Ons beskou die wêreld
◼ “Rusland het tans ongeveer tweemiljard ton giftige afval in sy gebied, en daar is geen doeltreffende manier om daarvan ontslae te raak nie.”—RIA NOWOSTI, RUSLAND.
◼ In die 21ste eeu het seerowery skerp toegeneem. Byvoorbeeld, in 2007 “was daar 263 suksesvolle en onsuksesvolle seeroweraanvalle”.—THE WALL STREET JOURNAL, VSA.
Alkohol gedurende swangerskap
Elke jaar word daar in Duitsland ongeveer 10 000 babas met alkoholverwante gebreke gebore, berig die Süddeutsche Zeitung. Sowat 4 000 van hierdie kinders is ernstig en permanent gestremd. “Daar is geen vasgestelde perk vir veilige alkoholgebruik gedurende swangerskap nie”, waarsku die Kommissaris van Medisyne Sabine Bätzing. “Ons moet ’n groter bewustheid by dokters, vroedvroue en swanger vroue skep dat selfs een drankie nou en dan [deur ’n swanger vrou] verstandelike en fisiese skade of gedragsprobleme vir die kind tot gevolg kan hê.”
Tuinmaak—Goed vir jou gesondheid
“Navorsers het uitgevind dat dit beter vir jou gesondheid is om jou eie voedsel te kweek as wat enigiemand ooit vermoed het—ongeag hoeveel of hoe min jy kan doen”, sê Psychology Today. Navorsing het getoon dat “die mens se immuunstelsel grootliks gestimuleer is” wanneer “sekere soorte mikobakterieë wat in die grond voorkom”, ingeneem of ingeasem is. Daarom, sê die tydskrif, “lyk dit al hoe meer asof dit net so belangrik vir die mens se gesondheid is om die gronddeeltjies self in te neem as om die beste vrugte en groente te eet wat daarin gekweek word”.
Die langste ononderbroke vlug
Wetenskaplikes by die Amerikaanse Departement van Geologiese Opnames (USGS) het “die langste ononderbroke vlug vir ’n landvoël” aangeteken. ’n Aantal bandstertgriete is tydens hulle jaarlikse migrasie oor die Stille Oseaan deur middel van satelliete gevolg. Een wyfie het ’n ononderbroke vlug van agt dae, 11 650 kilometer, van Alaska na Nieu-Seeland afgelê. Teen die tyd dat sy haar bestemming bereik het, het sy “die helfte van die 700 gram wat sy geweeg het, verbrand”, sê die tydskrif The Week. Op hulle terugreis vlieg die griete van Nieu-Seeland na China en dan terug na Alaska—’n vlug van altesaam 29 000 kilometer. “As 29 000 kilometer hulle gemiddelde jaarlikse vliegafstand is”, sê die USGS, “dan sal ’n volwasse griet in sy leeftyd sowat 463 000 kilometer vlieg.”
Kaktusdiewe word gevang
Die Saguaro- Nasionale Park, Arizona, VSA, is besig om van sy kenmerkende kaktusse as gevolg van diefstal te verloor. “Almal wil ’n saguaro in hulle voortuin hê”, sê Jim McGinnis, van Arizona se Departement van Landbou se kantoor vir spesiale ondersoeke. Dit is dus niks ongewoons om in die woestyn ’n voertuig met ’n kaktus daarop te sien nie. Diewe steel gewoonlik kaktusse wat tussen een en twee meter hoog is, wat hulle tienduisend rand of meer in die sak kan bring. Om diefstal teë te werk, is beamptes van plan om mikroskyfies in kaktusse te plaas. Handskandeerders sal dan later kan toon of kaktusse wat by kwekerye of tuinboubesighede verkoop word, uit die nasionale park gesteel is.