Is homoseksualiteit ooit geregverdig?

HOMOSEKSUALITEIT word in baie lande al hoe aanvaarbaarder. ’n Groep wat aan ’n kerk in die Verenigde State behoort, vra dat wat die Bybel oor homoseksualiteit sê, hervertolk moet word in die lig van “hedendaagse wysheid”. ’n Pastoor in Brasilië wat onlangs met iemand van dieselfde geslag getrou het, het ook voorgestel dat daar “met nuwe oë na die Bybel gekyk” moet word sodat sy kerk se byderwetse beskouing geregverdig kan word.

Aan die ander kant word daar dikwels gesê dat diegene wat nie homoseksuele dade goedkeur nie, homofobies of bevooroordeeld is. Wat sê die Bybel werklik oor homoseksualiteit?

Wat sê die Bybel?

Die Bybel bevorder nie vooroordeel teen mense nie. Maar die Bybel se beskouing van homoseksuele dade is duidelik.

“Jy mag nie by ’n manspersoon gaan lê soos jy by ’n vrou gaan lê nie. Dit is iets verfoeiliks.”—Levitikus 18:22.

Hierdie verbod, wat deel van die Mosaïese Wet was, was een van baie sedewette wat spesifiek aan die nasie Israel gegee is. Nietemin toon hierdie gebod wat God se beskouing van homoseksuele dade is, hetsy onder Jode of nie-Jode, wanneer dit sê: “Dit is iets verfoeiliks.” Die nasies om Israel het homoseksualiteit, bloedskande, egbreuk en ander dinge beoefen wat deur die Wet verbied is. Daarom het God hierdie nasies as onrein beskou (Levitikus 18:24, 25). Het die Bybel se beskouing in die Christelike era verander? Kyk na die volgende teks:

“God [het] hulle aan skandelike geslagsdrifte oorgegee, want ook hulle vroue het die natuurlike gebruik van hulleself verander in een wat teen die natuur is; en net so het ook die mans die natuurlike gebruik van die vrou laat vaar en hewig in hulle wellus teenoor mekaar ontbrand, mans met mans, en onwelvoeglikheid bedryf.”—Romeine 1:26, 27.

Waarom sê die Bybel dat homoseksuele dade onnatuurlik en onwelvoeglik is? Omdat dit nooit die Skepper se bedoeling was dat sulke seksuele dade beoefen word nie. Kinders kan nie deur homoseksuele dade verwek word nie. Die Bybel vergelyk homoseksuele dade met die geslagsomgang wat opstandige engele, wat later demone genoem is, voor die Vloed van Noag se dag met vroue gehad het (Genesis 6:4; 19:4, 5; Judas 6, 7). God beskou albei dade as onnatuurlik.

Is daar faktore wat homoseksualiteit regverdig?

Party wonder dalk: ‘Sou dit geregverdig wees as iemand voor homoseksuele begeertes swig weens sy genetiese samestelling, omgewing of traumatiese ondervindinge, soos seksuele misbruik?’ Nee, dit sou nie. Beskou hierdie voorbeeld: ’n Persoon het dalk wat party wetenskaplikes meen ’n aangebore geneigdheid is tot drankmisbruik, of hy het miskien grootgeword in ’n gesin waar drankmisbruik iets algemeens was. Die meeste mense sal sekerlik meegevoel hê met so ’n persoon. Nietemin sal mense hom beslis nie aanspoor om voort te gaan om drank te misbruik of om die stryd teen drankmisbruik gewonne te gee net omdat hy met hierdie geneigdheid gebore is of in so ’n omgewing grootgeword het nie.

Net so veroordeel die Bybel nie persone wat met homoseksuele neigings worstel nie, maar ook keur die Bybel dit glad nie goed as sulke persone swig voor hierdie neigings nie, hetsy dit die gevolg is van hulle genetiese samestelling of ander faktore (Romeine 7:21-25; 1 Korintiërs 9:27). Die Bybel bied egter praktiese raad en aanmoediging om individue te help om op te hou om homoseksuele dade te beoefen.

Wat is God se wil vir mense met homoseksuele begeertes?

Die Bybel verseker ons dat dit God se wil is dat “alle soorte mense gered moet word en tot juiste kennis van die waarheid moet kom” (1 Timoteus 2:4). Hoewel die Bybel homoseksuele dade veroordeel, bevorder dit nie haat teen homoseksuele nie.

God se beskouing van homoseksualiteit kan nie verwater word nie. In 1 Korintiërs 6:9, 10 sê die Bybel duidelik dat “mans wat by mans lê”, ingesluit is onder diegene wat “God se koninkryk nie sal beërf nie”. Maar vers 11 voeg die vertroostende gedagte by: “En tog is dit wat party van julle was. Maar julle is skoon gewas, maar julle is geheilig, maar julle is regverdig verklaar in die naam van ons Here Jesus Christus en met die gees van ons God.”

Dit is duidelik dat diegene wat ’n opregte begeerte gehad het om God op sy voorwaardes te aanbid, hartlik in die vroeë Christengemeente verwelkom is. Dieselfde geld vandag vir alle opregtes van hart wat God se goedkeuring wil geniet—nie deur die Bybel op ’n ander manier te vertolk nie—maar deur hulle lewe in ooreenstemming daarmee te bring.

HET JY AL GEWONDER?

● Wat is die Bybel se beskouing van homoseksuele dade?—Romeine 1:26, 27.

● Diskrimineer die Bybel teen mense met homoseksuele begeertes?—1 Timoteus 2:4.

● Kan ’n persoon hom van homoseksuele dade onthou?—1 Korintiërs 6:9-11.

[Prent op bladsy 29]

Moet God se beskouing van homoseksualiteit hervertolk word?