Sleutel 4: Respek

“Laat alle . . . geskreeu en smadende taal van julle af weggeneem word.”—Efesiërs 4:31.

Wat dit behels. Daar is meningsverskille in gesinne met probleme sowel as suksesvolle gesinne. Maar suksesvolle gesinne bespreek sake sonder sarkasme, beledigings en ander vorme van skeltaal, oftewel smadende taal. Gesinslede behandel mekaar soos hulle self graag behandel wil word.—Matteus 7:12.

Waarom dit saak maak. Woorde kan as wapens gebruik word, met vernietigende gevolge. ’n Bybelspreuk lui: “Dit is beter om in ’n verlate land te woon as saam met ’n bitsige en kwaai vrou” (Spreuke 21:19, The Bible in Basic English). Natuurlik kan dieselfde gesê word van ’n man. En wat ouerskap betref, sê die Bybel: “Moenie julle kinders vertoorn nie, sodat hulle nie mismoedig word nie” (Kolossense 3:21). Kinders wat voortdurend gekritiseer word, kan begin voel dat dit onmoontlik is om hulle ouers tevrede te stel. Hulle sal dalk selfs ophou om dit te probeer doen.

Probeer hierdie oefening. Bepaal hoeveel respek julle vir mekaar het deur die volgende vrae te beantwoord.

◼ Eindig meningsverskille in ons gesin gewoonlik met een persoon wat by die kamer uitstorm?

◼ Gebruik ek beledigende woorde soos “onnosel”, “idioot” of iets soortgelyks wanneer ek met my huweliksmaat of kinders praat?

◼ Het ek in ’n milieu grootgeword waarin skeltaal algemeen was?

Stel ’n doelwit. Dink aan een of twee doelwitte wat jy kan stel om respek in jou spraak te weerspieël. (Wenk: Besluit om stellings eerder met “ek” te begin as met “jy”. Byvoorbeeld: “Ek voel seergemaak wanneer jy . . . ”, eerder as “Jy is altyd . . . ”)

Vertel jou maat van jou doelwit(te). Ná drie maande kan jy jou maat vra hoe jy vorder.

Dink aan ’n paar perke wat jy kan stel om te verseker dat jy nie skeltaal teenoor jou kinders gebruik nie.

Vra jou kinders om verskoning wanneer jy dalk op ’n ongevoelige of sarkastiese wyse met hulle gepraat het.

[Prent op bladsy 6]

Net soos die see se golwe ’n harde rots kan verweer, kan die gewoonte om kwetsende taal te gebruik, ’n gesin afbreek