Ons beskou die wêreld

“Dit is ’n verstommende feit dat die Bybel jaar ná jaar die trefferboek in Amerika is—hoewel 90% van huishoudings reeds ten minste een eksemplaar het. . . . Na raming [word] 25 miljoen eksemplare elke jaar verkoop.”—THE WALL STREET JOURNAL, VERENIGDE STATE.

“Elke jaar word ongeveer 4,5 miljoen mense regoor die wêreld deur ’n slang gebyt, en volgens konserwatiewe skattings sterf ten minste 100 000 mense weens slangbyt en word ’n verdere 250 000 permanent gestrem.”—UNIVERSITEIT VAN MELBOURNE, AUSTRALIË.

“In 2008 is ongeveer 210 miljard e-posse per dag gestuur.”—NEW SCIENTIST, BRITTANJE.

Verkeersgeraas belemmer geheue

“Mense wie se slaapkamer naby ’n hoofweg, treinspoor of lughawe is, sal dit waarskynlik moeiliker vind om ou inligting te onthou en nuwe dinge te leer, selfs al slaap hulle deur die geraas.” Dit is die woorde van Ysbrand van der Werf van die Nederlandse Instituut vir Neurowetenskap. Geheue- en leervermoë word benadeel wanneer ’n mens nie genoeg slaap kry nie, maar dieselfde geld wanneer jy onderwerp word aan “ligte versteuring van diep slaap sonder . . . om wakker te word”, sê die Nederlandse koerant de Volkskrant. Om behoorlik te kan werk, het die hippokampus, ’n deel van die brein wat uiters noodsaaklik is vir geheue, diep slaap nodig, wat nie deur “eksterne stresfaktore, soos geraas en lig”, versteur word nie.

Vuurwerk en asemhalingsiektes

Vuurwerkvertonings kan skouspelagtig wees, maar die deeltjies wat in die atmosfeer ingeskiet word, kan gevaarlik wees vir jou gesondheid. Baie vuurwerke bevat metaalsoute om flitse in verskillende kleure voort te bring—byvoorbeeld, stronsium vir rooi en barium vir groen. Oostenrykse navorsers wat monsters getoets het van sneeu wat voor en ná ’n Nuwejaarsvuurwerkvertoning geval het, het gevind dat die sneeu se bariuminhoud 500 keer hoër was. Omdat bariumvergiftiging vernouing van die lugweë veroorsaak, sê navorsers dat asemhalingsprobleme, soos asma, vererger kan word wanneer die rook van vuurwerk ingeasem word.

Windturbines maak vlermuise dood

In Alberta, Kanada, word dooie vlermuise onder windturbines gevind, berig die tydskrif Scientific American. Dit het ondersoekers stomgeslaan, aangesien vlermuise se sonar en vliegvermoë so merkwaardig is. Maar navorsers het gevind dat 92 persent van die dooie vlermuise wat ondersoek is, inwendig gebloei het, wat hulle tot die slotsom laat kom het dat die vlermuise se delikate asemhalingstelsel nie die skielike daling in lugdruk kan hanteer wat deur die lemme van die turbine geskep word nie. Hierdie lemme kan aan hulle eindpunte teen 200 kilometer per uur beweeg. Veral insekvretende migrerende vlermuise word hierdeur geraak, en daar word gevrees dat windturbines ekosisteme kan versteur.