Sewe wyshede

DIE wyshede hieronder word gevind in ’n ou boek wat vol beginsels is wat prakties en vandag nog toepaslik is. Kyk hoe dit jou kan help om verstandig met jou geld te werk.

1. “Iemand wat silwer liefhet, sal nie genoeg kry van silwer nie, ook nie iemand wat rykdom liefhet, van inkomste nie” (Prediker 5:10). Dit is nie die woorde van ’n afgunstige man met min geld nie. Een van die rykste manne wat nog gelewe het, koning Salomo van Israel, het dit neergeskryf op grond van wat hy self ondervind en gesien het. Ryk manne in onlangser tye het soortgelyke dinge gesê.

2. “As ons dan kos en onderdak het, sal ons daarmee tevrede wees. Maar dié wat graag ryk wil wees, val in versoeking” (1 Timoteus 6:8, 9, NET Bible). Hierdie woorde is deur die apostel Paulus geskryf, wat ’n goeie loopbaan prysgegee het en ’n volgeling van Jesus Christus geword het. In teenstelling met party godsdiensleiers van vandag het Paulus enige versoeking weerstaan om hom te verryk ten koste van diegene wat hy onderrig het of met wie hy geassosieer het. Trouens, hy kon in alle eerlikheid sê: “Ek het geen mens se silwer of goud of klere hebsugtig begeer nie. Julle weet self dat hierdie hande voorsien het in my behoeftes en in dié van hulle wat by my was.”—Handelinge 20:33, 34.

3. “Wie van julle wat ’n toring wil bou, gaan nie eers sit en die koste bereken, om te sien of hy genoeg het om dit te voltooi nie?” (Lukas 14:28). Jesus se illustrasie kan toegepas word op ’n situasie waarvoor jy te staan kan kom: Sal jy, veral wanneer jy iets met ’n kredietkaart koop, impulsief koop of geduldig wees en die koste bereken? Het jy die item werklik nodig en kan jy dit bekostig?

4. “Dié wat leen, is slawe van geldskieters” (Spreuke 22:7, Contemporary English Version). Die onlangse wêreldwye finansiële krisis het die dwaasheid van kredietkaart- en ander skuld aan die lig gebring. “Vandag is dit iets algemeens dat ’n persoon gemiddeld meer as $9 000 [R60 000] op vier of meer kredietkaarte skuld”, sê Michael Wagner in sy boek Your Money, Day One, wat in 2009 uitgegee is.

5. “Die goddelose leen en betaal nie terug nie, maar die regverdige betoon guns en gee geskenke” (Psalm 37:21). Party mense laat hulle bankrot verklaar omdat dit vir hulle ’n maklike manier is om nie hulle skuld terug te betaal nie. Maar diegene wat ’n goeie verhouding met God hoog op prys stel, betaal nie net hulle skuld pligsgetrou terug as dit moontlik is nie, maar is ook vrygewig.

6. “Ek was eens ’n jong man, ook het ek oud geword, en tog het ek geen regverdige heeltemal verlate gesien of dat sy nageslag brood soek nie” (Psalm 37:25). Hierdie woorde is geskryf deur ’n man wat onregverdig behandel is. Hy was jare lank ’n voortvlugtige, wat soms in grotte gewoon het en soms in ’n vreemde land toevlug gesoek het. Uiteindelik het hierdie voortvlugtige, Dawid, die koning van eertydse Israel geword. Gedurende sy leeftyd het hy die waaragtigheid van die bogenoemde woorde ondervind.

7. “Dit verskaf groter geluk om te gee as om te ontvang” (Handelinge 20:35). Hierdie woorde is geuiter deur die grootste mens wat nog gelewe het. “Vir die vreugde wat hom voorgehou is”, het Jesus sy lewe op aarde gebruik om ander te dien. Nou geniet hy onsterflikheid as ’n geespersoon in die hemel aan die regterhand van “die gelukkige God”, Jehovah.—Hebreërs 12:2; 1 Timoteus 1:11.

Ons kan geen groter doel in die lewe hê nie as om Jesus se voorbeeld te volg deur alles in ons vermoë te doen om ander se belange te dien. Jy sal ongetwyfeld saamstem dat dit beter is om ’n versigtige spaarder te wees, sodat jy ’n ruimhartige gewer kan wees, eerder as ’n selfsugtige spandeerder.