Is dit ontwerp?

Die omgekeerde retina

● Die menseoog bevat ’n retina—’n membraan met omtrent 120 miljoen selle wat fotoreseptors genoem word, wat ligstrale absorbeer en dit in elektriese seine omsit. Jou brein vertolk hierdie seine as visuele beelde. Evolusioniste het aangevoer dat die plasing van die retina in die oë van gewerweldes, skepsele met ’n ruggraat, bewys dat die oog geen ontwerper het nie.

Dink hieraan: Die retina van gewerweldes is omgekeer in die sin dat die fotoreseptors agter in die retina is. Lig moet deur ’n hele paar lae selle dring om die fotoreseptors te bereik. Volgens die evolusiebioloog Kenneth Miller “verstrooi hierdie rangskikking die lig sodat ons sig minder gedetailleerd is as wat andersins moontlik sou wees”.

Evolusioniste beweer dus dat die omgekeerde retina getuig van slegte ontwerp—eintlik van geen ontwerp nie. Een wetenskaplike het dit selfs as ’n “funksioneel onpraktiese onderstebo plasing” beskryf. Verdere navorsing toon egter dat die fotoreseptors van die omgekeerde retina ideaal geplaas is langs die pigment-epiteel—’n sellaag wat suurstof en voedingstowwe voorsien wat noodsaaklik is vir skerp sig. “As die pigment-epiteelweefsel voor die retina was, sou dit sig aansienlik belemmer het”, het die bioloog Jerry Bergman en die oogarts Joseph Calkins geskryf.

Die omgekeerde retina is besonder voordelig vir gewerweldes met klein oë. Professor Ronald Kröger, van die Universiteit van Lund, Swede, sê: “Daar moet ’n sekere afstand tussen die lens van die oog en die fotoreseptors wees om ’n skerp beeld te kry. Die feit dat hierdie spasie met senuselle gevul is, spaar plek, wat belangrik is vir die gewerweldes.”

Wat meer is, aangesien die senuselle van die retina dig teenmekaar en naby die fotoreseptors is, kan visuele inligting vinnig en akkuraat ontleed word.

Wat dink jy? Is die omgekeerde retina ’n minderwaardige samestelling, ’n produk van blote toeval? Of is dit ontwerp?

[Diagram op bladsy 15]

(Sien publikasie vir oorspronklike teksuitleg)

Fotoreseptor-selle

Lig

Pigment-epiteel

Lig

Retina

Optiese senuwee