Sleutel 2: Toegewydheid
“Wat God . . . onder een juk saamgevoeg het, moet geen mens skei nie.”—Matteus 19:6.
Wat dit behels. Suksesvolle egpare beskou hulle huwelik as ’n permanente verbintenis. Wanneer ’n probleem ontstaan, probeer hulle dit oplos pleks van dit as ’n verskoning te gebruik om die huwelik te beëindig. Wanneer maats aan mekaar toegewyd is, voel hulle veilig. Elkeen het die vertroue dat die ander die verbintenis sal eer.
Waarom dit saak maak. In baie opsigte is toegewydheid die ruggraat van die huwelik. Maar ná etlike konflikte kan hierdie verbintenis meer soos ’n strop om die nek as ’n band van liefde voel. Die woorde “tot die dood ons skei” word in werklikheid net ’n leë kontrak—een wat die maats wens skuiwergate gehad het. Huweliksmaats sal dalk nie letterlik uitstap nie, maar hulle kan hulle op ander maniere onttrek—deur byvoorbeeld in koue stilswye te verval wanneer belangrike sake bespreek moet word.
Probeer hierdie oefening. Bepaal hoe toegewyd jy aan jou huwelik is deur die volgende vrae as ’n riglyn te gebruik.
◼ Voel ek spyt dat ek met my maat getrou het wanneer ons stry?
◼ Dagdroom ek dikwels oor ’n lewe saam met iemand anders?
◼ Sê ek soms vir my maat: “Ek gaan jou verlaat” of “Ek gaan iemand soek wat my sal waardeer”?
Stel ’n doelwit. Dink aan een of twee dinge wat jy kan doen om jou toegewydheid aan jou huwelik te versterk. (’n Paar voorstelle: Skryf nou en dan vir jou maat ’n briefie, hou foto’s van jou maat by die werk waar jy dit kan sien of bel jou maat elke dag van die werk af, net om in aanraking te bly.)
Dink aan ’n hele paar voorstelle en vra jou maat dan wat hy of sy die meeste sal waardeer.
[Prent op bladsy 4]
Toegewydheid is soos ’n veiligheidsreling wat voorkom dat jou huwelik van koers af gaan
[Erkenning]
© Corbis/age fotostock