Die natuur was eerste
“Vra asseblief . . . die voëls van die hemel, en hulle sal jou vertel . . . dat die hand van Jehovah dit gedoen het.”—Job 12:7-9.
ALLES omtrent voëls lyk of dit vir vlug ontwerp is. Byvoorbeeld, die skagte van die vlerkvere moet ’n voël se volle gewig dra wanneer hy vlieg. Hoe kan die vlerke so lig en tog so sterk wees? As jy deur die skag van ’n veer sny, sal jy moontlik sien waarom. Dit kom ooreen met wat ingenieurs ’n skuimboterhambalk (foam-sandwich beam) noem. Dit is sponsagtig aan die binnekant en grof aan die buitekant. Ingenieurs het veerskagte bestudeer, en skuimboterhambalke word in vliegtuie gebruik.
Die beendere van voëls is ook verstommend ontwerp. Die meeste is hol, en party is versterk deur interne stutte in ’n vorm wat ingenieurs die Warren-lêer noem. Interessant genoeg, ’n soortgelyke ontwerp word in die vlerke van die pendeltuig gebruik.
Vlieëniers hou moderne vliegtuie in ewewig deur ’n paar klappe op die vlerke en stert te verstel. Maar ’n voël gebruik sowat 48 spiere in sy vlerk en skouer om die vorm en beweging van sy vlerke en individuele vere te verander, en hy doen dit etlike kere per sekonde. Geen wonder dat voëls se akrobatiese vliegvermoë deur vliegtuigontwerpers beny word nie!
Dit verg baie energie om te vlieg, veral om op te styg. Voëls het dus ’n kragtige “enjin” met ’n vinnige verbrandingstempo nodig. ’n Voël se hart klop vinniger as dié van ’n soogdier van soortgelyke grootte en is gewoonlik groter en sterker. ’n Voël se longe is ook anders ontwerp sodat lug net in een rigting vloei, wat dit doeltreffender maak as dié van ’n soogdier.
Baie voëls is ontwerp om genoeg “brandstof” te stoor sodat hulle verbasende lang vlugte kan aflê. ’n Migrerende lyster gebruik die helfte van sy liggaamsgewig tydens ’n vlug van tien uur. Maar wanneer ’n bandstertgriet sy vlug van Alaska na Nieu-Seeland begin, bestaan meer as die helfte van sy liggaamsgewig uit vet. Verbasend genoeg stel dit hom in staat om omtrent 190 uur (agt dae) te vlieg sonder om te stop. Geen handelsvliegtuig kan dít doen nie.