Die Bybel se beskouing

Is die wetenskap en die Bybel versoenbaar?

“Die sinrykheid en vreugde van my wetenskap lê in daardie seldsame oomblikke wanneer ek iets nuuts ontdek en vir myself sê: ‘So, dis hoe God dit gedoen het!’”—HENRY SCHAEFER, PROFESSOR IN CHEMIE.

DIE wetenskap help ons baie om die sigbare wêreld te verstaan, en dit openbaar ’n vlak van orde, presisie en gesofistikeerdheid wat vir baie mense dui op die bestaan van ’n God van oneindige intelligensie en krag. Vir hulle openbaar die wetenskap nie net besonderhede van die sigbare wêreld nie, maar ook verskillende aspekte van God se denke.

Hierdie beskouing word beslis deur die Bybel ondersteun. Romeine 1:20 sê: “[God se] onsigbare eienskappe word van die wêreld se skepping af duidelik gesien, omdat hulle waargeneem word in die dinge wat gemaak is, ja, sy ewige krag en Godheid.” Psalm 19:1, 2 sê eweneens: “Die hemele maak die heerlikheid van God bekend; en die uitspansel verkondig die werk van sy hande. Die een dag na die ander dag laat spraak uitborrel, en die een nag na die ander nag openbaar kennis.” Maar al die wonders in die sigbare wêreld openbaar net sekere aspekte van ons Skepper.

Beperkings van die wetenskap

Baie van die waarhede omtrent God lê buite die grense van die wetenskap. Ter toeligting: ’n Wetenskaplike kan dalk elke molekule in ’n sjokoladekoek beskryf, maar sal sy ontleding openbaar waarom die koek gebak is of vir wie dit gebak is? Om antwoorde te vind op hierdie vrae—wat vir die meeste mense belangriker is—moet hy die persoon vra wat die koek gebak het.

Net so verskaf die wetenskap “baie feitlike inligting”, het die Oostenrykse fisikus en Nobelpryswenner Erwin Schrödinger geskryf, “maar dit sê heeltemal niks oor alles . . . wat ons eintlik na aan die hart lê, wat werklik vir ons saak maak nie”. Dit, sê hy, sluit “God en die ewigheid” in. Byvoorbeeld, slegs God kan vrae soos die volgende beantwoord: Waarom is daar ’n heelal? Waarom is daar ’n oorvloed van lewe, insluitende intelligente lewe, op ons planeet? As God werklik almagtig is, waarom laat hy boosheid en lyding toe? En is daar hoop nadat ’n mens gesterf het?

Het God hierdie vrae beantwoord? Ja, in die Bybel (2 Timoteus 3:16). ‘Maar hoe’, vra jy dalk, ‘kan ek daarvan seker wees dat die Bybel werklik van God af kom?’ Uit ’n wetenskaplike oogpunt moet die dinge wat die Bybel oor die wêreld om ons sê, ooreenstem met wetenskaplike feite, want God weerspreek homself nie. Stem die Bybel ooreen met die wetenskap? Kyk na ’n paar voorbeelde.

Sy tyd vooruit op wetenskaplike gebied

Toe die Bybel geskryf is, het baie mense geglo dat verskeie gode die wêreld bewoon en dat daardie gode, en nie natuurwette nie, die son, die maan, die weer, vrugbaarheid, ensovoorts, beheer. Maar dit was nie wat die eertydse Hebreeuse profete van God geglo het nie. Hulle het natuurlik geweet dat Jehovah God die sigbare wêreld direk kon beheer en dat hy dit wel by spesifieke geleenthede gedoen het (Josua 10:12-14; 2 Konings 20:9-11). Nietemin het John Lennox, professor in wiskunde aan die Universiteit van Oxford, Engeland, gesê dat dit nie vir daardie profete “nodig was om [mitiese gode] uit hulle heelal te verwyder nie . . . , om die eenvoudige rede dat hulle in die eerste plek nooit aan die gode geglo het nie. Hulle het nie in sulke bygelowigheid verval nie weens hulle geloof in Een Ware God, die Skepper van hemel en aarde.”

Hoe het hierdie oortuiging hulle teen bygelowigheid beskerm? Om maar een ding te noem, die ware God het aan hulle geopenbaar dat hy die heelal deur middel van presiese wette, of insettinge, beheer. Byvoorbeeld, meer as 3 500 jaar gelede het Jehovah God vir sy kneg Job gevra: “Het jy die insettinge van die hemel te wete gekom?” (Job 38:33). In die sewende eeu VHJ het die profeet Jeremia geskryf oor “die insettinge van hemel en aarde”.—Jeremia 33:25.

Almal wat in die ou tyd gelewe het en geloof in die geskrifte van die Bybelprofete gehad het, het dus geweet dat die heelal nie deur mitiese, onvoorspelbare gode beheer word nie, maar deur logiese wette. Gevolglik het daardie godvresende individue hulle nie neergebuig voor dinge wat deur God geskep is, soos die son, die maan of die sterre nie, en hulle was ook nie bygelowig wat hierdie dinge betref nie (Deuteronomium 4:15-19). Hulle het eerder God se werke beskou as dinge wat hulle kon bestudeer en wat sy wysheid, krag en ander eienskappe openbaar.—Psalm 8:3-9; Spreuke 3:19, 20.

In ooreenstemming met die beskouing wat baie wetenskaplikes vandag het, het die eertydse Hebreërs ook geglo dat die heelal ’n begin gehad het. “In die begin het God die hemel en die aarde geskep”, sê Genesis 1:1. Ook het God sowat 3 500 jaar gelede aan sy kneg Job geopenbaar dat die aarde ‘aan niks hang nie’, of in die ruimte hang (Job 26:7). En laastens het die profeet Jesaja meer as 2 500 jaar gelede die aarde beskryf as ’n kring of bol.—Jesaja 40:22.a

Ja, die Bybel stem wel ooreen met wetenskaplike waarhede oor die sigbare wêreld. Trouens, die twee studievelde is nie net versoenbaar nie—hulle vul mekaar pragtig aan. As ’n mens enigeen van die twee verwerp, sluit jy ’n deur wat tot die kennis van God lei.—Psalm 119:105; Jesaja 40:26.

[Voetnoot]

HET JY AL GEWONDER?

● Wat kan ons uit die skepping omtrent God leer?—Romeine 1:20.

● Watter waarhede omtrent God lê buite die grense van die wetenskap?—2 Timoteus 3:16.

● Waarom het die eertydse profete van die ware God nie ’n bygelowige beskouing van die skepping gehad nie?—Jeremia 33:25.

[Lokteks op bladsy 23]

Die heelal word beheer deur presiese wette—“die insettinge van hemel en aarde”.—JEREMIA 33:25