Jongmense vra
Wat kan ek aantrek?
Heather is gereed om by die deur uit te stap, en haar ouers kan hulle oë nie glo nie.
“Gaan jy dit dra?” wil haar pa geskok weet.
“Hoekom nie?” antwoord Heather verbaas. “Ek gaan net winkels toe saam met vriende.”
“Nie met daardie klere nie!” sê haar ma.
“Maar, Ma”, kerm Heather, “dis wat al die kinders dra, . . . en boonop sê dit iets!”
“Wel, ons hou nie van wat dit sê nie!” kap haar pa terug. “Gaan nou terug kamer toe en trek iets anders aan, juffroutjie, of jy gaan nêrens nie!”
KONFLIKTE oor kleredrag is niks nuuts nie. Toe jou ouers so oud soos jy was, het hulle dalk soortgelyke botsings met hulle ouers gehad. En destyds het hulle waarskynlik gevoel soos jy vandag voel! Maar nou is hulle aan die ander kant, en die kwessie van wat jy kan dra, veroorsaak die een skermutseling ná die ander.
Jy sê: Dis gemaklik.
Hulle sê: Dis slordig.
Jy sê: Dis so mooi!
Hulle sê: Dis te verleidelik.
Jy sê: Dis halfprys.
Hulle sê: Dit behoort te wees. . . . Die helfte daarvan is weg!
Is ’n wapenstilstand enigsins moontlik? Ja! Megan, nou 23, weet wat die geheim is. “Daar hoef nie ’n stryery te wees nie”, sê sy. “Julle kan ’n ooreenkoms bereik.” ’n Ooreenkoms? Beteken dit dat jy soos ’n 40-jarige moet aantrek? Ontspan! Dit beteken net dat jy en jou ouers julle verskille bespreek en met ander opsies vorendag kom waarmee hulle—en jy—gelukkig kan wees. Die voordele?
1. Jy sal op jou beste lyk, selfs vir jou portuurs.
2. Jou ouers sal minder geneig wees om jou klere te kritiseer.
3. Wanneer jou ouers sien hoe verantwoordelik jy op hierdie gebied is, sal hulle jou dalk selfs op ander gebiede vryheid gee.
Kom ons begin dan. Dink aan ’n kledingstuk wat jy op die Internet of in ’n winkel gesien het en eenvoudig “moet hê”. Die eerste ding om te doen, is . . .
Neem Bybelbeginsels in ag
Die Bybel sê verbasend min oor kleredrag. Om die waarheid te sê, dit sal jou net ’n paar minute neem om al die skriftuurlike raad wat regstreeks hiermee verband hou, hardop te lees! Maar in dié tyd sal jy vaste, waardevolle riglyne vind. Byvoorbeeld:
◼ Die Bybelse raad aan vroue is om hulle te versier “met beskeidenheid en gesonde verstand”.a—1 Timoteus 2:9, 10.
Die woord “beskeidenheid” maak jou miskien bekommerd. ‘Moet ek dan ’n sak dra?’ wonder jy dalk. Glad nie! In hierdie konteks beteken beskeidenheid dat jou klere toon dat jy selfrespek het en ander mense se gevoelens in ag neem (2 Korintiërs 6:3). ’n Groot verskeidenheid klere voldoen aan hierdie vereistes. “Dit kan ’n uitdaging wees”, sê Danielle, 23, “maar jy kan in die mode wees sonder om uitspattige style te dra.”
◼ Wat voorkoms betref, sê die Bybel dat jy jou op “die geheime persoon van die hart” moet toespits—of soos die Nuwe Afrikaanse Bybelvertaling dit stel, “die innerlike mens”.—1 Petrus 3:4.
Onbeskeie klere laat die koppe miskien vir ’n oomblik draai, maar dit is jou innerlike skoonheid wat jou die blywende respek van volwassenes en jou portuurs sal wen. Jou portuurs? Ja—selfs hulle sal dalk die dwaasheid van uitspattige style insien. “Dis aaklig om te sien hoe vrouens mans uitlok deur wat hulle dra!” sê die 16-jarige Brittany. Kay stem saam. Sy beskryf ’n voormalige vriendin en sê: “Alles wat sy gedra het, het gesê ‘kyk-na-my’. Sy wou hê dat die ouens haar moes raaksien, en daarom het sy die klere gedra wat die meeste aandag sou trek.”
