Is ons meer as net vriende?—Deel 1

HET JY AAN ’N SPESIFIEKE PERSOON GEDINK TOE JY DIE TITEL HIERBO GELEES HET?

JA → LEES HIERDIE ARTIKEL ONMIDDELLIK. JY HET DIT DALK NODIGER AS WAT JY DINK.

NEE → LEES HIERDIE ARTIKEL IN ELK GEVAL. DIT SAL JOU HELP OM GEPASTE VRIENDSKAPPE MET DIE TEENOORGESTELDE GESLAG TE HÊ EN PROBLEEMVRYE.

Dui aan of die volgende stelling waar of onwaar is:

Ek moenie met persone van die teenoorgestelde geslag vriende wees voordat ek gereed is vir ’n ernstige verhouding wat tot trou kan lei nie.

․․․․․ WAAR ․․․․․ ONWAAR

Dink hieraan: Hoewel Jesus nie van plan was om te trou nie, het hy vriende van die teenoorgestelde geslag gehad (Matteus 12:46-50; Lukas 8:1-3). Dit was blykbaar ook die geval met die ongetroude man Timoteus, want die apostel Paulus het vir hom gesê om “jonger vroue soos susters met alle kuisheid” te behandel.—1 Timoteus 5:1, 2.

Paulus het ongetwyfeld besef dat Timoteus ’n aantal jong vroue sou ontmoet omdat hy in verskeie gemeentes sou dien (Markus 10:29, 30). Sou dit verkeerd wees van Timoteus om met hulle te assosieer? Nee. Maar aangesien Timoteus nie op daardie stadium van plan was om te trou nie, sou hy perke moes stel sodat hy nie romantiese gevoelens vir iemand sou ontwikkel nie en beslis nie met hierdie jong vroue sou flirt of enigsins met hulle gevoelens sou speel nie.—Lukas 6:31.

Wat van jou? Is jy gereed om te trou?

Indien JA ⇨ Jou vriendskappe met die teenoorgestelde geslag sal jou heel moontlik help om ’n lewensmaat te vind.—Spreuke 18:22; 31:10.

Indien NEE ⇨ Jy moet perke stel (Jeremia 17:9). Makliker gesê as gedaan? Beslis! “Dis moeilik om net vriende te bly”, sê die 18-jarige Nia.a “Dis nie maklik om te weet waar om die lyn te trek nie.”

Waarom moet jy enigsins ’n lyn trek? Want as jy dit nie doen nie, sal jy seerkry of sal jy ander seermaak. Kyk waarom.

LEWENSWAARHEID: As jy emosioneel betrokke raak by iemand voordat jy gereed is vir ’n ernstige verhouding, sal een van julle seerkry. “Dit het twee keer met my gebeur”, sê die 19-jarige Kelli. “Die eenkeer het ek gevoelens vir ’n seun begin ontwikkel, en die ander keer het ’n seun gevoelens vir my begin ontwikkel. Albei kere het iemand seergekry, en ek dra tot vandag toe die letsels.”

Iets om oor na te dink:

● Onder watter omstandighede sal dit vir jou gepas wees om met persone van die teenoorgestelde geslag te assosieer? Watter situasies moet jy eerder vermy?

● Waarom is dit onverstandig om dikwels met dieselfde persoon af te paar? Watter indruk kan dit by die ander persoon skep? Watter indruk kan dit by jou skep?

“Ek het al vir myself gejok en gesê: ‘Ag, ons is net vriende. Hy is soos my broer.’ Maar wanneer hy dan in ’n ander meisie belangstelling toon, voel ek seergemaak—asof hy my iets skuld.”—Denise.

Die Bybel sê: “’n Verstandige mens sien onheil kom en vermy dit; onervare mense loop oop oë daarin en boet daarvoor.”—Spreuke 22:3, Nuwe Afrikaanse Bybelvertaling.

