Leerders onder stres

DIE sewentienjarige Jennifer was een van die toppresteerders in haar klas. Sy het aan baie buitemuurse bedrywighede deelgeneem, en haar onderwysers en voorligters het haar gerespekteer. Maar in die jaar voordat sy met skool klaargemaak het, het sy kwaai hoofpyne begin kry en dikwels naar gevoel. Sy meen dat die lang ure van intense konsentrasie op haar skoolwerk tesame met ’n gebrek aan slaap haar fisies siek gemaak het.

Jennifer is nie alleen nie. Dit lyk of al hoe meer leerders met hoë stresvlakke op skool te kampe het, en party ontvang selfs psigiatriese hulp. Gevolglik het ’n groep Amerikaanse opvoedkundiges ’n program op die been gebring om die intense druk in skole te verlig. Die program word Bevraagteken Sukses genoem.

As jy ’n leerder is, ondervind jy moontlik soos Jennifer stres. Of as jy ’n ouer is, sien jy dalk hoe meedoënlose druk op jou seun of dogter geplaas word om op skool te presteer. Is daar ’n doeltreffende bron van leiding waar leerders en hulle ouers hulp kan kry?