Modewenk: Vermy style wat seksualiteit beklemtoon. Dit laat jou desperaat en selfbehep lyk. Dit kan jou ook die teiken maak van seksuele teistering—of iets ergers. In teenstelling hiermee laat beskeie klere jou aantrekliker lyk en beklemtoon dit jou goeie eienskappe.
Vra jou ouers se mening
Om gewaagde klere in jou rugsak te druk en dit aan te trek wanneer jy weg van die huis af is, is nie ’n goeie idee nie. Jou ouers sal jou meer vertrou as jy openhartig en eerlik is met hulle, selfs in dinge waarmee jy dink jy kan wegkom. Om die waarheid te sê, dit sal waarskynlik goed wees om hulle mening te vra wanneer jy oor ’n kledingstuk besluit.—Spreuke 15:22.
Maar waarom sou jy dit wil doen? Is dit nie jou ouers se plig om jou modesin te onderdruk nie? Nie eintlik nie. Dit is waar dat jou pa en ma dinge dalk uit ’n ander oogpunt beskou. Maar soms is dit wat jy nodig het. “Ek waardeer my ouers se raad”, sê die 17-jarige Nataleine, “want ek wil nie uit die huis gaan en my in die skande steek of die een wees van wie mense sleg praat weens my voorkoms nie.”
En laat ons eerlik wees: So lank as wat jy onder jou ouers se dak woon, is jy onder hulle gesag (Kolossense 3:20). Maar wanneer jy hulle beskouings verstaan—en hulle joune verstaan —sal jy dalk verbaas wees oor hoe dikwels julle kan ooreenkom. Gevolglik kan die konflikte oor kleredrag uiteindelik iets van die verlede wees!
Modewenk: Wanneer jy klere aanpas, moet jy nie net dink aan wat jy in die spieël sien nie. ’n Skynbaar beskeie kledingstuk is dalk nie so beskeie wanneer jy gaan sit of buk om iets op te tel nie. Indien moontlik, vra die mening van een van jou ouers of ’n geestelik volwasse vriend(in).
Nog artikels uit die reeks “Jongmense vra” kan gevind word op die webwerf www.watchtower.org/ype
[Voetnoot]
a Hoewel hierdie Bybelse vermaning aan vroue gerig is, geld die beginsels vir beide geslagte. Sien die venster: “Wat van seuns?”
IETS OM OOR TE DINK
Dink aan ’n kledingstuk wat jy wil koop. Vra jou dan af:
◼ Watter “boodskap” dra dit oor?
◼ Watter reaksie kan dit by ander uitlok?
◼ Wil ek werklik so ’n reaksie en die gevolge daarvan hê?
[Venster/Prente op bladsy 19]
Kleredragwerkblad
Instruksies: Maak ’n afskrif van hierdie bladsy. Laat jou ouers die kolom aan die regterkant invul terwyl jy die linkerkolom invul. Ruil later julle werkblaaie om en bespreek julle antwoorde. Is daar enige verrassings? Wat het julle oor mekaar se beskouing geleer wat julle nie voorheen geweet het nie?
VIR JOU VIR JOU OUERS
Dink aan ’n spesifieke kledingstuk Dink aan ’n spesifieke
wat jy wil dra of kledingstuk wat jou
koop. tiener wil dra of koop.
◼ Waarom hou jy van hierdie ◼ Waarom dink jy hou jou
spesifieke kledingstuk? Nommer die kind van hierdie punte
hieronder volgens wat vir jou kledingstuk? Nommer
die belangrikste is. punte hieronder
volgens wat jy dink vir hom
of haar die belangrikste is.
․․․․․ Handelsmerk ․․․․․ Handelsmerk
․․․․․ Aantreklik vir die teenoorgestelde geslag ․․․․․ Aantreklik vir die teenoorgestelde geslag
․․․․․ Aanvaarbaar vir portuurs ․․․․․ Aanvaarbaar vir portuurs
․․․․․ Gemak ․․․․․ Gemak
․․․․․ Prys ․․․․․ Prys
․․․․․ Ander ․․․․․ ․․․․․ Ander ․․․․․
◼ My ouers se eerste reaksie ◼ My eerste reaksie is
op hierdie kledingstuk sal waarskynlik wees
□ “Vergeet dit!” □ “Vergeet dit!”
□ “Miskien.” □ “Miskien.”
□ “Geen probleem nie.” □ “Geen probleem nie.”
