“Die waarheid sal julle vrymaak”!
HIERDIE woorde van Jesus Christus, wat in die Bybel in Johannes 8:32 gevind word, is ’n ewige waarheid. Hierdie waarheid bevry ons van bygelowigheid en van gebruike wat God mishaag en wat vir ons nadelig is. Die volgende ondervindinge toon hoe Bybelwaarheid mense in verskeie lande bevry het van Kersgebruike wat vir baie mense ’n swaar las is.
Bybelwaarheid het hulle vrygemaak!
Argentinië “Ons gesin is bevry van die probleme wat gepaardgaan met oormatige etery en drinkery en geskenke wat ons nie kan bekostig nie”, sê Oscar.
Mario het bevry gevoel toe die “Kersfeesleuen”, soos hy dit noem, vir hom uitgewys is. “Ek geniet dit nou om my waardering aan ander te toon deur enige tyd van die jaar en wanneer ek dit kan bekostig, vir hulle geskenke te gee.”
Kanada “Ek hou daarvan om geskenke te gee en te kry”, skryf Elfie. “Maar ek hou nie daarvan wanneer mense verplig voel om geskenke te gee nie. Toe ons gesin opgehou het om Kersfees te vier, het dit soos ’n vakansie gevoel!”
Ulli, een van Elfie se dogters, vertel: “Nadat my ouers opgehou het om Kersfees te vier, het hulle ons regdeur die jaar verras met genotvolle bedrywighede of geskenke, en ons was mal daaroor! Wanneer ons klasmaats ons gevra het wat die geleentheid is, het ons trots vir hulle gesê: ‘Dis sommer net vir die lekkerte!’ Die verandering om volgens Bybelwaarheid te lewe, was nogtans nie vir ons ouers maklik nie omdat dit teenstand en druk van die familie meegebring het. Maar hulle het standvastig gebly. Hulle vasbeslotenheid om Jehovah God te aanbid, het ’n groot invloed op my gehad.”
Silvia sê dat dit vir haar “’n verligting was” om Kersfees op te gee. “Ek het agterna so goed gevoel! Ek het geweet dat ek Jehovah God gelukkig maak, en dit het beter gevoel as duisende Kersvierings.”
Kenia Peter skryf: “Toe ek Kersfees gevier het, het ek baie geld geleen om vir geskenke en oordadige etes te betaal. Dit alles het natuurlik beteken dat ek oortyd moes werk en nie by my gesin kon wees nie. Hoe bly was ek tog om van dit alles bevry te wees!”
“Ek, my gesin en vriende gee enige tyd vir mekaar geskenke”, sê Carolyne. “Ek glo dat sulke onverwagte geskenke, wat uit ’n opregte hart gegee word, die heel beste is.”
Japan “Ons kinders”, skryf Hirosji en Rie, “maak nie die fout om geskenke te verwag en dit as vanselfsprekend te aanvaar nie. Dit maak ons as ouers gelukkig om te sien dat hulle verstaan dat ’n mens uit die hart moet gee.”
Keiko vertel: “Ons gesin het Kersfees gevier. Wanneer ons seker was dat ons seuntjie slaap, het ek en my man ’n geskenk langs sy bed neergesit. Die volgende oggend het ons vir hom gesê: ‘Omdat jy soet was, het Kersvader vir jou ’n geskenk gebring.’ Nadat ek die waarheid omtrent Kersfees geleer het, het ek dit aan my seuntjie verduidelik, en hy was ontsteld en het gehuil. Toe eers het ek besef dat Kersfees nie so wonderlik is as wat dit uitgebeeld word nie. Dit is in werklikheid ’n leuen, en deur hierdie leuen te bevorder, het ek gevoel dat ek my seun mislei het.”
Filippyne Dave sê: “Dit is moeilik om woorde te vind om die vreugde te beskryf wat Jehovah ons deur middel van die suiwer waarhede in die Bybel gee. Wanneer lede van ons gesin vir ander geskenke gee, verwag ons nie om iets terug te ontvang nie. En ons gee uit die hart.”
Die persone wat hierbo aangehaal word, is net ’n paar van die miljoene wat self ondervind het dat Bybelwaarheid mense vrymaak. Maar nog belangriker, wanneer ons in ooreenstemming met hierdie waarheid lewe, maak ons God se hart bly (Spreuke 27:11). Jesus Christus het gesê dat “die ware aanbidders die Vader met gees en waarheid sal aanbid, want die Vader soek inderdaad sulke mense om hom te aanbid” (Johannes 4:23). Sien God, wanneer hy in jou hart kyk, iemand wat na waarheid smag? Ons hoop dat die antwoord ’n besliste ja is!
[Prent op bladsy 9]
Christene gee uit liefde en enige tyd van die jaar