’n Mylpaal in Malawi—1 000 Koninkryksale!

“EK HET nooit gedink dat dit in Malawi moontlik sou wees nie”, het Augustine uitgeroep. Hy het verwys na die bou van ’n groot aantal Koninkryksale, soos Jehovah se Getuies hulle plekke van aanbidding noem. In 1993 het die 30 000 Getuies wat daar destyds in Malawi was, ’n klein land in die suidooste van Afrika, geen geskikte plekke gehad waar hulle kon aanbid en die Bybel kon bestudeer nie.

Die situasie is vandag egter baie anders. In Blantyre in September 2010 het die Getuies in Malawi hulle duisendste Koninkryksaal voltooi!a Waarom het die Getuies eers plekke van aanbidding begin bou toe hulle getalle 30 000 bereik het? En hoe kon hulle, toe hulle eers begin het, 1 000 sale in ’n betreklike kort tydperk bou in ’n land met beperkte middele? Watter uitwerking het hierdie merkwaardige bouprogram op die Getuies en hulle bure gehad?

Tye van beproewing

In die vroeë 1900’s het Jehovah se Getuies, wat destyds as Bybelstudente bekend gestaan het, Bybelwaarheid in Malawi begin verkondig. Teen 1967 het die aantal Getuies tot omtrent 17 000 toegeneem. Soos die eerste-eeuse Christene, was hulle bekend as wetsgehoorsame burgers wat regeringsamptenare respekteer. En hulle het ook, soos die vroeë Christene, streng neutraliteit in politieke aangeleenthede gehandhaaf.—Johannes 18:36; Handelinge 5:29.

Teen die middel-1960’s het die Getuies se Bybelse standpunt hulle ongelukkig met die regering laat bots, en in 1967 is hulle werk verbied. Kort voor lank is baie voor die voet by hulle werk afgedank en is hulle eiendom deur wettelose elemente gekonfiskeer of vernietig. As gevolg van intense vervolging en die vrees dat hulle uitgewis sou word, het duisende Getuies na die naburige Mosambiek en Zambië gevlug.

Maar uiteindelik het sake vir Jehovah se Getuies in Malawi begin verbeter, en die meeste van hulle is teen die vroeë 1990’s daar hervestig. Hoe verheug was hulle tog toe die 26 jaar lange verbod op hulle werk op 12 Augustus 1993 opgehef is! Hulle het egter voor ’n nuwe dilemma te staan gekom. Daar was meer as 30 000 van hulle in 583 gemeentes, maar hulle het geen geskikte plekke van aanbidding gehad nie! Wat het hulle te doen gestaan?

Liefde in aksie!

In die eerste ses jaar nadat die verbod opgehef is, het plaaslike Getuies hulle op prysenswaardige wyse van die taak gekwyt om Koninkryksale met hulle beperkte middele te bou. Maar dit was nie maklik nie, want die Getuies se getalle het elke jaar vinniger toegeneem as wat Koninkryksale gebou kon word. Die oplossing? Die Bybelbeginsel in 2 Korintiërs 8:14 is toegepas. Die finansiële oorvloed in ander lande is aangewend om ‘deur middel van ’n gelykmaking die tekort aan te vul’ in lande soos Malawi. Met dié doel in gedagte het die Bestuursliggaam van Jehovah se Getuies in 1999 ’n spesiale program van stapel gestuur om plekke van aanbidding in lande met beperkte middele te help bou. Hierdie liefdevolle bystand het die Getuies in Malawi se Koninkryksaalbouprogram ’n taamlike hupstoot gegee.b

Voorheen het gemeentes in Malawi Christelike vergaderinge in klaskamers, tydelike skuilings of selfs onder bome gehou. Nou kan die 1 230 gemeentes in netjiese geboue wat uitsluitlik vir die bevordering van ware aanbidding gebruik word, vir aanbidding en Bybelonderrig bymekaarkom. Soos jy jou kan voorstel, het die meer as 75 000 Getuies in Malawi groot waardering vir die ondersteuning van hulle geestelike broers en susters regoor die wêreld.

Nog ’n faktor wat die Getuies gehelp het om soveel plekke van aanbidding in so ’n kort tydjie te bou, was die feit dat hulle beskeie, praktiese sale wou hê, nie swierige geboue nie. Hierdie eenvoudige, netjiese geboue sou God tot eer strek en ’n gerieflike plek voorsien waar hulle die Bybel kon bespreek en bestudeer.

Plaaslike gemeenskappe word bevoordeel

Jehovah se Getuies in Malawi is voorheen bespot as die godsdiens wat geen plekke van aanbidding het nie. Gevolglik was party Getuies soms skaam om belangstellendes na die vergaderinge te nooi. Stel jou dus voor hoe hulle gevoel het toe hulle hulle eie pragtige Koninkryksaal gekry het. Nou was hulle trots om hulle bure en belangstellendes na die Christelike vergaderinge te nooi. Trouens, in een gebied was die plaaslike gemeente verheug toe 698 mense ’n vergadering by ’n nuwe Koninkryksaal bygewoon het!

Baie Getuies en ander het gesê dat hulle nooit gedink het dat hulle so ’n pragtige en stewige saal in hulle gebied sou hê nie. Augustine, wat aan die begin gemeld is, kan een gemeente onthou wat hulle vergaderinge onder ’n boom gehou het. “In die droë seisoen was dit baie aangenaam”, sê Augustine. “Maar in die reënseisoen was dit ’n ander storie!” As jy al ooit ’n tropiese reënbui ondervind het, sal jy weet waarvan Augustine praat.

