Eensaamheid in ’n wêreld vol kommunikasiemiddele
SELFOONOPROEPE, SMS’e, e-posse, aanlyn- sosiale netwerke, kletskamers—nog nooit tevore was kommunikasiemiddele so talryk en so maklik bekombaar nie. En tog is daar in hierdie wêreld vol kommunikasiemiddele baie mense—jonk en oud—wat baie eensaam is. Waarom?
In hulle boek Loneliness—Human Nature and the Need for Social Connection bespreek die navorsers John T. Cacioppo en William Patrick eensaamheid in diepte. Hulle verwys na ’n studie wat sê dat “groter gebruik van die Internet tot groter sosiale afsondering sowel as depressie kan lei wanneer dit persoonliker vorme van menslike kontak vervang”.
Die dolle gejaag van die lewe in die moderne samelewing bevorder nouliks hartlike kontak tussen mense. Die glimlag en geneentheid wat in iemand se oë gesien kan word, kan oor die algemeen nie oor die telefoon of deur ’n boodskap op ’n rekenaarskerm oorgedra word nie.
Bogenoemde kan by die werksplek die geval wees, maar in die gesinskring is dit selfs meer van toepassing. In baie huisgesinne kom en gaan gesinslede sonder om saam te eet of met mekaar te gesels. Tieners het hulle eie rekenaar en lewe feitlik afgesonder van die res van die gesin. Ironies genoeg, al het talle jongmense elektroniese toestelle, voel hulle eensaam.
Deesdae kan selfs die huweliksband deur gevoelens van eensaamheid bedreig word. Gebrek aan kommunikasie tussen huweliksmaats kan ’n situasie skep waarin hulle verby mekaar lewe, asof hulle op paaie is wat selde kruis. ’n Gevoel van eensaamheid terwyl ’n mens saam met ’n huweliksmaat lewe, is een van die ergste vorme van eensaamheid.
Veral enkelouers sal dalk met eensaamheid worstel. Die oorvloed van kommunikasiemiddele in die wêreld kan, soos baie ander dinge, die verhouding tussen enkelouers en hulle kinders benadeel, wat gevoelens van eensaamheid kan laat toeneem. Ook is daar baie ongetroude mense wat graag ’n metgesel wil hê, maar in dié opsig bly hulle emosionele behoeftes onvervuld.
Eensaamheid het ’n maatskaplike euwel geword wat aanleiding kan gee tot alkoholisme, oormatige etery, dwelmmisbruik, promiskuïteit en selfs selfmoord. Daarom is dit belangrik om die oorsake van eensaamheid te identifiseer. Dit is die eerste stap om die probleem met welslae die hoof te bied.