LEWENSWAARHEID: As jy emosioneel betrokke raak by iemand voordat jy gereed is vir ’n ernstige verhouding, kan jy ’n goeie vriendskap verloor. “Ek en ’n seun het mekaar ge-SMS”, vertel die 16-jarige Kati, “maar kort voor lank het hy met my begin flirt en het ons mekaar byna elke dag ge-SMS. Toe het hy eendag vir my gesê hoeveel hy van my hou en dat hy meer as net vriende wil wees. Die probleem was dat ek glad nie romantiese gevoelens vir hom gehad het nie. Nadat ek dit vir hom gesê het, het ons selde met mekaar gepraat, en ons vriendskap was daarmee heen.”

Iets om oor na te dink:

● Wie het in Kati se geval seergekry, en waarom? Kon Kati of haar vriend gekeer het dat sake skeefloop? Indien wel, hoe?

● Hoe kan ’n mens wanneer jy SMS’e stuur, onwetend die indruk skep dat jy meer as net vriende wil wees?

“Soms moes ek my seunsvriende so ’n bietjie op ’n afstand hou. Seuns kan fantastiese vriende wees, maar ek wou nie ’n vriendskap verloor deur meer as net vriende te wees nie.”—Laura.

Die Bybel sê: “’n Verstandige mens oorweeg elke tree wat hy gee.”—Spreuke 14:15, Nuwe Afrikaanse Bybelvertaling.

Die slotsom: Dit is nie verkeerd om met persone van die teenoorgestelde geslag te assosieer nie. Maar as jy nie gereed is vir ’n ernstige verhouding wat tot trou kan lei nie, moet jy perke stel.

IN DIE VOLGENDE “JONGMENSE VRA” . . .

As jy emosioneel betrokke raak by iemand voordat jy gereed is vir ’n ernstige verhouding, kan jy ’n slegte reputasie kry—vind uit hoe.

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnoot]

[Venster/Prent op bladsy 16]

WAT SAL JY DOEN?

WARE VERHAAL: “Ek het ’n vriend ge-SMS wat meer as 1 500 kilometer van my af woon. Ons het mekaar seker een keer per week ge-SMS. Ek het nie romantiese gevoelens vir hom gehad nie, en ek het ook nie gedink dat hy in my belangstel nie. Toe het hy eendag vir my ’n SMS gestuur wat gesê het: ‘Hallo, jou mooi ding! Ek mis jou. Wat’s nuus?’ Ek was stomgeslaan! Ek het vir hom gesê dat ek gedink het ons is net vriende en dat ek nie romanties in hom belangstel nie. Hy het geantwoord: ‘Nes jy wil.’ En daarna het hy my nooit weer ge-SMS nie.”—Janette.

● Gestel jy is nie gereed vir ’n ernstige verhouding of jy wil nie in een wees nie. Hoe sal jy reageer as jy ’n SMS ontvang soos die een wat Janette gekry het?

● As jy ’n seun is, dink jy dat die SMS’e wat Janette se vriend vir haar gestuur het, gepas was? Waarom, of waarom nie?

● Dink jy dit is makliker om emosioneel by iemand betrokke te raak wanneer ’n mens SMS’e stuur as wanneer jy van aangesig tot aangesig met die persoon praat? Waarom, of waarom nie?

[Venster op bladsy 17]

VRA JOU OUERS

Vra jou ouers hoe hulle die vrae langs die kolletjies in hierdie artikel sal beantwoord. Verskil hulle mening van joune? Indien wel, hoe? Waarom is jou ouers se beskouing moontlik geldig?—Spreuke 11:14.

[Venster/Prente op bladsy 17]

WAT JOU PORTUURS SÊ

Joshua—Hoe meer tyd jy met dieselfde persoon deurbring, hoe groter is die kans dat jy aan daardie persoon geheg sal raak.

Natasha—As jy gereeld met een spesifieke persoon tyd deurbring, sal een of albei van julle romantiese gevoelens ontwikkel, al wou julle net vriende wees.

Kelsey—Selfs as julle aan die begin net vriende is, kan julle gevoelens maklik verander as julle baie tyd saam deurbring. Dis nie onmoontlik om net vriende te wees nie, maar dit verg volwassenheid en onderskeidingsvermoë.

[Prent op bladsy 16]

As jy emosioneel betrokke raak by iemand voordat jy gereed is vir ’n ernstige verhouding, sal dit tot rampspoed lei