Jongmense vra
Wie is my rolmodelle?
In hierdie artikel sal jy leer
WAAROM jy rolmodelle nodig het
WAAR om hulle te vind
HOE om hulle voorbeeld te volg
WAAROM JY HULLE NODIG HET
LEWENSWAARHEID: ’n Mens is geneig om te word soos die mense wat jy bewonder. Dit kan goed of sleg wees—afhangende van wie jy bewonder.
Wat jy nodig het: Rolmodelle wat navolgenswaardig is.—Filippense 3:17.
Die probleem: Baie mense bewonder beroemde mense—musikante, sporthelde of filmsterre—selfs as hulle ’n slegte reputasie het.
Iets om oor te dink: Die Bybel vergelyk ons eienskappe met ’n kledingstuk (Kolossense 3:9, 10). Sê nou jy wil klere koop. Sal jy toelaat dat ’n winkelklerk wat slordig aangetrek is, vir jou sê wat om te dra? Waarom sou jy dan toelaat dat ’n beroemde persoon met ’n swak karakter vir jou sê watter soort persoon jy moet wees? Pleks van dit te doen of bloot die stroom te volg, moet jy goeie rolmodelle kies, want dit sal jou help om (1) te besluit watter eienskappe jy wil aankweek en (2) mense na te volg wat hierdie eienskappe op ’n uitstekende manier openbaar.
WAAR OM HULLE TE VIND
Dui aan of die volgende stellings waar of onwaar is.
1. ’n Rolmodel moet iemand wees wat jy persoonlik ontmoet het.
□Waar □Onwaar
2. ’n Rolmodel moet volmaak wees.
□Waar □Onwaar
3. Jy kan baie rolmodelle hê.
□Waar □Onwaar
Antwoorde
1. Onwaar. Jy kan selfs rolmodelle uit die verre verlede kies. Die bestes kan in die Bybel gevind word. As jy byvoorbeeld hoofstuk 11 in die Bybelboek Hebreërs lees, sal jy vind dat die apostel Paulus 16 manne en vroue noem wie se geloof navolgenswaardig is. In die volgende hoofstuk spoor Paulus Christene aan om bowenal “die oog gevestig” te hou op Jesus en hom te volg (Hebreërs 12:2, Ou Afrikaanse Bybelvertaling). Jesus is ons beste rolmodel.—Johannes 13:15.a
2. Onwaar. Benewens Jesus het Adam geen volmaakte nakomelinge gehad nie (Romeine 3:23). Selfs die dapper profeet Elia was “’n mens net soos ons” (Jakobus 5:17, OAB). Dieselfde is waar van mense soos Mirjam, Dawid, Jona, Marta en Petrus. Die Bybel verwys openlik na die foute van hierdie manne en vroue. Nogtans was hulle in die meeste aspekte van die lewe voorbeeldig, en daarom kan hulle goeie rolmodelle wees.
3. Waar. Jy kan soveel rolmodelle hê as wat jy wil. Een is miskien ’n baie harde werker, terwyl ’n ander dalk besonder geduldig is. ’n Derde behou dalk ’n positiewe uitkyk ten spyte van probleme (1 Korintiërs 12:28; Efesiërs 4:11, 12). Soek na die goeie in ander, en jy sal vind dat hulle eienskappe het wat navolgenswaardig is.—Filippense 2:3.
HOE OM HULLE VOORBEELD TE VOLG
1. Wees oplettend wat jou rolmodelle betref. Die apostel Paulus het vir eerste-eeuse Christene gesê: “Let op die mense wat lewe volgens die voorbeeld wat ons vir julle stel.”—Filippense 3:17, OAB.
2. Leer ken diegene wat jy as hedendaagse rolmodelle gekies het deur, indien moontlik, tyd saam met hulle deur te bring. Die Bybel sê: “Hy wat met wyses wandel, sal wys word.”—Spreuke 13:20.
3. Weerspieël jou rolmodelle se prysenswaardige eienskappe. Hebreërs 13:7 sê: “Namate julle die uiteinde van hulle gedrag aanskou, moet julle hulle geloof navolg.”
Gereed om te begin? Vul die rolmodelaksieplan hieronder in.
Aksieplan
Kies ’n eienskap wat jy wil aankweek. (Wil jy meer uitgaande, vrygewiger, hardwerkender, veerkragtiger of betroubaarder wees?)
․․․․․
Kies ’n persoon wat die eienskap openbaar wat jy wil aankweek.b
․․․․․
Wanneer jy ’n goeie rolmodel kies, is jou doel nie om presies soos daardie persoon te word nie. Jy sal nog steeds jou eie unieke goeie eienskappe hê. Nogtans sal goeie rolmodelle die beste in jou na vore bring terwyl jy grootword. En deur hulle voorbeeld te volg, sal jy vir ander ’n goeie rolmodel word.
Nog artikels uit die reeks “Jongmense vra” kan gevind word op die webwerf www.watchtower.org/ype
[Voetnote]
a Vandag is daar natuurlik ook baie mense wat goeie rolmodelle kan wees. Dit kan een van jou ouers wees, jou broer of suster, ’n geestelik volwasse lid van die Christengemeente of ’n ander voorbeeldige persoon wat jy ken of van wie jy gelees het.
b Jy kan hierdie oefening ook andersom doen. Kies eers iemand wat jy bewonder. Vra jou dan af: ‘Watter spesifieke eienskap van hierdie persoon bewonder ek?’ Gebruik die persoon dan as ’n rolmodel, en probeer die eienskap navolg wat jy geïdentifiseer het.
[Lokteks op bladsy 21]
Waarom toelaat dat ’n beroemde persoon met ’n swak karakter vir jou sê watter soort persoon jy moet wees?
[Venster/Prente op bladsye 22, 23]
WAT JOU PORTUURS SÊ
Layla—My vriendin Sandra sien die positiewe sy van ’n saak. Sy ken haar Bybel ook baie goed, en daarom weet sy blykbaar altyd wat die oplossing vir ’n probleem is. Ek kan oor enige probleem met haar praat, groot of klein.
Terrence—My vriende Kyle en David laat ander nooit voel dat hulle gevoelens onbelangrik is nie. Hulle is altyd daar om te help wanneer iemand ’n probleem het, terwyl hulle hulle eie bekommernisse op die agtergrond skuif. Hulle is fantastiese voorbeelde.
Emmaline—My ma is my rolmodel. Sy ken haar Bybel soos die palm van haar hand en is altyd op die uitkyk na geleenthede om met mense oor haar geloof te praat. Sy glo werklik dat die bediening ’n voorreg is, nie ’n las nie. Ek bewonder haar daarvoor!
[Venster op bladsy 23]
LEES MEER HIEROOR!
Het jy hulp nodig om goeie rolmodelle te vind? Lees Hebreërs hoofstuk 11 en kies een van die manne of vroue wat daarin genoem word. Begin ’n studieprojek met die doel om daardie persoon se navolgenswaardige eienskappe na te volg.
Jy kan nog Bybelse rolmodelle vind in Deel 1 en 2 van Vrae wat jongmense vra—Antwoorde wat werk, uitgegee deur Jehovah se Getuies. Sien die “Rolmodelindeks” heel agter in elke boek.
[Venster op bladsy 23]
VRA JOU OUERS
Praat met jou ouers oor hulle rolmodelle—die rolmodelle wat hulle gehad het toe hulle jou ouderdom was en dié wat hulle nou het. Hoe het jou ouers daarby baat gevind om rolmodelle in hulle lewe te hê?