Hof in Spanje herbevestig ’n moeder se reg op toesig
● Hoe sal jy voel as jou bevoegdheid as ’n ouer bevraagteken word? Sê nou iemand beweer dat jou kinders nie basiese sosiale vaardighede het nie, nie tussen reg en verkeerd kan onderskei nie en dat hulle intellektuele ontwikkeling belemmer is—dit alles weens jou invloed?
Rosa López, die moeder van twee dogters in Spanje, het voor sulke aanklagte te staan gekom toe haar gewese man stappe gedoen het om wetlike toesig oor hulle kinders te verkry. Rosa is een van Jehovah se Getuies, en haar gewese man het beweer dat haar godsdiensoortuigings ’n nadelige uitwerking het op die meisies se sosiale lewe, akademiese prestasie en sedelike oordeel. Toe ’n plaaslike hof sy argumente verwerp het, het Rosa se gewese man na die provinsiale hof geappelleer.
In ’n toesigsaak probeer ’n geregtelike ondersoek wat na behore uitgevoer word, onpartydig bly; dit sal nie by godsdiensdebatte betrokke raak, wat as ’t ware ’n mens se geloof onder verhoor plaas nie. Dit sal eerder kwessies ondersoek soos: Wat is in die belang van die kind? Is die invloed van die ouer wat toesig het, op die een of ander manier nadelig? Watter ouer kan die beste na die kind se behoeftes omsien?
Om hierdie vrae in Rosa se geval te ondersoek, het die hof ’n sielkundige aangestel om onderhoude met die kinders en die ouers te voer. Die resultaat? Die sielkundige het bevind dat die kinders, hoewel hulle al ses jaar lank onder hulle ma se toesig was, heeltemal bevredigend ontwikkel het op alle gebiede—akademies, sosiaal en in die gesinseenheid. Op grond van die sielkundige se bevindings sowel as die getuienis van die ouers het die regter geen bewyse gevind wat daarop dui dat “die minderjariges enigsins leed aangedoen is in hulle emosionele of sosiaal-kulturele ontwikkeling omdat hulle in die godsdiensgemeenskap van Jehovah se Getuies grootgemaak word nie”. Hy het ook beslis dat die aantygings wat deur Rosa se gewese man gemaak is, “heeltemal arbitrêr en ongegrond” was.
As gevolg van godsdiensvooroordeel of verkeerde inligting neem party mense aan dat kinders van Jehovah se Getuies van ’n “normale” opvoeding ontneem word. Maar kinders wat volgens Bybelbeginsels grootgemaak word, word nie mishandel nie. Inteendeel, hulle word gehelp om gebalanseerde, liefdevolle, afgeronde persone te word.—Efesiërs 6:4; 2 Timoteus 3:15-17.
[Prent op bladsy 14]
Rosa López het wettige toesig oor haar twee dogters behou