Die Bybel se beskouing

Moet jy die dooies vrees?

Lede van die Annang-stam in Nigerië glo dat die siele van die dooies onheil—insluitende die dood—oor familielede sal bring as hulle nie met die gepaste eer en erkenning begrawe word nie. Sommige Chinese glo eweneens dat die siele van die dooies ander sal aanval en selfs sal doodmaak as begrafnisgebruike nie gevolg word nie.

IN BAIE kulture regoor die wêreld is dit ’n algemene opvatting dat iets—die siel, die gees, die spook—die liggaam by die dood verlaat. Baie glo ook dat hierdie siel of gees in die aangeleenthede van familielede of vriende kan inmeng.

Maar is daar werklik die een of ander bewuste wese wat ná ’n persoon se dood voortleef? En kan hierdie “iets” die lewendes leed aandoen? Wat is die Bybel se beskouing?

Is die dooies van enigiets bewus?

Die Bybel sê dat die dooies “bewus [is] van hoegenaamd niks” nie. Dit sê ook dat die dooies “magteloos [is] in die dood” (Prediker 9:5; Jesaja 26:14). God se Woord verduidelik aangaande die eerste man, Adam: “Jehovah God het die mens uit stof van die aarde begin vorm en in sy neusgate die asem van die lewe geblaas, en die mens het ’n lewende siel geword.”—Genesis 2:7.

Let daarop dat Adam geskep is as ’n siel, dit wil sê ’n lewende persoon. Volgens die Bybel is Adam nie ’n siel gegee wat afsonderlik van sy liggaam kon lewe nie. Toe Adam gesondig het, het hy dus gesterf. Hy het ’n “dooie siel” geword (Numeri 6:6). “Die siel wat sondig—dié sal sterf”, sê die Bybel ook (Esegiël 18:4). Ons almal het sonde, of onvolmaaktheid, van die eerste man, Adam, geërf. Wanneer ons sterf, sterf die siel dus.—Romeine 5:12.

Wanneer die Bybel die toestand van die dooies beskryf, gebruik dit nie raaiselagtige woorde nie, maar woorde wat ons kan verstaan, soos “ontslaap” (Psalm 13:3). Jesus het eenkeer van ’n 12-jarige meisie gesê: “Sy het nie gesterf nie, maar slaap.” Mense het “hom begin uitlag, want hulle het geweet dat sy gesterf het”. Maar die Bybel verduidelik dat Jesus haar uit die slaap van die dood opgewek het.—Lukas 8:51-54.

Iets soortgelyks het gebeur toe Lasarus gesterf het. Jesus het vir sy dissipels gesê dat hy Lasarus gaan besoek “om hom uit die slaap wakker te maak”. Die dissipels het nie verstaan wat Jesus bedoel het nie, en “Jesus [het] dus reguit vir hulle gesê: ‘Lasarus het gesterf.’” Die apostel Paulus het ook gepraat van “dié wat ontslaap het” en gesê dat hulle op God se bestemde tyd opgewek sou word.—Johannes 11:11-14; 1 Tessalonisense 4:13-15.

Dit is betekenisvol dat die Bybel nêrens leer dat ’n siel ná ’n mens se dood voortleef nie. Daar is dus geen rede om die dooies te vrees nie. Wat is dan verantwoordelik vir die algemene opvatting dat die een of ander deel van ’n mens ná die dood voortleef? En wat sit agter die vrees dat die dooies die lewendes leed kan aandoen?

Die leuen—Die bedrog

Valse godsdienste het die idee bevorder dat mense nie werklik by die dood sterf nie. Al vroeg in die mensegeskiedenis het die lering van die onsterflikheid van die siel wêreldwyd ingang gevind. By die dood van sekere heersers—soos die Farao’s van eertydse Egipte—is hulle slawe dus doodgemaak sodat die heerser in ’n toekomstige lewe van hulle dienste gebruik kon maak.

Baie mense is al geteister deur, soos hulle wysgemaak is, die siele, of geeste, van die dooies. Hulle is daarvan oortuig dat dit die ontevrede siele van dooie familielede en ander is, wat hulle so teister. Maar soos die Skrif duidelik toon, is dit nie waar nie. Onsigbare geesmagte wat demone genoem word, sit agter sulke aanvalle, en hulle put genot daaruit om mense te teister en bang te maak.—Lukas 9:37-43; Efesiërs 6:11, 12.

Die Skrif verwys na Satan as “die vader van die leuen”, wat “[aanhou] om hom in ’n engel van lig te verander”. Hy en sy demone “[mislei] die hele bewoonde aarde” (Johannes 8:44; 2 Korintiërs 11:14; Openbaring 12:9). Dit is in werklikheid Satan wat verantwoordelik is vir die leuen dat die siel onsterflik is en die lewendes leed kan aandoen.

Diegene wat in die Bybel glo, word egter beskerm sodat hulle nie deur sulke leuens bedrieg word nie. Hulle het die waarheid geleer omtrent Satan se pogings om mense te bedrieg deur hulle te laat glo dat die dooies met die lewendes kan kommunikeer. Die feit is, soos die Bybel sê: “Die lewendes is daarvan bewus dat hulle sal sterf; maar wat die dooies betref, hulle is bewus van hoegenaamd niks” (Prediker 9:5). God se Woord bevat waarlik bevrydende waarhede oor die toestand van die dooies!—Johannes 8:32.

HET JY AL GEWONDER?

◼ Is die dooies van enigiets bewus?—Prediker 9:5; Jesaja 26:14.

◼ Wat is verantwoordelik vir die algemene opvatting dat die een of ander deel van ’n mens ná die dood voortleef?—Johannes 8:44.

◼ Waar kan ons die waarheid omtrent die toestand van die dooies vind?—Johannes 8:32; 17:17.

[Lokteks op bladsy 23]

Dit is bose geesskepsele, nie dooie mense nie, wat genot daaruit put om mense te teister