Jy kan leer om vredeliewend te wees

HOEWEL ons moontlik met sekere verkeerde neigings gebore word, word gewelddadige gedrag gewoonlik aangeleer. Dit is ook die geval met vredeliewendheid. Maar wie kan ons leer om waarlik vredeliewend te wees? Die gesaghebbendste persoon in hierdie verband is sekerlik ons Skepper, wie se wysheid ongeëwenaard is. Kyk na die volgende vyf punte en die Bybel se wyse raad in verband met elkeen.

1 “Moenie afgunstig raak op die man van geweld nie” (Spreuke 3:31). Hou in gedagte dat dit ware krag verg om eienskappe soos selfbeheersing en sagmoedigheid te openbaar. “Hy wat nie gou toornig word nie, is beter as ’n sterk man”, sê Spreuke 16:32. Soos ’n sterk damwal, kan hy die druk weerstaan wanneer hy uitgetart word. Trouens, hy reageer met sagmoedigheid op woede, en sodoende ‘keer hy woede af’ (Spreuke 15:1). ’n Man wat geneig is tot woede, verloor sy humeur oor die geringste dingetjie.—Spreuke 25:28.

2 Wees verstandig in jou keuse van assosiasie. “’n Man van geweld sal sy naaste verlei”, sê Spreuke 16:29. Maar “hy wat met wyses wandel, sal wys word” (Spreuke 13:20). Ja, wanneer ons met vredeliewende mense assosieer wat selfbeheersing en ’n sagmoedige gees openbaar, sal ons hulle heel moontlik probeer navolg.

3 Kweek opregte liefde vir ander aan. Die beste beskrywing wat nog van liefde gegee is, word gevind in 1 Korintiërs 13:4-7. Dit sê gedeeltelik: “Die liefde is lankmoedig en goedhartig. . . . [Dit] raak nie ergerlik nie. Dit hou nie boek van die kwaad nie. . . . Dit verdra alles, . . . verduur alles.” Jesus het gesê dat godvrugtige liefde selfs ’n mens se vyande insluit.—Matteus 5:44, 45.

4 Vertrou dat God met die goddeloses sal afreken. “Moet niemand kwaad vir kwaad vergeld nie. . . . [Wees] sover dit van julle afhang, vreedsaam teenoor alle mense. Moet julle nie wreek nie, geliefdes, . . . want daar staan geskrywe: ‘Die wraak is myne; ek sal vergeld, sê Jehovah’” (Romeine 12:17-19). As ons geloof in God en sy beloftes stel, geniet ons innerlike vrede wat mense sonder geloof glad nie kan verstaan nie.—Psalm 7:14-16; Filippense 4:6, 7.

5 Vertrou op God se Koninkryk om ware vrede op die aarde te bewerkstellig. God se Koninkryk is ’n hemelse regering wat binnekort alle goddeloosheid uit die weg sal ruim en algehele beheer oor die aarde sal oorneem (Psalm 37:8-11; Daniël 2:44). Onder daardie Koninkryk “sal die regverdige bloei”, en daar sal ’n “oorvloed van vrede [wees] totdat die maan nie meer is nie”.—Psalm 72:7.

Sulke Bybelleringe het al miljoene mense gehelp—insluitende party met ’n gewelddadige geaardheid—om vredeliewend te word. Beskou die voorbeeld van Salvador Garza.