Van ons lesers
Hospice-sorg—Wat is die doel daarvan? (Julie 2011) Ek het opleiding as ’n maatskaplike werker by ’n hospice ontvang, en ek kan persoonlik bevestig dat wat julle in die Ontwaak! van Julie 2011 sê, waar is. Fasiliteite wat ten volle toegerus is om na terminale pasiënte om te sien, is noodsaaklik in die wêreld waarin ons lewe. Ek sien met groot afwagting uit na God se komende heerskappy wanneer niemand sal sê “Ek is siek” nie en God die trane van ons oë sal afvee.—Jesaja 33:24; Openbaring 21:3, 4.
M. R., Italië
Hoe gesond is jou skildklier? (Mei 2009) Baie dankie vir hierdie artikel. Ek het ’n rukkie gelede uitgevind dat daar iets verkeerd is met my skildklier, maar ek het niks daaromtrent gedoen nie. Nadat ek hierdie artikel gelees het, het ek egter ’n spesialis gaan spreek wat vasgestel het dat ek Graves-siekte het. Gelukkig is dit ontdek voordat my simptome te erg geraak het. Weer eens baie dankie.
T. K., Japan
’n Boek wat jy kan vertrou—Dele 1-7 (November 2010–Mei 2011) Dankie vir die goed geskrewe en deeglik nagevorste reeks van sewe artikels oor die vername moondhede in Bybelgeskiedenis. Dit sal wonderlik wees as hierdie meesterlike artikels in die vorm van ’n brosjure uitgegee sou word. Hierdie geskiedkundige reeks kan mense help om die Bron van hierdie Bybelprofesieë—naamlik Jehovah—die diepe respek te gee wat hom toekom.
G. H., Verenigde State
Jongmense vra . . . Wat moet ek omtrent sosiale netwerke weet? (Julie 2011) Dankie vir hierdie artikel. Ek is 26 jaar oud. Ek was van plan om by [’n sosiale netwerk] aan te sluit, nie omdat ek meer vriende wou hê nie, maar omdat baie mense my aangespoor het om dit te doen. Hierdie artikel het my baie gehelp. Jy kan vriende maak sonder om aan ’n sosiale netwerk te behoort.
M. P., Filippyne
Ek het verwag dat die artikel sosiale netwerke in ’n negatiewe lig sou stel. Maar die artikel was gebalanseerd. Dit het die positiewe en negatiewe aspekte van sosiale netwerke bespreek en raad voorsien oor hoe ons ons teen die potensiële gevare daarvan kan beskerm. Dit het by my tuisgebring hoe belangrik dit is om versigtig te wees wanneer ek persoonlike inligting op die Internet plaas.
C. W., Verenigde State
Sleutels tot ’n suksesvolle gesinslewe (Oktober 2009) Hierdie spesiale uitgawe het ons gesin baie gehelp. Ek het veral die vensters “Probeer hierdie oefening” geniet, wat verskyn het in elkeen van die sewe artikels waarin die sleutels bespreek is. Ons gesin het reeds die spesifieke wenke wat voorsien is, begin toepas.
H. H., Korea
Vir gesinsbespreking Baie dankie vir hierdie rubriek. Ons sesjarige dogter geniet die “Prentejag vir kinders” en hou baie daarvan om die prente in te kleur. Hierdie artikels beklemtoon die rol wat ouers moet speel om hulle kinders van kleins af op te lei. Die moeite wat julle vir kinders doen, is van onskatbare waarde.
M. P., Pole