◼ Die waarskynlikste rede vir hulle beswaar is ◼ Die rede vir my beswaar is
□ “Dis te verleidelik.” □ “Dis te verleidelik.”
□ “Dis te slordig.” □ “Dis te slordig.”
□ “Dis te modieus.” □ “Dis te modieus.”
□ “Dit stel ons as jou □ “Dit stel ons as jou
ouers in ’n slegte lig.” ouers in ’n slegte lig.”
□ “Dis te duur.” □ “Dis te duur.”
□ Ander ․․․․․ □ Ander ․․․․․
KAN ONS SAAM HIERAAN WERK?
◼ Kan ek iets nuttigs in my ◼ Is ons beswaar teen hierdie kledingstuk
ouers se beskouing sien? maar net ’n kwessie van persoonlike smaak?
․․․․․ □ Ja □ Moontlik □ Nee
◼ Kan enigiets gedoen word ◼ Kan enigiets gedoen word om
om die kledingstuk aanvaarbaar die kledingstuk aanvaarbaar
te maak? te maak?
․․․․․ ․․․․․
DIE BESLUIT
․․․․․
[Venster/Prente op bladsy 20]
WAT JOU PORTUURS SÊ
“Dit is nie verkeerd om ‘stylvol’ aan te trek solank dit nie met Bybelbeginsels bots nie. Daar is baie wat jy kan koop wat goed lyk en nie die wenkbroue sal laat lig nie.”—Derrick.
“Toe ek ’n tiener was, wou ek onafhanklik wees. Ek het nie daarvan gehou dat iemand vir my sê wat ek mag dra nie. Maar ek het later besef dat ek nie die respek ontvang wat ek wou hê nie—nie totdat ek die mening van my ouers en ander ouer persone in ag begin neem het nie.”—Megan.
“Wanneer ek meisies met skrapse klere sien, het ek minder respek vir hulle. Maar wanneer ek mense beskeie klere sien dra wat terselfdertyd stylvol is, dink ek by myself: ‘Dis hoe ek wil hê dat mense my moet sien.’”—Nataleine.
[Venster/Prent op bladsy 21]
WAT VAN SEUNS?
Die Bybelbeginsels in hierdie artikel is ook op seuns van toepassing. Wees beskeie. Laat die geheime persoon van die hart—jou innerlike mens—na vore kom. Wanneer jy oor ’n kledingstuk besluit, moet jy jou afvra: ‘Wat sal dit oor my sê? Weerspieël dit wie ek werklik is?’ Onthou, klere stuur ’n boodskap uit. Maak seker dat jou klere die ideale weerspieël waarin jy glo!
[Venster op bladsy 21]
’N WOORDJIE AAN OUERS
Dink aan die scenario aan die begin van hierdie artikel en stel jou voor dat Heather jou dogter is. Jy kan nie anders as om haar skrapse klere op te merk nie—’n bietjie te kaal, volgens jou opinie. Jy reageer onmiddellik: “Gaan terug kamer toe en trek iets anders aan, juffroutjie, of jy gaan nêrens nie!” So ’n reaksie sal heel moontlik resultate oplewer. Jou dogter het immers geen ander keuse as om te luister nie. Maar hoe leer jy haar om nie net ander klere aan te trek nie, maar om ook haar denkwyse te verander?
◼ Eerstens, onthou dat die gevolge van onbeskeidenheid net soveel of selfs meer vir jou tiener moet saak maak as vir jou. Diep binne-in wil jou tiener nie belaglik lyk of ongewenste aandag trek nie. Verduidelik geduldig dat onbeskeie style in werklikheid nie vleiend is nie.b Stel alternatiewe voor.
◼ Tweedens, ‘laat jou redelikheid bekend word’ (Filippense 4:5). Vra jou af: ‘Skend hierdie kledingstuk ’n Bybelbeginsel of is dit net ’n kwessie van persoonlike smaak?’ (2 Korintiërs 1:24). Kan jy, as dit ’n kwessie van smaak is, ’n toegewing maak?
◼ Derdens, moenie net vir jou tiener sê wat nie aanvaarbaar is nie. Help hom of haar om gepaste klere te vind. Dit sal beslis die tyd en moeite werd wees.
[Voetnoot]
b Jou tiener is waarskynlik baie bewus van sy of haar liggaam, en daarom moet jy versigtig wees om nie te impliseer dat daar fout is met sy of haar voorkoms nie.