Is ons meer as net vriende?—Deel 2

IN ONS VORIGE NOMMER het ons twee lewenswaarhede bespreek.

● As jy emosioneel betrokke raak by iemand voordat jy gereed is vir ’n ernstige verhouding, sal een van julle seerkry.—Spreuke 6:27.

● As jy emosioneel betrokke raak by iemand voordat jy gereed is vir ’n ernstige verhouding, kan jy ’n goeie vriendskap verloor.a—Spreuke 18:24.

IN HIERDIE NOMMER sal ons kyk na

● ’n Derde lewenswaarheid oor emosionele betrokkenheid

● Hoe jy kan weet of jy en iemand van die teenoorgestelde geslag meer as net vriende is

LEWENSWAARHEID: As jy emosioneel betrokke raak by iemand voordat jy gereed is vir ’n ernstige verhouding, kan dit jou ’n slegte reputasie gee. Miab sê: “Ek het al seuns gesien wat baie meisievriende het. Hulle speel eenvoudig met hulle gevoelens. Die meisies dink dat hy in hulle belangstel, maar die seun geniet net die aandag.”

Iets om oor te dink:

● Hetsy jy ’n seun of ’n meisie is, hoe kan dit jou reputasie benadeel as jou vriendskappe met die teenoorgestelde geslag te heg is?

“Om mense van die teenoorgestelde geslag te SMS, is ’n groot slaggat. Aan die begin stuur jy nou en dan vir een persoon ’n SMS, maar kort voor lank stuur jy gereeld aan baie mense SMS’e. Voor jy jou kom kry, gaan jy so te sê met drie verskillende seuns uit, en elkeen dink hy’s die ‘spesiale een’ wat jy beter wil leer ken. Wanneer hulle die waarheid uitvind, kry hulle seer—en jy kry ’n reputasie as ’n flirt.”—Lara.

Die Bybel sê: “Deur sy handelinge laat ’n seun [of ’n meisie] hom tog ken, of sy optrede suiwer en reg is.”—Spreuke 20:11.

Die slotsom: Dit is nie verkeerd om met mense van die teenoorgestelde geslag te assosieer nie. Maar as jy nie perke stel nie, kan iemand seerkry, kan jy ’n goeie vriendskap verloor en kan jy jou reputasie skade aandoen.

Hoe kan jy weet of ’n vriendskap te heg geraak het? Een manier is om jou af te vra: ‘Het iemand van die teenoorgestelde geslag my enigste vertroueling geword?’ “As jy en ’n seun werklik net vriende is”, sê ’n meisie met die naam Erin, “moet hy nie die eerste persoon wees met wie jy elke dag wil praat of vir wie jy belangrike nuus wil vertel nie. Hy moet beslis nie die een wees by wie jy emosionele vertroosting soek nie.”

Iets om oor te dink:

● Waarom kan jy in die versoeking kom om iemand van die teenoorgestelde geslag jou enigste vertroueling te maak? Maar watter gevare hou dit in?

“Die seuns wat ek ken, is nie my hegste vriende nie. Ek praat nie ure lank oor die foon met hulle soos ek met ’n vriendin sou doen nie. En daar’s dinge wat ek eenvoudig nie met hulle sal bespreek nie.”—Rianne.

Die Bybel sê: “Let op wat jy sê . . . Iemand wat onnadenkend praat, vernietig homself.”—Spreuke 13:3, Good News Translation.

Dink hieraan: Is dit verstandig om iemand van die teenoorgestelde geslag te veel omtrent jouself te vertel? Sê nou julle vriendskap loop uiteindelik dood? Sal jy spyt wees dat jy daardie persoon soveel vertel het?

’n Tiener met die naam Alexis som dit goed op. Sy sê: “Moenie iemand vermy net omdat hy of sy van die teenoorgestelde geslag is nie. Maar moet ook nie vir jouself jok en sê dat julle net vriende is as julle meer as dit is nie. Bly in beheer van jou gevoelens, en jy sal baie hartseer vermy.”

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

[Venster op bladsy 17]

WARE VERHAAL: “Ek was vriende met ’n seun, en ons het baie goed oor die weg gekom. Maar toe het ek agtergekom dat ons gesprekke al hoe langer en persoonliker begin raak. Ek het besef dat ons vriendskap ’n bietjie te heg raak omdat hy met my oor al sy probleme gepraat het. Toe het hy eendag vir my ’n e-pos gestuur en vir my gesê dat hy romantiese gevoelens vir my het. Ek het nie geweet wat om te sê nie. Aan die een kant het ek gevlei gevoel—dis lekker as iemand dink jy’s spesiaal. Maar aan die ander kant was ek bekommerd. Ek het geweet dat ons nie ‘net vriende’ kon bly nie, want dit was duidelik dat hy gedink het ons is meer as dit. Ek het geweet dat hy seergemaak sou voel as ek vir hom sê dat ons te jonk is vir ’n romantiese verhouding. Ek het my ouers hiervan vertel, en hulle het by my tuisgebring hoe belangrik dit is dat ek en die seun ons kontak met mekaar beperk. Hierdie ondervinding het my laat besef hoe gou ’n verhouding wat heeltemal onskuldig was, baie ernstig kan raak. En van toe af het ek ’n punt daarvan gemaak om my assosiasie met die teenoorgestelde geslag te beperk, veral wanneer dit by SMS’e kom. Dit help ook om eerder in groepe te kuier as om af te paar. Dan sal julle gesprekke nie te persoonlik raak nie en sal jou gevoelens vir die ander persoon nie te sterk raak nie.”—Elena.

[Venster op bladsy 18]

VRA JOU OUERS

Vra jou ouers hoe hulle die twee “Iets om oor te dink”-vrae in hierdie artikel sal beantwoord. Verskil hulle mening van joune? Indien wel, hoe? Waarom is hulle beskouing moontlik geldig?—Spreuke 1:8.

