Ons beskou die wêreld
Die gemiddelde aantal mense waarna elke dokter in Tanzanië moet omsien, is 64 000.—THE CITIZEN, TANZANIË.
‘Ten minste 1 miljard arm mense is chronies ondervoed, en die Verenigde Nasies se Millenniumontwikkelingsdoelwit om teen 2015 die aantal honger mense in die wêreld aansienlik te verminder, sal nie bereik word nie.’—SCIENCE, VSA.
“Die wêreld se 100 grootste wapenvervaardigers” het in 2008 verkope van R2 826 miljard aangeteken, R287 miljard meer as in 2007.—STOCKHOLM SE INTERNASIONALE VREDESINSTITUUT, SWEDE.
Te min kieme?
“Ons navorsing dui daarop dat ’n hiperskoon, hiperhigiëniese omgewing tydens kinderjare kan bydra tot hoër vlakke van inflammasie as ’n volwassene, wat weer die risiko verhoog om ’n groot verskeidenheid siektes te kry”, sê Thomas McDade, medeprofessor aan die Northwestern-universiteit, Illinois, VSA. In ’n studie waarin Filippynse kinders met Amerikaanse kinders vergelyk is, is daar bevind dat die Filippynse kinders oor die algemeen baie meer aansteeklike siektes gekry het. Maar in teenstelling met wat verwag is, het jong Filippynse volwassenes se bloed baie laer vlakke van C-reaktiewe proteïen bevat, wat toeneem wanneer daar inflammasie is. Die gevolgtrekking? As kinders groter blootstelling aan algemene bakterieë kry, kan dit hulle in werklikheid teen dodelike siektes beskerm wanneer hulle volwassenes is.
Verlore werketiek
Baie Finse werkgewers is stomgeslaan deur ’n nuwe geslag werksaansoekers wat blykbaar nie die vaagste benul het watter sosiale vaardighede nodig is om ’n werk te behou nie. “Die nuwelinge is geneig om te dink dat werksure aanpasbaar is en dat hulle kan kom en gaan wanneer hulle ook al wil”, sê Anne Mikkola, die eienares van ’n restaurant, in ’n onderhoud wat gedoen is deur ’n Finse nasionale uitsaaikorporasie. Gedragskodes en kleredrag veroorsaak ook probleme. Veral in die dienssektor moet werkgewers dikwels uitwys watter soort kleredrag ongepas is. Dit is ook duidelik dat die skeidslyn tussen die werk- en privaatlewe vervaag het omdat nuwelinge se vriende gedurende werkstyd inloer net om te kuier.
Gebiedsgeskil “opgelos”
’n Jarelange gebiedsgeskil tussen Bangladesj en Indië oor ’n klein eiland in die Golf van Bengale is opgelos—deur ’n styging in seevlak. Die onbewoonde gebied, wat die Indiërs New Moore-eiland en die Bangladesjers South Talpatti-eiland noem, was nooit hoër as twee meter bo seevlak nie. Maar satellietbeelde toon dat dit onlangs deur die see bedek is. “Wat hierdie twee lande nie deur jarelange besprekings kon bereik nie, is deur aardverwarming opgelos”, sê professor Sugata Hazra van die Departement Seekunde aan die Universiteit van Jadavpur in Kalkutta.