Ontwaak! help om ’n ongebore kind te red

● ’n Mexikaanse vrou genaamd Anita het drie kinders gehad en was weer eens swanger.a Sy het vir haar man gesê dat sy nie nog ’n baba wil hê nie en dat sy enigiets sal doen om daarvan ontslae te raak. Sy het selfs gedreig om selfmoord te pleeg! Op daardie stadium het Anita die Bybel saam met een van Jehovah se Getuies gestudeer, maar sy het nie eintlik vordering gemaak nie. “Ek het ’n arrogante houding gehad”, het sy gesê.

Die Getuie wat met Anita gestudeer het, het die toepaslike Bybelbeginsels aan haar verduidelik. Sy het byvoorbeeld vir Anita gewys dat die lewe van ’n ongebore baba in God se oë heilig is. As iemand in eertydse Israel ’n swanger vrou beseer het en sy of haar ongebore kind gesterf het, het God se Wet bepaal dat die aanvaller as ’n moordenaar veroordeel moet word (Eksodus 21:22, 23).b Maar Anita het nie werklik geluister nie. Sy het reeds haar besluit geneem.

“Iemand het my vertel dat dit ’n spontane aborsie sal veroorsaak as ek my met ’n sekere middel inspuit”, het Anita gesê. “Toe koop ek die middel en vra ’n vriend om dit in te spuit. Hy het dit gedoen, maar niks het gebeur nie. Ek het later uitgevind dat hy nie ’n medepligtige wou word nie, en daarom het hy die middel in die geheim met skoon water vervang.”

Maar Anita was vasbeslote. In haar vierde maand het sy ’n dokter gevind wat ingestem het om ’n aborsie uit te voer. Ses dae voor die afspraak het die Getuie vir Anita ’n afskrif gegee van die artikel “Die dagboek van ’n ongebore kind”, wat in die Ontwaak! van 8 September 1980 verskyn het. Die “dagboek” het afgesluit: “Vandag het my moeder my vermoor.” Hierdie woorde het Anita geskok, en sy het ure lank gehuil. “Daardie artikel het uiteindelik my oë oopgemaak”, het sy gesê.

Anita het geboorte gegee aan ’n gesonde dogtertjie. “Vandag”, sê Anita, “het ek die voorreg om Jehovah te ken, en ek het hom met my hele hart lief.” Verder leer sy God se Woord aan haar dogter, sodat sy ook in liefde vir Jehovah sal toeneem. Trouens, haar dogter erken openlik dat sy haar lewe aan God verskuldig is—eerstens omdat hy die Bron van die lewe is en tweedens omdat die leringe in sy Woord, soos in Ontwaak! bespreek word, haar teen leed beskerm het.

[Voetnote]