“Dankie vir hierdie reeks!”
● Mense in alle wêrelddele het hulle waardering uitgespreek vir die reeks “Vir gesinsbespreking” op bladsye 30 en 31 van elke Ontwaak! Die interaktiewe kunswerk en vrae, die Bybelkaarte wat uitgeknip en gebêre kan word, die prentejag vir kinders en die voorgestelde gesinsaktiwiteit is opvoedkundig en pret vir die hele gesin. Kyk na die volgende kommentare:
“Ek studeer die Bybel per brief met my twee 12-jarige kleinseuns. Ek gebruik ‘Vir gesinsbespreking’ en laat hulle die antwoorde invul en die bladsye na my toe terugstuur. Dit lyk asof my kleinseuns ons studie werklik geniet, en in my briewe kan ek hulle meer vertel van die punte wat gedek word. Dankie vir hierdie reeks!”
V. C., Verenigde State
“My vyfjarige seuntjie het my onlangs gevra om met slapenstyd een van die ‘Wat is verkeerd in hierdie prent?’-gedeeltes met hom deur te gaan. Ek het een gevind, en ons het oor die prent begin gesels. Toe het my seuntjie aandagtig geluister terwyl ek die verslag direk uit die Bybel gelees het. Nou wil hy byna elke aand studie hou. Ek en my gesin wil julle uit die diepte van ons hart bedank omdat julle dit vir ons kinders lekker maak om van die Bybel te leer.”
M. F., Frankryk
“Ek het David, wat 12 jaar oud is, en Jennifer, wat 6 jaar oud is, by ’n bushalte ontmoet. Hulle pa het gesien dat ek die Ontwaak! vir passasiers aanbied, en daarom het hy hulle toegelaat om na my toe te kom om uit te vind wat ek doen. Terwyl die pa en sy seun die tydskrifte begin lees het, het ek en klein Jennifer na die mooi prente en foto’s van voëls en diere begin kyk. Ons het oor die pragtige dinge gesels wat Jehovah God vir ons genot gemaak het. Toe ons by bladsy 31 kom, het ons die ‘Prentejag vir kinders’ probeer doen. Terwyl ek die eerste een probeer vind het, het Jennifer vinnig deur die tydskrif begin blaai en dit binne sekondes gevind. Ons het die tweede en derde prente probeer vind, en sy het dit weer eerste gekry. Trouens, Jennifer wou nie ophou totdat ons die prente in tien verskillende nommers gekry het nie! Uiteindelik het Jennifer nog twee tydskrifte gevra om vir haar pa en broer te gee. Toe ek totsiens sê, het al drie my bedank vir die uitstekende tydskrifte.”
M. C., Ecuador