Hoe kan jy met ander vrede maak?

DIE Bybel sê van mense: “Almal het gesondig en skiet te kort aan die heerlikheid van God” (Romeine 3:23). Aangesien die meer as sewemiljard mense op die aarde onvolmaak is, is persoonlikheidsverskille onvermydelik. Hoe kan ons onder hierdie omstandighede vrede maak?

Die Bybel gee ons goeie raad. Dit beskryf die Skepper as “die God van vrede”, wie se naam Jehovah is (Hebreërs 13:20; Psalm 83:18). God wil hê dat sy aardse kinders in vrede met mekaar moet lewe. En hy stel die voorbeeld hierin. Toe die eerste mensepaar teen God gesondig het en sodoende hulle vreedsame verhouding met hom verbreek het, het hy onmiddellik stappe gedoen om sy menseskepping met hom te versoen (2 Korintiërs 5:19). Kyk na drie dinge wat jy kan doen om vrede met ander te maak.

Vergewe vryelik

Wat sê die Bybel? “Hou aan om mekaar te verdra en mekaar vryelik te vergewe as iemand rede tot klagte teen ’n ander het. Net soos Jehovah julle vryelik vergewe het, so moet julle ook doen.”—Kolossense 3:13.

Wat is die uitdaging? Dalk het jy ’n geldige “rede tot klagte” en voel jy geregverdig om niks meer met die oortreder te doen te hê nie. Jy redeneer miskien ook dat die oortreder eerste om verskoning moet vra. Maar as die persoon nie bewus is van sy oortreding nie, of dink dat jy verkeerd is, sal die konflik waarskynlik nooit opgelos word nie.

Wat kan jy doen? Volg die Bybel se raad deur die persoon vryelik te vergewe, veral as dit ’n klein probleem is. Onthou, as God van ons foute boekgehou het, sou ons nooit voor hom kon bly staan nie (Psalm 130:3). Die Bybel sê: “Jehovah is barmhartig en genadig, word nie gou toornig nie en is oorvloedig in liefderyke goedhartigheid. Want hy weet goed hoe ons gevorm is, gedagtig dat ons stof is.”—Psalm 103:8, 14.

Let ook op die Bybelspreuk: “Die insig van ’n mens vertraag beslis sy toorn, en dit is mooi van hom om die oortreding oor te sien” (Spreuke 19:11). Insig help ons om dieper as die oppervlak te sien, om te onderskei waarom mense op ’n sekere manier praat of optree. Vra jou dus af: ‘Was die persoon wat my te na gekom het, moeg, siek of onder druk?’ As jy onderskei wat ander se ware beweegredes, gevoelens en omstandighede is, kan dit jou woede laat bedaar en jou help om toegewings te maak vir hulle foute.

Praat dit uit

Wat sê die Bybel? “As jou broer ’n sonde begaan, gaan lê sy fout tussen jou en hom alleen bloot. As hy na jou luister, het jy jou broer gewen.”—Matteus 18:15.

Wat is die uitdaging? Negatiewe emosies soos vrees, woede en verleentheid kan keer dat jy die persoon nader om die probleem op te los. Jy kan ook in die versoeking kom om die ondersteuning van ander te probeer kry deur hulle van die probleem te vertel, wat die konflik moontlik sal vererger.

Wat kan jy doen? Wanneer ’n probleem ernstig is en jy voel dat jy dit nie kan oorsien nie, moet jy die persoon nader om sake uit te praat. Probeer die saak soos volg hanteer:

(1) So gou moontlik: Moenie uitstel nie. Dit sal die probleem moontlik net vererger. Probeer Jesus se raad toepas: “As jy . . . jou gawe na die altaar bring en jy daar onthou dat jou broer iets teen jou het, laat staan jou gawe daar voor die altaar en gaan weg; maak eers vrede met jou broer en offer dan, wanneer jy teruggekom het, jou gawe.”—Matteus 5:23, 24.

(2) Privaat: Weerstaan die versoeking om met ander oor die probleem te praat. “Bepleit jou eie saak by jou medemens, en moenie die vertroulike gesprek van ’n ander openbaar nie.”—Spreuke 25:9.

(3) Vreedsaam: Weerstaan die neiging om te ontleed wie reg en wie verkeerd is. Jou doelwit is om vrede te maak, nie om die argument te wen nie. Probeer om die woord “ek” pleks van “jy” te gebruik. Dit sal moontlik baie doeltreffender wees om te sê: “Ek voel seergemaak omdat . . . ” as om te sê: “Jy het my seergemaak!” Die Bybel stel dit soos volg: “Laat ons dan die dinge nastreef wat vrede bevorder en die dinge wat vir mekaar opbouend is.”—Romeine 14:19.

Wees lankmoedig

Wat sê die Bybel? “Moet niemand kwaad vir kwaad vergeld nie. . . . Maar ‘as jou vyand honger is, gee hom iets om te eet; as hy dors is, gee hom iets om te drink’.”—Romeine 12:17, 20.

Wat is die uitdaging? As jou eerste pogings om vrede te maak, onsuksesvol is, sal jy dalk wil tou opgooi.

Wat kan jy doen? Wees geduldig. Mense verskil wat geaardheid en volwassenheid betref. Party neem langer om af te koel; ander leer nog om godvrugtige eienskappe aan die dag te lê. Hou aan om hulle vriendelik en liefdevol te behandel. “Moet jou nie deur die kwaad laat oorwin nie, maar hou aan om die kwaad met die goeie te oorwin”, sê die Bybel.—Romeine 12:21.

As ons met ander vrede wil maak, moet ons ons daarop toelê om nederigheid, insig, geduld en liefde aan die dag te lê. Maar vreedsame verhoudinge is beslis die moeite werd!

HET JY AL GEWONDER?

● Wat sal jou help om iemand vryelik te vergewe?—Kolossense 3:13.

● Wat kan jou help om die persoon te nader om die probleem uit te praat?—Matteus 5:23, 24.

● Wat kan jy doen as jou pogings om vrede te maak, onsuksesvol is?—Romeine 12:17-21.

[Lokteks op bladsy 11]

“Die insig van ’n mens vertraag beslis sy toorn, en dit is mooi van hom om die oortreding oor te sien.”—SPREUKE 19:11