Ek was lief vir geweld
Soos vertel deur Salvador Garza
TOE ek ’n kind was, was ek lief vir geweld en het ek baklei met almal wat my kwaad gemaak het. ’n Plaaslike bokskampioen het dit opgemerk en my leer boks. Toe ek ouer was, het ek as ’n professionele bokser deur die Verenigde State gereis. Later het ek as ’n lyfwag vir ’n bendelid gewerk.
Selfs nadat ek getrou het en ses kinders gehad het, was ek nog steeds lief vir geweld. Teen daardie tyd was ek die bestuurder van ’n nagklub. Daar was verskeie aanslae op my lewe, maar ek het die opwinding geniet. Eenkeer het ek twee mans gedurende ’n bakleiery geskiet en hulle swaar gewond. Ek en ’n paar vriende het selfs beplan om ’n vooraanstaande politikus te ontvoer. Maar die polisie het daarvan uitgevind en my in hegtenis geneem. Toe die polisie die ander opgespoor het, was daar ’n skietgeveg, en al my vriende is doodgeskiet. Hoe bly is ek tog dat ek op daardie stadium in die tronk was!
Ek is jare later vrygelaat en het ’n werk gekry. Toe ek eendag ná werk op pad was huis toe, het ek skielik ’n verblindende hoofpyn gekry. Ek was so bekommerd dat ek om hulp gebid het. My vrou, Dolores, wat die Bybel saam met Jehovah se Getuies gestudeer het, het vir my gesê dat God ’n naam het—Jehovah (Psalm 83:18). Ek het dus spesifiek tot hom gebid.
Toe ek beter gevoel het, het Dolores my aangemoedig om die vergaderinge van Jehovah se Getuies by hulle Koninkryksaal by te woon. Die vriendelikheid en opregte belangstelling van die Getuies het my diep getref. Gevolglik het ek ook die Bybel begin studeer, en my hele lewensuitkyk het begin verander. Ek het baie gehou van wat ek geleer het.
Dit het my egter ’n hele ruk geneem om te leer om my humeur te beteuel. Toe ek byvoorbeeld eendag met my vriend Antonio aan die huis-tot-huis-bediening deelgeneem het, het ’n man ons uitgeskel. Ek was woedend en wou hom te lyf gaan. Gelukkig het Antonio my gekeer. Later het hy my geduldig daaraan herinner dat Jesus baie bespotting en mishandeling verduur het. Die apostel Petrus, wat ten nouste saam met Jesus gewerk het, het geskryf: “Toe hy uitgeskel is, het hy nie terug uitgeskel nie” (1 Petrus 2:23). Ek het hierdie woorde ter harte geneem.
Wanneer ek terugdink aan die veranderinge wat ek oor die jare aangebring het, dank ek Jehovah vir sy heilige gees, wat ons help om selfbeheersing aan die dag te lê en waarlik vredeliewend te word (Galasiërs 5:22, 23). My gesin is verenig en gelukkig, en ons geniet ’n stil, vreedsame lewe. Wat meer is, ek het die voorreg om as ’n voltydse bedienaar te dien en ander te help om die vrede van God te vind.
[Prent op bladsy 9]
’n Studie van die Bybel het Salvador gehelp om vrede te vind