Die Bybel se beskouing

Huwelikstrou—Wat beteken dit werklik?

Die meeste mense verwag dat huweliksmaats op seksuele gebied aan mekaar getrou sal bly. Hierdie beskouing van huwelikstrou is in ooreenstemming met die Bybel, wat sê: “Laat die huwelik onder almal eerbaar wees en die huweliksbed sonder verontreiniging.”—Hebreërs 13:4.

BEHELS getrouheid in die huwelik slegs dat ’n mens nie met iemand anders seks het nie? Wat van seksuele fantasieë oor iemand anders as jou huweliksmaat? Kan ’n hegte vriendskap met iemand van die teenoorgestelde geslag ’n vorm van “ontrouheid” word?

Is seksuele fantasieë onskadelik?

Volgens die Bybel is seks ’n natuurlike en heilsame deel van die getroude lewe, ’n bron van wedersydse vreugde en bevrediging (Spreuke 5:18, 19). Maar talle moderne deskundiges glo dat dit vir ’n getroude persoon normaal—selfs heilsaam—is om oor ander seksmaats te fantaseer. Is sulke fantasieë onskadelik solank dit nie deurgevoer word nie?

Seksuele fantasieë fokus gewoonlik op persoonlike bevrediging. Sulke egosentriese gedrag is strydig met die Bybel se raad aan getroude mense. God se Woord sê aangaande seksuele verhoudings: “Die vrou oefen nie gesag oor haar eie liggaam uit nie, maar wel haar man; net so ook oefen die man nie gesag oor sy eie liggaam uit nie, maar wel sy vrou” (1 Korintiërs 7:4). Die toepassing van Bybelraad keer dat seks ’n wellustige en selfsugtige daad word wat deur fantasieë aangevuur word. Gevolglik geniet albei huweliksmaats groter geluk.—Handelinge 20:35; Filippense 2:4.

Fantasieë oor seks buite die huwelik behels dat ’n persoon herhaaldelik in sy gedagtes dade pleeg wat, as dit in die werklikheid uitgevoer sou word, sy huweliksmaat groot emosionele pyn sou besorg. Sal seksuele fantasieë die moontlikheid vergroot dat iemand egbreuk pleeg? Die eenvoudige antwoord is ja. Die Bybel lig die verband tussen denke en dade toe: “Elkeen word beproef deurdat hy deur sy eie begeerte meegesleep en verlok word. Daarna, wanneer die begeerte vrugbaar geword het, baar dit sonde.”—Jakobus 1:14, 15.

Jesus het gesê: “Elkeen wat aanhou om na ’n vrou te kyk om hartstog vir haar te hê, [het] reeds in sy hart met haar egbreuk gepleeg” (Matteus 5:28). Deur te weier om owerspelige fantasieë te koester, “bewaak [jy] jou hart” en beskerm jy jou huwelik.—Spreuke 4:23.

Waarom emosioneel getrou bly?

’n Suksesvolle huwelik vereis dat jy “uitsluitlike toegewydheid” aan jou maat gee (Hooglied 8:6; Spreuke 5:15-18). Wat beteken dit? Hoewel dit normaal is om buite die huwelik vriende van albei geslagte te hê, het jou huweliksmaat eerste aanspraak op jou tyd, aandag en emosionele energie. Enige verhouding wat iets neem wat tereg aan jou maat behoort en dit aan iemand anders gee, is ’n vorm van “ontrouheid”, selfs al is geen seksuele daad daarby betrokke nie.a

Hoe kan so ’n verhouding ontwikkel? Dit lyk dalk of iemand van die teenoorgestelde geslag aantrekliker of simpatieker is as jou huweliksmaat. As jy by die werk of by sosiale geleenthede tyd saam met daardie persoon deurbring, kan dit daartoe lei dat julle persoonlike sake bespreek, onder meer probleme of teleurstellings in julle huwelike. ’n Emosionele afhanklikheid kan ontwikkel. Om van aangesig tot aangesig, per telefoon of deur middel van die Internet te kommunikeer, kan daartoe lei dat jy jou huweliksmaat se vertroue skend. Huweliksmaats verwag tereg dat sekere onderwerpe slegs met mekaar bespreek sal word en dat hulle ‘vertroulike gesprekke’ privaat sal bly.—Spreuke 25:9.

Wees versigtig om nie te rasionaliseer dat daar geen romantiese gevoelens is nie, terwyl daar dalk wel is! ‘Die hart is verraderlik’, sê Jeremia 17:9. As jy ’n hegte vriendskap met iemand van die teenoorgestelde geslag het, moet jy jou afvra: ‘Neem ek ’n verdedigende houding aan of is ek geheimsinnig oor die verhouding? Sal ek ongemaklik voel as my maat ons gesprekke hoor? Hoe sal ek voel as my maat ’n soortgelyke vriendskap met iemand aanknoop?’—Matteus 7:12.

’n Onvanpaste verhouding kan tot rampspoed in die huwelik lei, aangesien emosionele gehegtheid die weg baan vir uiteindelike seksuele intimiteit. Soos Jesus gewaarsku het: “Uit die hart kom daar . . . egbreuk” (Matteus 15:19). Maar selfs al lei dit nie tot egbreuk nie, kan die skade wat as gevolg van ’n verlies aan vertroue aangerig is, uiters moeilik wees om te herstel. ’n Vrou met die naam Karenb het gesê: “Toe ek uitvind dat Mark verskeie kere per dag in die geheim met ’n ander vrou praat, het dit my hart gebreek. Dit is baie moeilik om te glo dat hulle nie ’n seksuele verhouding gehad het nie. Ek weet nie of ek hom ooit weer sal vertrou nie.”

Hou vriendskappe met lede van die teenoorgestelde geslag binne gepaste perke. Moenie onvanpaste gevoelens ignoreer of onrein beweegredes rasionaliseer nie. As jy voel dat ’n verhouding jou huwelik bedreig, moet jy vinnig optree om perke neer te lê of ’n einde daaraan te maak. Die Bybel sê: “Skerpsinnig is die een wat die rampspoed gesien en hom verberg het.”—Spreuke 22:3.

Beskerm julle band van een vlees

Dit was ons Skepper se voorneme dat die huwelik die hegste verhouding tussen twee mense moet wees. Hy het gesê dat ’n man en vrou “een vlees [sal] word” (Genesis 2:24). Die band van een vlees behels meer as seksuele intimiteit. Dit sluit ’n hegte emosionele band in, wat deur onselfsugtigheid, vertroue en wedersydse respek versterk word (Spreuke 31:11; Maleagi 2:14, 15; Efesiërs 5:28, 33). As jy hierdie beginsels toepas, sal dit jou help om jou huwelik te beskerm teen die skade wat deur verstandelike en emosionele ontrouheid veroorsaak word.

[Voetnote]

HET JY AL GEWONDER?

◼ Kan seksuele fantasieë tot dade lei?—Jakobus 1:14, 15.

◼ Kan ’n hegte vriendskap met iemand van die teenoorgestelde geslag jou huwelik bedreig?—Jeremia 17:9; Matteus 15:19.

◼ Hoe kan jy jou huweliksband versterk?—1 Korintiërs 7:4; 13:8; Efesiërs 5:28, 33.

[Lokteks op bladsy 29]

“Elkeen wat aanhou om na ’n vrou te kyk om hartstog vir haar te hê, [het] reeds in sy hart met haar egbreuk gepleeg.”—Matteus 5:28