Jongmense vra
Waarom het ek nie my mond gehou nie?
Hierdie artikel sal jou help om uit te vind
WAAROM jy soms die verkeerde ding sê
WAT om te doen as jy iets verkeerds sê
HOE om jou tong te tem
“Gewoonlik kan ek my tong in toom hou, maar soms sê ek iets verkeerds en dan wens ek dat ek net kan verdwyn!”—Chase
“Soms sê ek iets wat almal heel moontlik dink, maar wat ’n mens eintlik nie hardop moet sê nie . . . Oeps!”—Allie
WAAROM DIT GEBEUR
Sleutelteks: “As iemand nooit iets verkeerds sê nie, is hy volmaak” (Jakobus 3:2, Good News Translation). Wat is die punt? Niemand kan sy tong volmaak beheer nie. Die meeste mense kan hulle vereenselwig met Annette,a wat erken: “Die spoedhobbel tussen my brein en my mond verander dikwels in ’n lanseerplek.”
Ware verhaal: “’n Vriendin wou van die klere hê waarvan ek ontslae wou raak. Sonder om te dink, het ek gesê: ‘Ek dink nie dit sal jou pas nie.’ Toe vra sy: ‘Wat? Dink jy ek is vet?’”—Corrine.
Om te verstaan waarom jy dalk nie altyd beheer het oor wat jy sê nie, kan jy die volgende probeer.
● Identifiseer jou swakheid.
․․․․․ Ek praat wanneer ek kwaad is
․․․․․ Ek praat sonder om te dink
․․․․․ Ek praat sonder dat ek geluister het
․․․․․ Ander ․․․․․
Voorbeeld: “Ek is geneig om te veel die gek te skeer, en soms neem mense my woorde verkeerd op.”—Alexis.
● Identifiseer vir wie jy heel moontlik die verkeerde ding sal sê.
․․․․․ ’n Ouer
․․․․․ ’n Broer of suster
․․․․․ ’n Vriend
․․․․․ Iemand anders ․․․․․
Voorbeeld: “Dit is ongelukkig so dat ek die mense vir wie ek die liefste is, gewoonlik die maklikste seermaak”, sê die 20-jarige Christine. “Dis seker omdat ek so ontspanne in hulle geselskap voel dat ek nie let op wat ek sê nie.”
WAT OM TE DOEN AS JY IETS VERKEERDS SÊ
Sleutelteks: ‘Streef die dinge na wat vrede bevorder’ (Romeine 14:19). Een manier om hierdie raad toe te pas, is om verskoning te vra.
Ware verhaal: “My ma is oorlede toe ek tien maande oud was, en omdat my pa nooit deel van my lewe was nie, het my tannie en my oom my grootgemaak. Eendag, toe ek so 10 of 11 was, het ek baie eensaam gevoel en was ek kwaad omdat my ma dood is, en ek wou iemand blameer. Toe my tannie my dus gevra het om haar met iets te help, het ek teen haar uitgevaar; en op die ou end het die woorde ‘Ek haat jou’ en ‘Jy’s nie my regte ma nie’ uitgekom. My tannie het geskok gelyk. Toe het sy in haar kamer ingestap en die deur toegemaak, en ek kon hoor hoe sy huil. Ek het aaklig gevoel. Sy het vir my gesorg en alles vir my gedoen, en ek het haar soos vuilgoed behandel. My oom het met my gepraat oor wat gebeur het, en hy het vir my tekste gewys oor die belangrikheid daarvan om die tong in toom te hou. Toe het ek my tannie opreg om verskoning gevra. Ek moes tot die besef kom dat ek verkeerd opgetree het.”—Karen.
Skryf hieronder een rede neer waarom dit dalk vir jou moeilik sal wees om verskoning te vra.
․․․․․
Waarom sal jy dalk beter voel as jy om verskoning vra?
․․․․․
Leidraad: Kyk na die beginsels in Spreuke 11:2 en Matteus 5:23, 24.
Dit is natuurlik beter om so ’n situasie in die eerste plek te vermy sodat jy nie om verskoning hoef te vra nie. Hoe kan jy dit doen?
HOE OM JOU TONG TE TEM
Sleutelteks: “[Jy] moet gou wees om te hoor, stadig om te praat, stadig om toornig te word” (Jakobus 1:19). Hier volg ’n paar wenke wat jou sal help om hierdie raad toe te pas.
Lees die volgende tekste, en kyk watter teks by watter wenk pas.
1 “Probeer om jouself nie te ernstig op te neem nie; dan sal jy in die eerste plek nie maklik aanstoot neem nie.”—Danette.
2 “Ek gaan stap ’n entjie. Dit gee my tyd om ’n bietjie alleen te wees en om af te koel.”—Brielle.
3 “Toe ek jonger was, het ek gedink dat ek iets moet sê oor elke dingetjie waarmee ek nie saamstem nie, en ek het oor alles ’n bohaai gemaak. Maar ek het geleer dat dit beter is om jou nie aan alles te steur nie.”—Celia.
4 “As iemand te kere gaan en jy niks terugsê nie, sal die persoon uiteindelik moeg raak omdat jy nie reageer nie. Wees net geduldig. Moenie olie op die vuur gooi nie.”—Kerrin.
5 “Soms is ek kwaad vir iemand. Dan dink ek aan alles wat ek vir daardie persoon wil sê. Maar as ek wag, besef ek hoe nutteloos my woorde sou gewees het. Ek het geleer: Moenie onmiddellik reageer nie.”—Charles.
Nog artikels uit die reeks “Jongmense vra” kan gevind word op die webwerf www.watchtower.org/ype
[Voetnoot]
a Van die name in hierdie artikel is verander.
[Venster/Prente op bladsy 22]
Allie—Voordat ek iets sê, vra ek my af: ‘Gaan dit die situasie verbeter? Watter uitwerking gaan dit hê op die persoon vir wie ek dit sê?’ As jy twyfel of jy iets moet sê, moet jy dit heel moontlik nie sê nie.
Chase—Wanneer ek iets wil sê, probeer ek dink hoe dit ander in die geselskap sal raak. Ek dink dat ek my tong al hoe beter beheer namate ek ouer word. ’n Mens leer beslis uit ondervinding.
[Venster op bladsy 23]
VRA JOU OUERS
Aangesien niemand volmaak is nie—“ons almal struikel dikwels”, soos Jakobus geskryf het—kan jy jou ouers vra oor die stryd wat hulle gevoer het om die tong te tem.—Jakobus 3:2.
[Prent op bladsy 22]
“As jy tandepasta uitgedruk het, kan jy dit nie weer in die buisie terugkry nie. Dit is ook die geval met ons woorde. As ons iets sê wat iemand seermaak, kan ons dit nie terugneem nie.”—James.