklaag” (Prediker 3:1, 4). As jy huil, beteken dit nie dat jy swak is nie. Selfs Dawid—’n moedige krygsman—het eenkeer, toe hy intense emosionele pyn ondervind het, erken: “Ek huil die hele nag deur, ek deurweek my bed met trane.”—Psalm 6:7, Nuwe Afrikaanse Bybelvertaling.

◼ Kyk na jou fisiese gesondheid. Fisiese oefening en ’n goeie dieet sal jou help om die energie terug te kry wat jy as gevolg van die emosionele eise van ’n mislukte verhouding verloor het. “Liggaamlike oefening het . . . voordeel”, sê die Bybel.—1 Timoteus 4:8.

Aan watter aspekte van jou gesondheid moet jy dalk aandag skenk?

․․․․․

◼ Bly besig. Moenie ophou om die dinge te doen waarin jy belangstel nie. En nou, meer as ooit, moet jy jou nie afsonder nie (Spreuke 18:1). As jy met diegene assosieer wat vir jou omgee, sal dit jou iets positiefs gee waarop jy kan konsentreer.

Watter doelwitte kan jy stel om besig te bly?

․․․․․

◼ Bid tot God oor jou gevoelens. Dit kan ’n uitdaging wees. Nadat ’n verhouding op die rotse beland het, voel party selfs dat God hulle in die steek gelaat het. Hulle redeneer: ‘Ek het aanhoudend gebid om iemand te vind, en kyk net wat het nou gebeur!’ (Psalm 10:1). Maar sou dit reg wees om God bloot as ’n hemelse maatsoeker te beskou? Beslis nie; hy is ook nie daarvoor verantwoordelik as een party die verhouding wil beëindig nie. Ons weet wel die volgende omtrent Jehovah: ‘Hy sorg vir jou’ (1 Petrus 5:7). Stort dus jou hart in gebed teenoor hom uit. Die Bybel sê: “Laat julle versoeke . . . by God bekend word; en die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak.”—Filippense 4:6, 7.

Oor watter spesifieke dinge kan jy tot Jehovah bid terwyl jy die hartseer van ’n mislukte verhouding probeer verwerk?

․․․․․

Fokus op die toekoms

Nadat jy tyd gehad het om te genees, sal dit dalk goed wees om te ontleed presies wat in jou vorige verhouding gebeur het. Wanneer jy gereed is om dit te doen, sal jy dit dalk nuttig vind om jou antwoorde op die volgende vrae neer te skryf.

◼ Het die ander persoon vir jou gesê waarom die verhouding beëindig is? Indien wel, skryf die rede hieronder neer, ongeag of jy dink dat dit geldig is of nie.

․․․․․

◼ Watter ander redes dink jy het dalk ’n rol gespeel?

․․․․․

◼ As jy terugdink, is daar enigiets wat jy kon gedoen het om die uitkoms te verander? Indien wel, wat is dit?

․․․․․

◼ Het hierdie ondervinding enige aspekte aan die lig gebring waarin jy geestelik of emosioneel vordering wil maak?

․․․․․

◼ Wat, indien enigiets, sal jy in jou volgende verhouding anders doen?

․․․․․

Die verhouding waarin jy was, het wel nie geword wat jy gehoop het nie. Maar onthou: Tydens ’n storm is dit maklik om op die donker hemel en die stortreën te fokus. Maar uiteindelik hou dit op reën, en die lug trek oop. Die jongmense wat in hierdie artikel aangehaal is, het gevind dat hulle mettertyd met hulle lewe kon aangaan. Wees verseker dat dit met jou ook die geval kan wees!

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

IETS OM OOR TE DINK

◼ Wat het jy uit jou vorige verhouding oor jouself geleer?

◼ Wat het jy omtrent die teenoorgestelde geslag geleer?

◼ Wie kan jy in jou vertroue neem as die hartseer weens die mislukte verhouding oorweldigend voel?

[Venster op bladsy 20]

WENK

Susan, wat vroeër genoem is, het ’n lys van tekste gemaak en dit byderhand gehou sodat sy daardie tekste kon lees wanneer sy gevoel het dat sy beheer verloor. Dalk kan jy dieselfde doen met ’n paar van die tekste wat in hierdie artikel aangehaal is.

[Prent op bladsy 19]

’n Mislukte verhouding is soos ’n pynlike sny—dit is seer, maar dit sal na verloop van tyd genees