[Venster/Prente op bladsy 18]

WAT JOU PORTUURS SÊ

Andre—Hoe meer tyd jy met ’n meisie deurbring, hoe makliker is dit om vir mekaar gevoelens te ontwikkel en hoe meer sal sy dink dat jy in ’n romantiese verhouding belangstel. As jou doelwitte jou nie toelaat om nou in ’n verhouding betrokke te raak nie, moet jy nie die indruk skep dat jy een wil begin nie.

Cassidy—Oor die algemeen is ek baie uitgaande, en omdat ek saam met seuns grootgeword het, is ek op my gemak in hulle geselskap—en dis nie altyd ’n goeie ding nie. Om ’n seun te behandel soos ek ’n vriendin sou behandel, is nie goed nie—dit kan die verkeerde indruk skep. Vir my is dit baie beter om ’n seun te behandel soos ek my broer sou behandel!

[Venster op bladsy 19]

’N WOORDJIE AAN OUERS

Onder die gepaste omstandighede is dit nie verkeerd vir jongmense om met die teenoorgestelde geslag te assosieer nie. Maar diegene wat nie gereed is vir ’n verhouding wat tot trou kan lei nie, moet perke stel.c Vir hulle moet vriendskappe met die teenoorgestelde geslag juis dit wees—vriendskappe en niks meer nie.

Wat gebeur wanneer twee mense emosioneel by mekaar betrokke raak voordat hulle gereed is vir ’n ernstige verhouding? Enige aanvanklike opwinding lei kort voor lank tot frustrasie. Dis soos om in ’n motor te sit wat nie wiele het nie. Vroeër of later besef die seun en die meisie dat die verhouding nêrens kan gaan nie. Party begin dalk in die geheim uitgaan—’n situasie wat vol sedelike slaggate is. Ander verbreek die verhouding—wat albei bedrieg, seergemaak en selfs terneergedruk kan laat voel. Hoe kan jy jou adolessent help om nie te vroeg in ’n romantiese verhouding betrokke te raak nie en om sodoende die probleme te vermy wat daarmee gepaardgaan?—Prediker 11:10.

Die sleutel is openlike kommunikasie tussen jou en jou adolessent oor vriendskappe met die teenoorgestelde geslag. Dan sal jy weet—en sal jy kan help—as ’n vriendskap te heg begin raak.

Party ouers ontmoedig hulle adolessent onwetend om oor hierdie deel van sy of haar sosiale lewe te praat. Kyk na wat party jongmense vir Ontwaak! gesê het.

“Ek wou altyd met my ma gesels het oor die seuns van wie ek hou, maar ek was bang sy sou oorreageer.”—Cara.

“Wanneer ek vir my ma gesê het dat ek van ’n seun hou, het sy gesê: ‘Moenie verwag dat ek by jou troue sal wees nie!’ pleks van: ‘Vertel my van jou vriend. Hoekom hou jy van hom?’ As my ma sulke vrae gevra het, sou ek haar raad dalk makliker aanvaar het.”—Nadeine.

Let daarenteen op die verskil wanneer ouers geduldig geluister het en dan praktiese leiding voorsien het.

“My ouers het nie geoorreageer wanneer ek vir hulle vertel het van ’n seun van wie ek hou nie. Hulle het gesê wat ek moes hoor, maar hulle het my gevoelens in ag geneem. Daarom vind ek dit makliker om na hulle raad te luister en selfs openliker met hulle te praat.”—Corrina.

“Omdat my ouers my vertel het van wie hulle gehou het toe hulle jonk was—en selfs verduidelik het waarom ’n sekere verhouding nie uitgewerk het nie—het dit my help besef dat ek openlik met my ouers kan praat as ek van iemand hou.”—Linette.

Hou ook in gedagte dat daar soms ander redes is waarom ’n jong persoon te vroeg in ’n romantiese verhouding betrokke raak.

“Ek het eenkeer in die geheim met ’n seun uitgegaan omdat hy my gelukkig laat voel het en na my geluister het.”—Annette.

“Daar was ’n seun wie se geselskap ek altyd geniet het. Hy het my altyd aandag gegee, en dis my swakheid. Ek hou van aandag, of dit nou goed of sleg is.”—Amy.

“Wanneer my ouers opreg vir my sê dat ek mooi lyk of dat ’n sekere uitrusting goed aan my lyk, voel ek nie dat ek so ’n kompliment van ’n seun hoef te kry nie.”—Karen.

Vra jou af:

Hoe kan ek dit vir my adolessent makliker maak om met my te praat?—Filippense 4:5.

Is ek “gou . . . om te hoor, stadig om te praat”?—Jakobus 1:19.

Wat kan ek doen sodat my adolessent nie buite die gesin na liefde en goedkeuring sal soek nie?—Kolossense 3:21.

Die slotsom: Help jou adolessent om te leer hoe om gepaste en probleemvrye vriendskappe met die teenoorgestelde geslag te hê. Dit is ’n vaardigheid wat baie nuttig sal wees wanneer hy of sy volwasse is.—Kolossense 3:5; 1 Tessalonisense 4:3-6.

[Footnoot]

[Tabel op bladsy 17]

(Sien publikasie vir oorspronklike teksuitleg)

PERKE

JULLE KAN

✔ in groepe assosieer

✔ mekaar leer ken

✔ gesels

JULLE MOENIE

X afpaar nie

X dinge bespreek wat te persoonlik is nie

X flirt nie

[Diagram op bladsy 18]

(Sien publikasie vir oorspronklike teksuitleg)

SAAM KUIER

FLIRT

AAN MEKAAR RAAK

HANDE VASHOU

SOEN