Augustine vertel van een van sy besoeke aan die Chimwanje-gemeente. “Ons het die vergadering gehou onder ’n klein skuiling wat bestaan het uit houtpale en ’n grasdak”, verduidelik hy. “Ons het egter nie besef dat ’n groot, giftige spinnekop die grasdak sy tuiste gemaak het nie. In die middel van my toespraak het die spinnekop skielik afgesak en langs my voet geland! ’n Verskrikte stem in die gehoor het uitgeroep: ‘Trap op hom, Augustine, trap hom dood!’ Dis natuurlik presies wat ek gedoen het. Soos julle kan sien, lewe ek nog.” Noudat die gemeente ’n nuwe Koninkryksaal het, is sulke voorvalle iets van die verlede.

“’n Juweel in die gemeenskap”

Die opwindende Koninkryksaalbouprogram het Jehovah se Getuies die bewondering en respek van baie gemeenskappe en plaaslike hoofmanne gewen, soos die volgende kommentare toon:

✔ “Die nuwe plek van aanbidding, tesame met die liefde en eenheid onder Jehovah se Getuies, is ’n juweel in die gemeenskap. Ander kerke kan hulle voorbeeld gerus navolg.”—Die plaaslike hoofman in Chabwenzi.

✔ “Wat ek die meeste omtrent die Getuies bewonder, is hulle eenheid. Ons het ons kerk tien jaar gelede begin bou, maar dit is nog lank nie klaar nie. Ek wil julle bedank omdat julle so ’n pragtige gebou in ons gebied opgerig het.”—Die hoofman van die dorpie Chigwenembe.

✔ “Dit is verbasend om te sien hoe julle werk. Julle werk so vinnig en tog so netjies! Julle geniet seker wonderlike eenheid.”—Die plaaslike hoofman in Chiuzira.

Die Koninkryksaalbouprogram was so opmerkenswaardig dat dit selfs onder die aandag gekom het van die redakteurs van die Chichewa/Chinyanja—English Dictionary, wat aangaande die Getuies sê: “Jehovah se Getuies het baie [Koninkryksale] gebou.”

“Hierdie Koninkryksaal is ’n wonderwerk”

Op 30 Januarie 2011 het die Manyowe-gemeente in Blantyre, wat vroeër gemeld is, hulle nuwe Koninkryksaal toegewy—die duisendste saal wat in Malawi gebou is. “Hierdie Koninkryksaal is ’n wonderwerk”, het een van die gemeentelede gesê. “Ons droom is bewaarheid.”

“Toe ons die saal gebou het, was ek elke dag daar”, vertel ’n jong meisie in die Manyowe-gemeente. “Ek is baie bly dat ek kon help om ’n geskikte plek van aanbidding in ons gebied te bou.”

“Dit was baie moeilik om by die plaaslike owerheid toestemming te kry om ons Koninkryksaal te bou”, het ’n gemeentelike ouer man gesê. “Stadsamptenare het verskeie kere geweier om die nodige permitte te teken. Maar mev. Liness Chikaoneka, die plaaslike hoofvrou, het baie hard gewerk om amptenare te oortuig om die permitte te teken.”

Eendag het mev. Chikaoneka saam met ’n ouer man gegaan om ’n permit te laat teken. “Ek wil hê dat die Getuies hulle Koninkryksaal in my dorpie moet bou”, het sy vir die amptenaar gesê. “Hulle is goeie mense. Hulle was nog nooit betrokke by enige geskille wat ek in my tradisionele hof moes beslis nie.” Toe het die amptenaar die papiere geteken.

Mev. Chikaoneka was in ekstase toe die Koninkryksaal toegewy is. “Ek is baie bly en trots”, het sy gesê, “om hierdie pragtige gebou in my dorpie te hê!”

Dwarsdeur Malawi spreek Jehovah se Getuies en hulle bure steeds hulle waardering uit vir die Koninkryksaalbouprogram. Weens Jehovah se Getuies se voorbeeldige selfopofferende gees en harde werk is daar nie meer so ’n groot agterstand in die aantal Koninkryksale wat in hierdie land nodig is, as wat daar in 1993 was nie. Daar sal natuurlik altyd meer Koninkryksale nodig wees namate al hoe meer mense gunstig reageer op die “goeie nuus van [God se] koninkryk” en nuwe gemeentes gestig word (Matteus 24:14). Die Getuies is dus baie dankbaar vir die liefdevolle ondersteuning en ruimhartige bydraes van hulle mede-Getuies regoor die wêreld.c

Maar die Getuies is bowenal dankbaar teenoor hulle God, Jehovah. Hulle voel soos die psalmis, wat gesê het: “Al die nasies wat u gemaak het, sal kom, en hulle sal hulle voor u neerbuig, o Jehovah, en sal aan u naam heerlikheid gee. Want u is groot en doen wonderbare dinge.”—Psalm 86:9, 10.

[Voetnote]

[Prent op bladsy 24]

Voordat daar met die Koninkryksaal- bouprogram begin is, was vergaderplekke dikwels net ’n skuiling met ’n grasdak

[Prent op bladsy 24]

Nou hou gemeentes vergaderinge in Koninkryksale soos hierdie een